މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ އަންހެން ސިންގަލްސް ބައިގެ ފައިނަލުގެ ޖާގައެއް މެޑިސަން ކީސް ހޯދައިފިއެވެ.
މެޑިސަން ކީސް މި މުބާރާތުގެ ފައިނަލުގެ ޖާގައެއް ހޯދާފައިވަނީ ދުނިޔޭގެ ރޭންކިންގެ ދެވަނައިގައި ހުރި ޕޮލެންޑްގެ އިގާ ސްވިއަޓެކް އާއި ދެކޮޅަށް ކުޅުނު މެޗު ވާދަވެރި ކުޅުމަކަށްފަހު ދެ ސެޓް އެއް ސެޓުންނެވެ މި މެޗުގެ ފުރަތަމަ ސެޓް ފަހެއް ހަތެއްގެ ނަތީޖާއަކުން ސްވިއަޓެކް ކާމިޔާބު ކުރި ނަމަވެސް ދެވަނަ ސެޓާއި ތިންވަނަ ސެޓު ހައެއް އެކެއް އަދި ހަތެއް ހައެއްގެ ނަތީޖާއަކުން ކީސް ވަނީ ކާމިޔާބުކޮށްފަ އެވެ.
ފަސް ފަހަރު މަތިން ގްރޭންޑް ސްލޭމް މުބާރާތް ކާމިޔާބުކޮށްފައިވާ ސްވިއަޓެކްގެ މައްޗަށް މެޑިސަން ކީސް މި ހޯދި ކާމިޔާބީ އާއިއެކު މިއީ އޭނާ މިފަދަ ބޮޑު މުބާރާތެއްގެ ފައިނަލުގައި ކުޅޭ ދެވަނަ ފަހަރެވެ.
މި މެޗުން ސްވިއަޓެކް ބަލިވުމާއެކު ދުނިޔޭގެ އެއްވަނަ އަންހެން ކުޅުންތެރިޔާގެ ގޮތުގައި ދެންވެސް ހުންނާނީ ބެލަރޫސްގެ އެރީނާ ސަބަލެންކާ އެވެ.
މެޑިސަން ކީސް މި މުބާރާތުގެ ފައިނަލުގެ ޖާގައެއް ހޯދާފައިވާއިރު، ފާއިތުވެދިޔަ ދެ އަހަރުވެސް އޮސްޓްރޭލިއަން އޯޕަން ޓެނިސް މުބާރާތް ކާމިޔާބު ކޮށްފައިވާ އެރީނާ ސަބަލެންކާ، މި މުބާރާތުގެ ފައިނަލަށް ނިކުންނާނީ 1997 އިން 1999 އާ ދެމެދު މާޓިނާ ހިންގިސްއަށް ފަހު ޖެހިޖެހިގެން މި މުބާރާތް ތިން ފަހަރު މަތިން ކާމިޔާބު ކުރާ ފުރަތަމަ ކުޅުންތެރިޔާއަށް ވުމުގެ އަމާޒުގައެވެ.