ރައީސުލްޖުމްހޫރިއްޔާ ރ. މާކުރަތަށް ވަޑައިގެންފި، މިއީ ދަތުރުގެ ފަހު މަންޒިލް
-
އެމަނިކުފާނު ވަނީ މާކުރަތުގެ އިތުރުން އެ އަތޮޅުގެ އިތުރު 10 ރަށަކަށް ވަޑިގެންފައި
-
އެ ރަށު ކައުންސިލް އަދި ފުލުސް ސްޓޭޝަން އައު އިމާރާތުގެ ބިންގާ އެޅުމަށް ވަނީ ހަމަޖެހިފައި
ރައީސުލްޖުމްހޫރިއްޔާ ޑރ.މުހައްމަދު މުޢިއްޒު މާޅޮސްމަޑުލު އުތުރުބުރީގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރ. މާކުރަތަށް ވަޑައިގެންފިއެވެ. މިއީ މި ދަތުރުފުޅުގެ އެންމެ ފަހު މަންޒިލެވެ.
ވިއްސާރަ ވަގުތެއްގައި އެމަނިކުފާނު މާކުރަތައް ވަޑައިގެންނެވިނަމަވެސް، އެމަނުކުފާނަށް މަރުޙަބާ ދެންނެވުމަށް ރަށުގެ ގިނަ ޢަދަދެއްގެ ރައްޔިތުން ރަށުގެ ބަނދަރު ސަރަޙައްދަށް ނިކުމެފައިވެއެވެ.
ރައީސްގެ މި ދަތުރުފުޅަކީ ރައްޔިތުންގެ ހާލަތު ބައްލަވާލެއްވުމާއި އަދި ރަށްރަށުގެ ތަރައްޤީއަށް ކުރާ މަސަކަތްތަކަށް ރައްޔިތުންނާ ކައުންސިލްގެ ޚިޔާލު ހޯއްދެއްވުމަށް ކުރައްވަމުންދާ ދަތުރުފުޅެކެވެ.
މާކުރަށް ކުރައްވާ ދަތުރުފުޅުގެތެރެއިން އެ ރަށު ކައުންސިލް އައު އިމާރާތުގެ ބިންގާ އެޅުމަށް ވަނީ ހަމަޖެހިފައެވެ. މީގެ އިތުރުން އެރަށުގައި ފުލުހުން ޚިދުމަތް ދިނުމަށް ބޭނުންވާ އިމާރާތުގެ ބިންގާ އެޅުމަށް ވަނީ ހަމަޖެހިފައެވެ. އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ރަށުގެ ކައުންސިލާ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާ މުވައްސަސާތަކުގެ އިސް ވެރިންނާވެސް ބައްދަލުކުރައްވައެވެ. މީގެއިތުރުން ރަށުގެ ރައްޔިތުންނާ ރައީސުލްޖުމްހޫރިއްޔާ ބައްދަލުކުރައްވާނެއެވެ.
ރައީސްގެ މި ދަތުރުފުޅުގެ ތެރެއިން ރައްޔިތުންނާ ބައްދަލުކުރައްވާ، އެ ރަށްތަކުގައި ކުރިއަށްގެންދަވަން ރާވާފައިވާ ތަރައްޤީގެ މަސައްކަތްތަކާ ގުޅޭ މަޢުލޫމާތު ދަނީ ޙިއްސާކުރައްވަމުންނެވެ.