ޓްރާންސްފާ މާކެޓުގައި އަންހެން ކުޅުންތެރިން ގަނެވިއްކުމަށް ކުރި ހޭދަ މިދިޔަ އަހަރު ރެކޯޑް އަދަދަކަށް އުފުލިފައިވާ ކަމަށް ދުނިޔޭގެ ފުޓްބޯޅަ ޖަމިއްޔާ (ފީފާ) އިން ބުނެފި އެވެ.
އެ ޖަމާއަތުން ބުނީ މިދިޔަ އަހަރު އަންހެން ކުޅުންތެރިންނަށް ހޭދަކޮށްފައިވަނީ 15.6 މިލިއަން ޑޮލަރު ކަމަށެވެ. މިއީ މިހާތަނަށް ރެކޯޑެކެވެ.
މިއީ 695 ޓީމަކުން 2284 ޓްރާންސްފާ އެއް ކުރުމުން ހޭދަވި ފައިސާ އެވެ. ފީފާއިން ބުނީ ކުރީ އަހަރާ އަޅާ ބަލާއިރު އަންހެން ކުލަބުތަކުން ކުރި ހޭދަ 20 ޕަސެންޓް އިތުރުވެފައިވާ ކަމަށެވެ.
މިދިޔަ އަހަރުގެ ފާހަގަކޮށްލެވޭ ޓްރާންސްފާ ތަކުގެ ތެރޭގައި ބޭ އެފްސީ އިން ރެއާލް މެޑްރިޑަށް ގެންދިޔަ ޒެމްބިއާގެ ރަޗަލް ކުންޑަނަންޖީ އަކީ ފާހަގަ ކޮށްލެވޭ ކުޅުންތެރިއެކެވެ. މެޑްރިޑުން އޭނާ ގަތީ 787600 ޑޮލަރަށެވެ.
ފީފާއިން ބުނީ އަންހެން ކުޅުންތެރިން އަގު މިހާރު އަންނަނީ އުފުލެމުން ކަމަށާއި މީގެ ސަބަބަކީ އަންހެން ފުޓްބޯޅައިގެ ފޯރި ދުވަހެއް ދުވަހަކަށް އިތުރުވަމުން ދިއުން ކަމަށެވެ.