ވެލެންސިއާ އަތުން ބާސެލޯނާއަށް ތަފާތު ބޮޑު މޮޅެއް

ސްޕެނިޝް ލަލީގާގައި ރޭ ވެލެންސިއާ އާއި ދެކޮޅަށް ބާސެލޯނާ ކުޅުނު މެޗު 7-1 ގެ ތަފާތު ބޮޑު ނަތީޖާއަކުން ބާސެލޯނާ މޮޅުވެއްޖެ އެވެ.

ބާސެލޯނާގެ ދަނޑުގައި ސާޅީސް ފަސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު ކާމިޔާބު ކުރުމާއެކު ލަލީގާގައި އެ ޓީމު އެންމެ ފަހުން ކުޅުނު ހަތަރު މެޗުންވެސް މޮޅުވެފައެއް ނުވެއެވެ. އެހެން ކަމުން މިއީ ލީގުގައި އެ ޓީމު އެންމެ ފަހުން ކުޅުނު ފަސް މެޗުގެ ތެރެއިން މޮޅުވި ފުރަތަމަ މެޗެވެ.

މި މެޗު ކާމިޔާބު ކުރުމާއެކު ބާސެލޯނާ އޮތީ 21 މެޗުން ލިބިފައިވާ 42 ޕޮއިންޓާއެކު ތާވަލުގެ ތިންވަނައިގަ އެވެ. ވާދަވެރި ރެއާލް މެޑްރިޑަށް 21 މެޗުން ލިބިފައިވާ 49 ޕޮއިންޓާއެކު އެ ޓީމު ތާވަލުގެ އެއްވަނައިގައި އޮތްއިރު ދެވަނައިގައި އޮތް އެތްލެޓިކޯ މެޑްރިޑަށް ލިބިފައިވަނީ 45 ޕޮއިންޓެވެ.

ބާސެލޯނާ އިން ތަފާތު މޮޅު ކުޅުމެއް ދައްކާފައިވާ މި މެޗުގެ ތިންވަނަ މިނިޓުގައި އެ ޓީމުގެ ފްރެންކީ ޑިޖޮންގް ވަނީ ލަނޑެއް ޖަހާ ވެލެންސިއާގެ ގޯލު ހުޅުވާލާފަ އެވެ. އަދި އޭގެ ފަސް މިނިޓު ފަހުން ފެރަން ޓޯރެޒް ވަނީ އިތުރު ލަނޑެއް ޖަހާފަ އެވެ.

ހެންސީ ފްލިކްގެ އިރުޝާދުގެ ދަށުން ކުޅެމުންދިޔަ ބާސެލޯނާ އިން މި މެޗުގައި ޖެހި ތިންވަނަ ލަނޑު މެޗުގެ 14 ވަނަ މިނިޓުގައި ރަފީނިއާ ކާމިޔާބުކޮށްދިން އިރު އޭގެ ދިހަ މިނިޓު ފަހުން ފާރމިން ލޯޕޭޒް ވަނީ އިތުރު ލަނޑެއް ޖަހާފަ އެވެ.

އަދި އޭނާ ވަނީ ފުރަތަމަ ހާފުގެ އިތުރު ވަގުތުގައި ލަނޑެއް ޖަހާ މެޗުގެ ނަތީޖާ 5-0 އަށް ބަދަލުކޮށްފަ އެވެ. މިއީ މިދިޔަ އަހަރުގެ މެއި މަހަށްފަހު ފާރމިން ގޯމޭޒް މެޗެއްގައި ދެ ލަނޑު ޖެހި ފުރަތަމަ ފަހަރެވެ.

މެޗުގެ ދެވަނަ ހާފުގެ ކުޅުން ފެށުނުތާ 14 ވަނަ މިނިޓުގައި ވެލެންސިއާގެ ހޫގޯ ޑޫރޯ ލަނޑެއް ޖަހާ އެ ޓީމަށް ކޮންމެވެސް ވަރެއްގެ އުންމީދެއް ގެނައި ނަމަވެސް އޭގެ ހަތް މިނިޓު ފަހުން ބާސެލޯނާގެ ފޯވަޑް ރޮބަޓް ލެވަންޑޯސްކީ ވަނީ ބަދަލު ކުޅުންތެރިއެއްގެ ގޮތުގައި ކުޅެން އަރާ އިތުރު ލަނޑެއް ކާމިޔާބުކޮށްފަ އެވެ. މިއީ މި ސީޒަނުގައި އޭނާ ޖެހި 17 ވަނަ ލަނޑެވެ.

ބާސެލޯނާ އިން މި މެޗުގައި ޖެހި ހަތްވަނަ ލަނޑަކީ ވެލެންސިއާގެ ސެޒާ ޓަރޭގާ އަތުން ބައިކޮޅަށް ވަދެފައިވާ ލަނޑެކެވެ.

މިއީ މިދިޔަ އަހަރުގެ އޮގަސްޓް މަހު ރެއާލް ވަޔަޑޮލިޑް އަތުން 7-0 ގެ ނަތީޖާއަކުން ބާސެލޯނާ މޮޅުވި ފަހުން އެ ޓީމަށް ލީގުގައި ހޯދިފައިވާ އެންމެ ތަފާތު ބޮޑު ނަތީޖާ އެވެ.

ވެލެންސިއާ އަތުން ތަފާތު ބޮޑު ނަތީޖާއަކުން ބާސެލޯނާ މޮޅުވެފައިވާއިރު މިދިޔަ ހަފްތާގައި ބާސެލޯނާ އިން ވަނީ ޔޫއެފާ ޗެމްޕިއަންސް ލީގުގައި ބެންފީކާ އާއި ދެކޮޅަށް ކުޅުނު މެޗު 5-4 ނަތީޖާއަކުން މޮޅުވެފަ އެވެ.

ހެންސީ ފްލިކްގެ އިރުޝާދުގެ ދަށުން ބާސެލޯނާ އިން ތަފާތު ބޮޑު ނަތީޖާތަކެއް ހޯދާފައިވާއިރު އެ ޓީމުން ވަނީ ހުރިހާ މުބާރާތެއްގައި ކުޅުނު 32 މެޗުގައި ޖުމްލަ 100 ލަނޑު ޖަހާ ޖުމްލަ 100 ލަނޑު އެންމެ އަވަހަށް ހަމަކުރި ދެވަނަ ކޯޗުގެ ޝަރަފު ހޯދާފަ އެވެ. މި ރެކޯޑްގެ އެއްވަނައިގައި އަދިވެސް އޮތީ 1959 ވަނަ އަހަރު 31 މެޗުން 100 ލަނޑު ހަމަކުރި ހެލެނިއޯ ހެރޭރާ އެވެ.