ވަކިވަކި ސިނާޢަތްތަކަށް އަމާޒުކޮށް، ޓެކްސް ދައްކާ މިންވަރު އިތުރުކުރުމަށް ހަރަކާތްތަކެއް ފަށަނީ

ވަކިވަކި ސިނާޢަތްތަކަށް އަމާޒުކޮށް، ޓެކްސް ދައްކާ މިންވަރު އިތުރުކުރުމަށް ހަރަކާތްތަކެއް ފަށަން ދައުލަތުގެ ޓެކްސް އިދާރާ، މީރާއިން ނިންމަވައިފިއެވެ.

މީރާއިން މިގޮތަށް ނިންމަވާފައިވަނީ އެ އޮތޯރިޓީން އާންމުކޮށްފައިވާ 2025-2026ގެ 'ކޮމްޕްލަޔަންސް އިމްޕްރޫވްމަންޓް ޕްލޭން'ގެ ތެރެއިންނެވެ. މި ޕްލޭނަކީ މީރާއިން ކޮންމެ ދެ އަހަރަކުން އެއް އަހަރު އާންމުކުރާ ޕްލޭނެކެވެ.

ކުރިއަށް އޮތް ދެ އަހަރަށް ކަނޑައެޅި ކޮންޕްލަޔަންސް އިމްޕްރޫވްމަންޓް ޕްލޭންގައި ރާވާފައިވާ ހަރަކާތްތައް އަމާޒުކޮށްފައިވަނީ ޓެކްސް ދައްކާ ފަރާތްތަކުގެ ސައްހަ އަދި އަދާހަމަ ރަޖިސްޓްރީއެއް ބެލެހެއްޓުމާއި، ސުންގަޑިއަށް ބަޔާން ހުށަހަޅާ މިންވަރު އިތުރުކޮށް، ހުށަހަޅާ ބަޔާންތަކުގެ ފުރިހަމަކަން ކަށަވަރުކުރުމާއި، ސުންގަޑިއަށް ފައިސާ ދައްކާ މިންވަރު އިތުރުކުރުމާއި، ޓެކްސްގެ ގޮތުގައި ދައްކަންޖެހޭ ސައްހަ އަދަދު ރިޕޯޓުކުރުމުގެ މައްޗަށް ބިނާކޮށް ކަމަށް މީރާއިން ވިދާޅުވެއެވެ. އަދި މި ކޮމްޕްލަޔަންސް އިމްޕްރޫވްމަންޓް ޕްލޭން އެކުލަވާލާފައިވަނީ ވަކިވަކި ސިނާއަތްތަކުން ޓެކްސް ދެއްކުމުގައި ހުރި ރިސްކުތަކާއި އެ ރިސްކުތަކާ މުނާސަބު ފިޔަވަޅު އެޅުމަށް ހިންގޭނެ ހަރަކާތްތައް ހިމަނައިގެން ކަމަށްވެސް މީރާއިން ވިދާޅުވިއެވެ.

ކުރިއަށްއޮތް ދެ އަހަރުގެ ކޮމްޕްލަޔަންސް އިމްޕްރޫވްމަންޓް ޕްލޭންގެ ދަށުން ވަކިވަކި ދާއިރާތަކަށް އަމާޒުކޮށް ރަޖިސްޓްރީކުރުވުމުގެ ޕްރޮގްރާމުތައް ހިންގޭނެ ކަމަށްވެސް މީރާއިން މައުލޫމާތުދެއްވައެވެ. އަދި އެހެން އަހަރުތަކާ އެއްގޮތަށް ސިލްސިލާކޮށް ހޭލުންތެރިކުރުމުގެ ސެޝަންތައް ކުރިއަށް ގެންދިއުމާއި، ޓެކްސް ދައްކާ ފަރާތްތަކަށް ދުރާލައި ޓެކްސްއާ ގުޅޭ ސުންގަޑިތައް ހަނދާން ކޮށްދިނުންވެސް މިހަރަކާތްތަކުގެ ތެރޭގައި ހިމެނެއެވެ.

މީގެއިތުރުން ޓެކްސް ދައްކާ ފަރާތްތައް ޓެކްސްއާ ގުޅޭ އިލްތިޒާމްތައް ފުރިހަމަކުރަމުންދާ މިންވަރު ގަވާއިދުން މޮނިޓަރކުރުމާއި، ދައްކަންޖެހި ނުދައްކާހުރި ފައިސާ ހޯދުމުގެ މަސައްކަތްތައް އިތުރަށް ހަރުދަނާ ކުރުމަށްޓަކައި އެންފޯސްމަންޓް އުސޫލުތައް ވަރުގަދަކުރުމާއި، ޓެކްސްއަށް މަކަރު ހަދާ ފަރާތްތައް ދެނެގަނެ، އެ ފަދަ ފަރާތްތައް ހުއްޓުވުމަށް އެކަށީގެންވާ ފިޔަވަޅުތައް އެޅުންވެސް މި ޕްލޭންގައި ހިމެނޭކަމަށް މީރާއިން މައުލޫމާތުދެއްވައެވެ.

މި ކޮމްޕްލަޔަންސް އިމްޕްރޫވްމަންޓް ޕްލޭންގައި، ސަރުކާރުގެ މުއައްސަސާތަކާއި، ތަންފީޒީ އިދާރާތައް އަދި ކަމާބެހޭ އެހެނިހެން މަސްލަހަތުވެރިންގެ މަޝްވަރާއާއެކު އެ ފަރަތާތްތަކާ ގުޅުންހުރި ސިނާއަތްތަކުގެ ރިސްކުތަކަށް ހައްލު ހޯދުމަށް އިސްކަން ދީފައިވެއެވެ. އަދި އެ ފަރާތްތަކުން މައުލޫމާތު ހޯދައި އެ މައުލޫމާތުގެ މައްޗަށް ބިނާކޮށް، ނޮން-ކޮމްޕްލަޔަންސް ދެނެގަނެ، އެކަން ހުއްޓުވުމުގެ މަސައްކަތްތައް ކުރިއަށް ގެންދާނެކަމަށްވެސް މީރާއިން މައުލޫމާތުދެއްވައެވެ.

މީރާގެ ކޮމްޕްލަޔަންސް ރިސްކް މެނޭޖްމަންޓް ޕޮލިސީއަކީ ޓެކްސްއާ ގުޅޭ އިލްތިޒާމްތައް އަދާކުރަން ލުއިފަސޭހަކޮށްދީގެން ޓެކްސް ދައްކާ ފަރާތްތަކުން އަމިއްލަ އިޚުތިޔާރުގައި ޓެކްސްގެ ޤާނޫނުތަކާއި ގަވާއިދުތަކަށް ތަބާވުން ނުވަތަ 'ވޮލަންޓްރީ ކޮމްޕްލަޔަންސް' އިތުރުކުރުމާއި، ތަންފީޒީ ފިޔަވަޅުތައް މެދުވެރިކޮށް ޓެކްސްގެ ޤާނޫނުތަކާއި ގަވާއިދުތަކަށް ތަބާނުވުން ނުވަތަ 'ނޮން-ކޮމްޕްލަޔަންސް' މަދުކުރުވުމުގެ މަގުސަދުގައި އެކުލަވާލާފައިވާ ޕޮލިސީއެކެވެ. މި ޕޮލިސީގެ މަގްސަދުތައް ހާސިލުކުރުމަށްޓަކައި 2020 ވަނަ އަހަރުން ފެށިގެން މީރާއިން ދަނީ ކޮމްޕްލަޔަންސް އިމްޕްރޫވްމަންޓް ޕްލޭނެއް ތައާރަފްކޮށް، އެ ޕްލޭންގެ ދަށުން ގިނަ ކޮމްޕްލަޔަންސް ހަރަކާތްތަކެއް ހިންގަމުންނެވެ.