ފުލުހުންގެ ފުރިހަމަ ހިމާޔަތާއެކު އިދިކޮޅު އެމްޑީޕީން މާލޭގައި ހިނގާލުމެއް ބާއްވައިފި

ފުލުހުންގެ ފުރިހަމަ ހިމާޔަތާއިއެކު އިދިކޮޅު އެމްޑީޕީން މާލޭގައި އެއްވުމެއް ބާއްވައިފިއެވެ. ޚިޔާލުފާޅުކުރުމުގައި އެއްވެ އުޅުމުގެ ހައްގު ކޮންމެ ރައްޔިތަކަށްވެސް ލިބިދީފައިވާއިރު މިއީ މިފަހުގެ ތާރީޚެއްގައި ފުލުހުންގެ ފުރިހަމަ ހިމާޔަތާއެކު އެއްވެސް ހަމަނުޖެހުމެއް ކުރިމަތިލުމެއް ނެތި ސަރުކާރާއިމެދު ޝުއޫރު ފާޅުކުރުމުގެ ފުރުސަތު ލިބިގެން ގޮސްފައިވާ ފަހަރުކަން ފާހަގަކޮށްލެވެއެވެ.

ޤާނޫނުއަސާސީގެ 27 ވަނަ މާއްދާގައި ކޮންމެ ރައްޔިތަކަށްވެސް އިސްލާމްދީނުގެ އަސްލަކާއި ޚިލާފް ނުވާނެ ގޮތަކަށް ޚިޔާލުފާޅުކުރުމުގެ ހައްގު ލިބިދީފައިވެއެވެ. މަލްޓި ޕާޓީ ނިޒާމުގެ ތެރެއިން ރާއްޖޭގައި މިހާތަނަށް 4 ވެރިއެއްގެ ވެރިކަން ފެނިގެން ގޮސްފައިވާއިރު ކޮންމެ ވެރިކަމަކާއިމެދުވެސް ހިތްހަމަ ނުޖެހި އަޑު އުފުލާ ފަރާތްތަކެއް ތިބެއެވެ. ނަމަވެސް އެއްވެ އުޅުމާއި ޚިޔާލު ފާޅު ކުރުމަށް މާޒީގައި އެހާ ތަނަވަސް ފުރުސަތުތަކެއް ލިބިދީފައި ނުވެއެވެ.

މަލްޓި ޕާޓީ ނިޒާމުގެ ތެރެއިން މިހާތަނަށް ކުރެވިދިޔަ ވެރިކަން ތަކުގައި ފެނިގެންދިޔައީ ކަރުނަ ގޭހާއި، ޕެޕަރ ސްޕްރޭއާއި، މުގުރާއި، ފެން ލޮރީ ބޭނުންކޮށްގެން މުޒާހަރާތަކާއި އެއްވުންތައް ރޫޅާލައި ޑިމޮކްރަސީއާއި ބީރައްޓެހި އެތައް މަންޒަރެކެވެ. ނަމަވެސް ރައީސް ޑރ.މުހައްމަދު މުއިއްޒު ވެރިކަމާއި ހަވާލުވެ ވަޑައިގެން އެމަނިކުފާނު ވަނީ ޚިޔާލު ފާޅުކުރުމާއި ޝުއޫރު ފާޅު ކުރުމަކީ އެއްވެސް ރައްޔިތަކަށް ބަންދުވާނެ ފުރުސަތެއް ނޫންކަމަށް ތަކުރާރުކޮށް ވިދާޅުވެފައެވެ.

އިސްލާމްދީނާއި، ރާއްޖޭގެ ޤާނޫނުއަސާސީއާއި ގާނޫނުތަކާއި ޚިލާފުނުވާނަމަ ސަރުކާރާއި، އަދި ސަރުކާރުން ކުރާ ކަންކަމަށް ފާޑުކިޔައި ޚިޔާލު ފާޅުކުރުމުގެ ފުރުސަތު ދެއްވާނެކަމަށް އެމަނިކުފާނު ގެންދަވަނީ ތަކުރާރުކޮށް ވިދާޅުވަމުންނެވެ. އެކަން އެންމެ ރަނގަޅަށް ހާމަވެގެން ގޮސްފައިވަނީ މީގެ އެއްމަސް ދުވަސް ކުރިން އިދިކޮޅު އެމްޑީޕީން ވެރިކަން ކުރާރަށް މާލޭގަައި ބޭއްވުމަށް ނިންމައި ނިމިގެންދިޔަ ޖެނުއަރީ 31 ގައި ބޭއްވި ހިނގާލުމުންނެވެ. ޑިމޮކްރަސީގެ އަސާސްތަކާއި އެއްގޮތަށް ފުލުހުންގެ ފުރިހަމަ ހިމާޔަތުގައި މާލޭގެ އެންމެ ބޮޑެތި މަގުތަކުގައި ޚިޔާލުފާޅުކޮށް، ސަރުކާރަށް އިއްވަން ބޭނުންވާ އަޑުތައް އިއްވުމުގެ ފުރުސަތު ވަނީ ތަނަވަސް ކޮށްދެއްވާފައެވެ.

މިއީ ވޭތުވެދިޔަ 15 އަހަރުތެރޭގައި ވެރިކަންކުރާ ސިޓީގައި އިދިކޮޅު ފާޓީއެއްގެ ސުލްހަވެރި ހިނގާލުމަކަށް ފުލުހުންގެ ފުރިހަމަ އެއްބާރުލުން ލިބުނު އެއް ހިނގާލުމެކެވެ. މިހިނގާލުމުގައި ސަލާމަތީ ބާރުތަކުން ބާރުގެ ބޭނުންކޮށް، ހިނގާލުމަށް ހުރަސް އަޅައި ޚިޔާލު ފާޅުކުރުމަށް އޮތް ފުރުސަތު ހަނިކުރަން އެއްވެސް ކަމެއް ކޮށްފައި ނުވާކަން ފާހަގަ ކޮށްލެވެއެވެ. މިހިނގާލުން ކުރިއަށްދިޔަ ވަގުތު މަގުމަތީގެ ސަލާމަތާއި ރައްކާތެރިކަން ކަށަވަރުކޮށް، ޓްރެފިކް ބެލެހެއްޓުމުގެ ގޮތުން ފުލުހުންވަނީ ހަރަކާތްތެރިވެފައެވެ.

ދާދިފަހުން ހއ.އަތޮޅަށް ކުރެއްވި ދަތުރުފުޅުގައި ދިއްދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ޤާނޫނަކުން މަނާނުވާ ކޮންމެ ކަމެއް ކުރުމުގެ ޙައްގު ރައްޔިތުންނަށް އޮންނާނެ ކަމަށާއި މި ސަރުކާރުން ޤާނޫނުން ބޭރުން އެއްވެސް ކަމެއް ނުކުރައްވާނެ ކަމަށެވެ. އަދި އެމަނިކުފާނުގެ ކުރިފުޅުމަތީގައި ހުރިހާ ރައްޔިތުންނަކީވެސް ހަމަހަމަ ބައެއް ކަމަށާއި ޚިދުމަތް ދިނުމުގައިވެސް ޚިޔާލުތަފާތުވުމުގެ ސަބަބުން ތަފާތެއް ނުކުރައްވާނެ ރައީސް ވިދާޅުވިއެވެ.

"ކިތަންމެ އެއްޗެއް އަޅުގަނޑާ ދިމާލަށްވެސް ސަރުކާރާ ދިމާލަށްވެސް ކިޔުމަކީ މައްސަލައެއް ނޫން. އެހެން ނަމަވެސް މިއީ މާތްވެގެންވާ އިސްލާމްދީނުގެ މަތީގައި ގާއިމުވެފައިވާ ޤައުމެއް ވީމާ އަޅުގަނޑުމެންގެ މާތްވެގެންވާ އިސްލާމްދީނުގައި އޮންނަ ހަމަތައް އެއީ އެންމެންވެސް ގަބޫލުކުރަންޖެހޭނެ ކަންކަން. ރިވެތި އަޚްލާގު އިސްކުރަންޖެހޭނެ. ރިވެތި ބަހުރުވައިން ވާހަކަދައްކަންޖެހޭނެ. ކޮންމެ ރައްޔިތަކީވެސް ހުރުމަތްތެރިވެގެންވާ ރައްޔިތެއްކަން ގަބޫލުކުރަންޖެހޭނެ. ކޮންމެ މީހެއްގެވެސް އަބުރެއް އޮތްކަން ގަބޫލުކުރަންޖެހޭނެ،" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

މީގެ ކުރީގެ ވެރިކަންތަކުގައި ސަރުކާރާއި ދެކޮޅަށް ބޭއްވުނު އެއްވުންތަކުގައި އާންމުންނާއި ފުލުހުންނާއި ދެމެދު އެކިވަރުގެ ކުރިމަތިލުންތައް ހިނގައި، ޚިޔާލު ފާޅުކުމަށް ހުރަސް އަޅައި، ބާރުގެ ބޭނުންކޮށް އެއްވުންތަކާއި މުޒާހަރާތައް ރޫޅާލާފައިތަން ވަނީ ފެނިގެން ގޮސްފައެވެ. ނަމަވެސް މިސަރުކާރުގެ ސިޔާސަތަކީ ޚިޔާލްފާޅުކޮށް އެއްވެ އުޅުމުގެ ހައްޤު ފަހިކޮށް ދިނުންކަމުގައި ސަރުކާރުންވަނީ ބުނެފައެވެ.