އޮސްޓްރޭލިއަން އޯޕަން ޓެނިސް މުބާރާތުގެ ސިންގަލްސް ފިރިހެން އިވެންޓުގެ ޗެމްޕިއަންކަން އިޓަލީގެ ޔަނިކް ސިނާ ހޯދައިފި އެވެ.
ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާގެ ގޮތުގައި ހުރި ސިނާ މި މުބާރާތުގެ ޗެމްޕިއަންކަން ހޯދާފައިވަނީ ޖަރުމަނުގެ އެލެކްޒެންޑަރ ޒްވެރޭވް އާއި ދެކޮޅަށް ކުޅުނު މެޗު ސީދާ ދެ ސެޓުން ކާމިޔާބުކޮށްގެންނެވެ. މި މެޗުގެ ސެޓުތައް ސިނާ ގެންގޮސްފައިވަނީ ހައެއް ތިނެއް އަދި ހަތެއް ހައެއްގެ ނަތީޖާއަކުންނެވެ.
މި މެޗުން ޒްވެރޭވް ބަލިވެފައިވާއިރު މިއީ ގްރޭންޑް ސްލޭމްގެ ފައިނަލުން އޭނާ ބަލިވި ތިން ވަނަ ފަހަރެވެ.
އޮސްޓްރޭލިއަން އޯޕަން މުބާރާތް ކާމިޔާބު ކުރުމާއެކު ސިނާ ވަނީ މި މުބާރާތް ޖެހިޖެހިގެން ދެ ފަހަރު ކާމިޔާބުކޮށްފަ އެވެ. އަދި އޭނާ ވެފައިވަނީ ގްރޭންޑް ސްލޭމް ތިން މުބާރާތް ކާމިޔާބުކުރި އިޓަލީގެ ފުރަތަމަ ޓެނިސް ކުޅުންތެރިޔާ އަށެވެ. މީގެ ކުރިން މި ޝަރަފު ލިބިފައިވަނީ 60-1959 ވަނަ އަހަރު ދެ ގްރޭންޑް ސްލޭމް މުބާރާތް ކާމިޔާބުކުރި ނިކޮލާ ޕިއެޓްރަންގެލީ އަށެވެ.
މި މެޗަށްފަހު ވާހަކަ ދައްކަމުން ސިނާ ބުނެފައިވަނީ ކުރިއަށް އޮތް ތަނުގައި އޭނާގެ އެންމެ ބޮޑު މަސައްކަތަކަށް ވާނީ ކްލޭ ކޯޓުގައިވެސް ރަގަޅު ނަތީޖާތަކެއް ހޯދުން ކަމަށެވެ. އެގޮތުން މޮޅު ކުޅުންތެރިއެއް ކަމަށް ގަބޫލުކުރެވޭނީ ގްރާސް ކޯޓުގައި ހޯދާފަދަ ކާމިޔާބީއެއް ކްލޭ ކޯޓުގައިވެސް ހޯދުމުން ކަމަށެވެ.
ސިނާ އަށް މި ވަގުތު މުބާރާތް ތަކުގައި ވާދަކުރެވުނު ނަމަވެސް މިދިޔަ އަހަރު ހެދި ދެ ޑްރަގް ޓެސްޓަކުން ޕޮޒިޓިވް ވެފައިވާ މައްސަލައިގައި ވޯލްޑް އެންޓި ޑޯޕިން އެޖެންސީ އިން ހުށައަޅާފައިޥާ މައްސަލައިގެ އަޑުއެހުންތައް އަންނަ އެޕްރިލް މަހު ފެށުމަށް ހަމަޖެހިފައިވާއިރު މި މައްސަލައިގައި ސިނާ ކުށްވެރިވާ ކަމަށް ނިންމައިފިނަމަ އޭނާއަށް ދެ އަހަރު ދުވަހުގެ ސަސްޕެންޝަނަކާއި ކުރިމަތިލާން ޖެހޭނެ އެވެ.