މޯލްޑިވިއަންގެ ދަތުރުތަކަށް ބޮޑު ތަރުހީބެއް؛ ފުރަތަމަ ފްލައިޓުގައިވެސް ގިނަ އަދަދެއްގެ ފަތުރުވެރިން

ޗައިނާއާއި ރާއްޖެއާ ދެމެދު ފަށާފައިވާ މޯލްޑިވިއަންގެ ދަތުރުތަކަށް ބޮޑު ތަރުހީބެއް ލިބެމުންދާ ކަމަށް އެ އެއަރލައިނުން ވިދާޅުވެއްޖެއެވެ. މޯލްޑިވިއަންގެ ޗައިނާ ދަތުރުތަކުގެތެރެއިން އެންމެ ފުރަތަމަ މަންޒިލަކީ ޗެންޑޫއެވެ. އެގޮތުން ޗެންޑޫއިން ރާއްޖެއަށް އައި ފުރަތަމަ ފްލައިޓުގައި ގިނަ އަދަދެއްގެ ފަތުރުވެރިން ވަނީ އައިސްފައެވެ.

މޯލްޑިވިއަން ދަތުރުތަށް ޗައިނާއަށް ފަށާފައިވާއިރު، ރާއްޖެއިން ޗައިނާގެ ޗެންޑޫއަށް ފުރަތަމަ ފްލައިޓު ފުރާފައިވަނީ، ބުދަ ދުވަހުއެވެ. އަދި މިއަދު ހެނދުނު ފުރަތަމަ ފްލައިޓު ރާއްޖެ އައިސްފައިވާއިރު، މިފްލައިޓުން ޖުމްލަ 192 މީހަރު ރާއްޖެ އައިސްފައިވެއެވެ. މީގެ ތެރެއިން 172 މީހުންނަކީ ފަތުރުވެރިން ކަމަށް މޯލްޑިވިއަންއިން ވިދާޅުވެއެވެ.

މި ފްލައިޓުން އައި ފަތުރުވެރިންނަށް ވެލާނާ އިންޓަނޭޝަނަލް އެއަރޕޯޓުން ހޫނު މަރުހަބާއެއް ވަނީ ކިޔާފައެވެ. ވެލާނާ އެއާޕޯޓުން ފަތުރުވެރިންނަށް މަރުހަބާ ކިއުމުގައި ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް، އިޤްތިޞާދީ ތަރައްޤިއާއި ވިޔަފާރިއާއި ބެހޭ ވަޒީރު މުހައްމަދު ސަޢީދު އަދި ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ބައިވެރިވެވަޑައިގެންނެވިއެވެ. މީގެ އިތުރުން މޯލްޑިވިއަން އަދި އެމްއޭސީއެލްގެ މަރުހަބާ ދެންނެވުމުގެ ހަރަކާތުގައި ބައިވެރިވެވަޑައިގެންނެވިއެވެ.

މޯލްޑިވިއަންގެ ސީދާ ދަތުރުތައް ރާއްޖެއާއި ދެމެދު ފަށާފައިވާއިރު، މިދަތުރުތަކަށް ބޮޑު ތަރުހީބެއް ލިބެމުންދާ ކަމަށް މޯލްޑިވިއަންއިން ވިދާޅުވިއެވެ. އެކުންފުނީގެ ޑެޕިއުޓީ މެނޭޖިންގް ޑިރެކްޓަރ އަލީ ސަލީމް ވިދާޅުވީ، ޗެންޑޫއިން މާލެ އައި ދަތުރުގައި ގިނަ އަދަދެއްގެ ފަތުރުވެރިންނާއިއެކު، ކާގޯ ގެނެސްފައިވާ ކަމަށެވެ.

"މިއަދުގެ ފްލައިޓުންވެސް އަޅުގަނޑުމެން ހިތްހަމަޖެހޭ ވަރަށް ކާގޯވެސް ލިބިއްޖެ. 10 ޓަން ކާގޯ މިއައި. އިރާދަ ކުރެއްވިއްޔާ އަޅުގަނޑުމެންގެ ފެށުން މިއައީ ވަރަށް ކާމިޔާބުކޮށް. ކުރިއަށް އޮތް ދެ ސިޓީ، ޝަންހާއި އަދި ބެއިޖިން އަށްވެސް ގާތްގަނޑަކަށް މިހާރު އެހެރީ ފުލްވެފައި ހުރިހާ ފްލައިޓެއް " ސަލީމް ވިދާޅުވިއެވެ.

Passengers on our inaugural flight from Chengdu were welcomed with traditional Boduberu beats and flowers, showcasing the unique Maldivian hospitality that awaits every traveler. #Maldivianaero #Maldives #China #chengdu pic.twitter.com/zXp10bDIOl

— MaldivianAero (@MaldivianAero) January 23, 2025

މިދަތުރުތައް ފެށުމާއި ގުޅިގެން ފަތުރުވެރިކަމާއި ބެހޭ ވަޒީރު ފައިސަލް ވަނީ މިދަތުރުތަކުގެ ސަބަބުން ފަތުރުވެރިކަމަށް ކުރިއެރުންތަކެއް ލިބިގެންދާނެ ކަމަށް ވިދާޅުވެފައެވެ. މިގޮތުން ޗައިނާ މާކެޓުން އެކަނިވެސް މިދަތުރުތަކާއެކު 40،000 ފަތުރުވެރިން އަންނާނެ ކަމަށް ވަޒީރު ވިދާޅުވިއެވެ.

"މިދިޔަ އަހަރު އެކަނިވެސް ޗައިނާ މާކެޓުން 270،000 ވަރަކަށް ފަތުރުވެރިން ރާއްޖެ އައިސްފައިވޭ. މޯލްޑިވިއަންއިން ވިދާޅުވެފައިވަނީ މި ދަތުރުތަކާއިއެކު 40،000 ފަތުރުވެރިން އަހަރެއް މައްޗަށް ގެނެވޭނެ ކަމަށް. މީގެ އިތުރުން ޔޫރަޕަށް ދަތުރު ފެށުމަށް އިތުރު ބޯޓެއް ގެންނަވާނެ ކަމަށް ރައީސުލްޖުމްހޫރިއްޔާ ވަނީ އިއުލާން ކުރައްވާފައި. މިއީ ފަތުރުވެރިކަން އިތުރު ހަރުފަތަކަށް ގެންދިއުމަށް، ލިބުނު ކުރިއެރުމެއް." ވަޒީރު ފައިސަލް ވިދާޅުވިއެވެ.

މޯލްޑިވިއަންގެ ވައިޑް ބޮޑީ އޮޕަރޭޝަން ޗައިނާއަށް ފެށުމާއި ގުޅިގެން، ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވިދާޅުވީ ޤައުމީ އެއަރރަލައިން ގައި މި ދަތުރުތައް ފެށުމަކީ ލިބިގެންދާ ޝަރަފެއް ކަމަށެވެ. އަދި މިކަމުގެ ސަބަބުން ރާއްޖޭގެ އިޤްތިޞާދަށާއި ފަތުރުވެރިކަމަށް ފައިދާކުރާނެ ކަމަށް ވަޒީރު ވިދާޅުވިއެވެ.

"މިކަމުގެ ސަބަބުން އަޅުގަނޑު ޔަޤީންކުރަން އަދި ދިވެހި ރައްޔިތުންނަށް ދަންނަވަން ބޭނުންވާ ވާހަކަ އަކީ މިއީ ވަރަށް ބޮޑަށް ފަތުރުވެރިކަމާއި އިޤްތިޞާދަށް ފައިދާކުރާނެ ކަމެކޭ. އަދި މިއީ އެންމެންނަށް ލިބޭ ޝަރަފެއް. އަޅުގަނޑު ޤަބޫލުކުރާ ގޮތުގައި މި އޮޕަރޭޝަންތަކާއި އެކު ޤައުމީ އެއަރލައިން ދާނީ ކުރިއަށް. ރައީސް އިއުލާންކުރައްވާފައިވާ ގޮތަށް ދެވަނަ ބޯޓު ގެނައުމުގެ މަސައްކަތްވެސް ދަނީ ކުރިއަށް." ވަޒީރު އަމީން ވިދާޅުވިއެވެ.

އިޤްތިޞާދީ ވަޒީރު މުހައްމަދު ސައީދުވެސް ވަނީ މިދަތުރުތަކުގެ ސަބަބުން ފައިދާކުރާނެ ކަމަށް ވިދާޅުވެފައެވެ. އެގޮތުން ދިވެހި ދިދަ ޖެހި ކެރިއަރ އެންމެ ބޮޑު މާކެޓަށް ދަތުރުކުރުމަކީ ޝަރަފެއްކަން ވަޒީރު ސަޢީދުވެސް ފާހަގަކުރެއްވިއެވެ.

"ދިވެހި ރާއްޖޭގެ ދިވެހި ދިދަ ފްލެގްޝިޕް ކެރިއަރ ގައި މީހުން އުފުއްލާތަން ފެނުމަކީ ޝަރަފެއް. އެއާއިއެކު ބޭރުފައިސާ އާމްދަނީވެސް އިތުރުވާނެ ދޮރެއް ހުޅުވިގެން އެދިޔައީ" ވަޒީރު ސަޢީދު ވިދާޅުވިއެވެ.

މޯލްޑިވިއަންގެ ވައިޑް- ބޮޑީ އެއަރކްރާފްޓުގެ ދަތުރުތައް ފެށުމަކީ އިޤްތީޞާދީ ގޮތުން ކަމަށް ޤައުމަށް ބޮޑު ފައިދާއެއް ކުރާނެ ކަމެއްގެ ގޮތުގައި ސަރުކާރުން ވަނީ ވިދާޅުވެފައެވެ.

މޯލްޑިވިއަންގެ ދަތުރުތައް، ޗައިނާއަށް ފަށާފައިވާއިރު ފުރަތަމަ ދަތުރުކޮށްފައިވަނީ ޗެންޑޫއަށެވެ. ދެވަނަ ދަތުރު ޗައިނާގެ ބެއިޖިންގ އަށް މިމަހުގެ 24 ވަނަ ދުވަހު ކުރާނެވެ. އަދި ޝެންހާއިއަށް މިމަހުގެ 27 ވަނަ ދުވަހު ދަތުރުކުރާނެއެވެ.