އިނގިރޭސި ޕްރިމިއަރ ލީގުގައި މިރޭ ޗެލްސީއާ ދެކޮޅަށް ކުޅޭ މެޗުގައި މެންޗެސްޓާ ސިޓީއާ އަލަށް ގުޅުނު ކުޅުންތެރިން ފެންނާނެ ކަމަށް ކޯޗު ޕެޕް ގާޑިއޯލާ ބުނެފި އެވެ.
މިހާރު ކުރިއަށްދާ ޖެނުއަރީ ޓްރާންސްފާ ބާޒާރުގަގައި ސިޓީން ވަނީ 123 މިލިއަން ޕައުންޑް ޚަރަދުކޮށް، ތިން ކުޅުންތެރިން ހޯދާފައެވެ. އެގޮތުން ބްރެޒިލްގެ ޒުވާން ޑިފެންޑަރު ވިޓާ ރެއިސް އާއި، އަބްދުކާދިރު ކުސަނޯފްގެ އިތުރުން މިސްރުގެ އުމަރު މަރްމޫޝް ވަނީ ސިޓީއާ ގުޅިފައެވެ.
ޕްރިމިއަރ ލީގުގެ ގަދަ ހަތަރެއްގެ ޖާގައެއް ހޯދުމަށް ޗެލްސީ އާއި ސިޓީން މަސައްކަތް ކުރަމުން އަންނައިރު، ލީގުގައި މިހާތަނަށް ކުޅުނު 22 މެޗުން ލިބިފައިވާ 40 ޕޮއިންޓާއެކު ޗެލްސީ އޮތީ ތާވަލުގެ ހަތަރުވަނައިގައެވެ. އަދި ސިޓީއަށް 22 މެޗުން ލިބިފައިވާ 38 ޕޮއިންޓާއެކު އެ ޓީމު އޮތީ ފަސްވަނައިގައެވެ.
ފާއިތުވެދިޔަ ހަތަރު އަހަރު ޕްރިމިއަރ ލީގު ކާމިޔާބުކޮށްފައިވާ ސިޓީއަށް މި ސީޒަނުގައި ލީގު ކާމިޔާބު ކުރުމަކީ ވަރަށް އުނދަގޫ އަދި ނާދިރު ކަމެކެވެ. އެއްވަނައިގައި އޮތް ލިވަޕޫލް އާއި އެ ޓީމާ ދެމެދު 12 ޕޮއިންޓުގެ ފަރަގެއް އެބައޮތެވެ.
ގާޑިއޯލާ ބުނެފައިވަނީ މީގެ ކުރިން ސިޓީއާ ދެކޮޅަށް ކޮންމެ ޓީމެއް ނިކުތް ނަމަވެސް، އެ ޓީމެއް ސިޓީ ދެކެ ޖެހިލުންވާ ކަމަށާއި، ނަމަވެސް މިހާރު އެ ވިސްނުމެއް އެއްވެސް ޓީމެއްގެ ނެތް ކަމަށެވެ. އަދި އެއީ ރަނގަޅު ކުރަން ބޭނުންވާ ކަމެއް ކަމަށާއި، އެކަން ރަނގަޅު ނުކޮށް ސިޓީއަށް ކުރިއަށް އޮތް ސީޒަނުގައި ޔުއެފާ ޗެމްޕިއަންސް ލީގުގެ ޖާގައެއް ލިބިގެން ނުދާނެ ކަމަށެވެ.
ޗެލްސީގެ ކޯޗު އެންޒޯ މަރެސްކާ ބުނެފައިވަނީ ސިޓީ ރަނގަޅު ފޯމެއްގައި މިވަގުތު ނެތް ނަމަވެސް، އެ ޓީމަކީ ބަލިކުރަން އުނދަގޫ ޓީމެއް ކަމަށެވެ. ޗެލްސީއަށްވެސް ލީގުގައި އެންމެ ފަހުން ކުޅުނު ހަ މެޗުގެ ތެރެއިން މޮޅުވެވިފައިވަނީ އެންމެ މެޗަކުންނެވެ.
މަރެސްކާ ވަނީ މީގެ ކުރިން ސިޓީގައި ގާޑިއޯލާގެ އެސިސްޓެންޓް ކޯޗެއްގެ ގޮތުގައި މަސައްކަތް ކޮށްފައެވެ.