ފަލަސްޠީނުގެ ޣައްޒާގައި ހިންގި ޤަތުލުޢާންމުތައް ހުއްޓައިލުމާ އެކު ހުޅަނގު އައްސޭރީގައި ޔަހޫދީ ފައުޖުގެ އަނިޔާވެރިކަން އިތުރުކޮށް، އެތަނުގައި ބޭނުންކުރަމުންދަނީ ޣައްޒާއިން ދަސްވި އުކުޅުތައް ކަމަށް ޔަހޫދީންގެ ދިފާޢީ ވަޒީރު ބުނެފިއެވެ.
އަސްކަރީ ހެލިކޮޕްޓަރުތަކުގެ އެހީތެރިކަމާ އެކު ޔަހޫދީ ފައުޖުގެ ނިރުބަވެރި ސިފައިން ވަދެފައި ވަނީ ހުޅަނގު އައްސޭރީގައި ހުންނަ ޖިނީނާއި އެ ސަރަޙައްދުގައި ހުންނަ ރެފިއުޖީ ކޭމްޕަށެވެ. މިއީ، ހުޅަނގު އައްސޭރީގައި ހަރަކާތްތެރިވާ މުޖާހިދުންގެ ޖަމާޢަތްތައް ނައްތައިލުމުގެ ނަމުގައި ޔަހޫދީން ފަށާފައިވާ ޤަތުލުޢާންމެކެވެ.
އިއްޔެއިން ފެށިގެން ހުޅަނގު އައްސޭރީގައި ހިންގަމުންދާ ރަހުމްކުޑަ ޢުދުވާނުގައި، މިހާތަނަށް 10 މީހަކު ވަނީ ޝަހީދުކޮށްލައިފައެވެ.
ޔަހޫދީންގެ ދިފާޢީ ވަޒީރު އިސްރާއީލް ކަޓްޒް ބުނީ، ޔަހޫދީ ފައުޖުގެ ނިރުބަވެރި ސިފައިން ހުއްޓުމެއްނެތި ހުޅަނގު އައްސޭރީގެ އެކި ސަރަޙައްދުތަކަށް ޙަމަލާތައް ދެމުންދަނީ، ޣައްޒާއިން ދަސްވި އުކުޅުތަކުގެ އަލީގައި ކަމަށެވެ.
ޖިނީނަކީ ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޖަމާޢަތްތައް ކަމުގައިވާ ޙަމާސާއި އިސްލާމިކް ޖިހާދުގެ މުޖާހިދުން ހަރަކާތްތެރިވާ ރަށެކެވެ. ޔަހޫދީ ފައުޖުން ޖިނީނަށް އަރައި ލާއިންސާނީ ޖަރީމާތައް ހިންގަން ފެށުމާ އެކު، ޙަމާސުން ވަނީ ޔަހޫދީންގެ ނިރުބަވެރި ސިފައިންނާ ކުރިމަތިލުމަށް އެ ޖަމާޢަތުގެ މުޖާހިދުންނަށް އަމުރު ކޮށްފައެވެ. ޔަހޫދީ ފައުޖުގެ ސިފައިން ޖިނީނަށް އަރައިގަތުމާ އެކު، އެ ސަރަޙައްދުގައި އަމަން ބަލަހައްޓަމުން ދިޔަ ފަލަސްޠީނުގެ ސަލާމަތީ ބާރުގެ ސިފައިން ވަނީ އެ ސަރަޙައްދު ދޫކޮށް ގޮސްފައެވެ.
ޔަހޫދީ ސިފައިން ހުޅަނގު އައްސޭރީގައި ޢުދުވާން ހިންގަން ފަށާފައި މި ވަނީ، ޣައްޒާގެ މުސްލިމުންގެ ނަސްލުހޭދު ކުރަން ހިންގަމުން ދިޔަ ލާއިންސާނީ ޖަރީމާތައް 15 މަހަށް ފަހު މެދުކަނޑައިލާފައިވާ ދަނޑިވަޅެއްގައެވެ. 2023 އޮކްޓޫބަރު 7ގައި ފެށި ޖަރީމާތައް މެދުކަނޑައިލާފައި ވަނީ ޖަނަވަރީ 19ވަނަ ދުވަހު، ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީންނާ ދެމެދު އަމަލު ކުރަން ފެށި ސުލްޙައިގެ އެއްބަސްވުމެއްގެ ދަށުންނެވެ.
ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންުޔާހޫގެ އަމުރަށް ޔަހޫދީ ސިފައިން ހުޅަނގު އައްސޭރިއަށް އަރައި ޢުދުވާންތައް ހިންގަން ފަށާފައި ވަނީ، ޔަހޫދީންގެ އެންމެ ބޮޑު އެއް މަދަދުގާރުގެ ގޮތުގައި ބެލެވޭ ޑޮނަލްޑް ޓްރަމްޕް އެމެރިކާގެ 47ވަނަ ރައީސް ކަމުގެ މަޤާމުގެ ހުވައި ކުރައްވައި، އެ މަޤާމާ ޙަވާލުވެ ވަޑައިގެންނެވިތާ އެއް ދުވަސް ފަހުންނެވެ. ވެރިކަމާ ޙަވާލުވެ ވަޑައިގަތުމަށް ފަހު އޭނާ އެންމެ ފުރަތަމަ ވެސް ނިންމެވި އެއް ނިންމެވުމަކީ، ފަލަސްޠީނުގެ ރައްޔިތުންނާ ދެކޮޅަށް ލާއިންސާނީ އަދި ނިރުބަވެރި ޙަމަލާތައް ދެމުންދާ ހައްދުފަހަނަ އެޅި ޔަހޫދީންނާ ދެކޮޅަށް އެމެރިކާގެ ކުރީގެ ސަރުކާރުން އަޅާފައިވާ ދަތި ކުރުމުގެ ފިޔަވަޅުތައް އުވައިލެއްވުމެވެ.
ހުޅަނގު އައްސޭރިއަކީ 1967ވަނަ އަހަރު ޔަހޫދީން ފޭރިގަނެފައިވާ ފަލަސްޠީނުގެ ބިމެކެވެ. ހުޅަނގު އައްސޭރީގައި ދިރިއުޅޭ 2.7 މިލިޔަން މީހުންގެ މައްޗަށް ޔަހޫދީން ހިންގަމުން ދަނީ އިސްތިޢުމާރީ ވެރިކަމެކެވެ. އެ ސަރަޙައްދުގައި 700,000އެއްހާ ޔަހޫދީ ވަޒަންވެރިން ވެސް ދިރިއުޅެއެވެ. އެ ސަރަޙައްދުތަކުގައި ޔަހޫދީން ވަޒަންވެރި ކުރުވާފައި ވަނީ ބައިނަލްއަޤުވާމީ ޤާނޫނުތަކާ ޚިލާފަށެވެ.