ކުދި ޖަޒީރާ ޤައުމުތަކަށް ވިލުންތެރި މުސްތަޤުބަލެއް ހޯދޭނީ ބައިނަލްއަޤުވާމީ އެހީތެރިކަން ލިބިގެން: ވަޒީރު ޠާރިޤު
-
ދެމެހެއްޓެނިވި ގޮތެއްގައި ޤުދުރަތީ ވަޞީލަތްތައް ރައްކާތެރިކުރަން ރާއްޖެއިން އިސްކަންދޭކަން ވަޒީރު ފާހަގަކުރެއްވި
ރާއްޖެފަދަ ކުދި ޖަޒީރާ ޤައުމުތަކަށް ވިލުންތެރި މުސްތަޤުބަލެއް ހޯދޭނީ ބައިނަލްއަޤުވާމީ އެހީތެރިކަން ލިބިގެންކަމަށް ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ.
ވަޒީރު މިހެން ވިދާޅުވީ ޔުނައިޓެޑް އަރަބް އެމިރޭޓްސްގައި މިހާރު ކުރިއަށްދާ ވޯލްޑް ގަވަރމެންޓް ސަމިޓް 2025ގެ ޚަވާސާގައި ބޭއްވި ސަސްޓެއިނަބަލް ޑިވަލޮޕްމެންޓް ގޯލްސްއިން އެކްޝަން 2025 ޕެނަލް ޑިސްކަޝަންގައި ބައިވެރިވެވަޑައިގަތުމަށްފަހު ސޯޝަލް މީޑިޔާގައި ހިއްސާކުރެއްވި ޕޯސްޓެއްގައެވެ.
ޕެނަލް ޑިސްކަޝަންގައި ދެއްކެވި ވާހަކަފުޅުގައި ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހިމް ވިދާޅުވީ މޫސުމީ ބަދަލުތަކާއި ދެކޮޅަށް ވީހާވެސް އަވަހަށް ފިޔަވަޅުތައް އަޅަންޖެހޭކަމަށެވެ. އަދި އެންމެ ބޮޑަށް މޫސުމީ ބަދަލުތަކުން ލިބޭ ގެއްލުންތަކަށް ނާޒުކު ޤައުމުތަކަކީ ތަރައްޤީވަމުން އަންނަ ކުދި ޖަޒީރާ ޤައުމުތައްކަން ފާހަގަކުރައްވަމުން ވަޒީރު ވިދާޅުވީ ދިމާވާ ދަތިތަކާއެކުވެސް މޫސުމީ ބަދަލުތަކަށް ވިލުންތެރިވުމަށް ފުޅާ ދާއިރާއެއްގައި އެ ޤައުމުތަކުން މަސައްކަތްކުރަމުން އަންނަ ކަމަށެވެ.
ވަޒީރު ވިދާޅުވީ މޫސުމީ ބަދަލުތަކަށް ވިލުންތެރިވާނެ ގޮތަށް އިމާރާތްތައް ބިނާކުރުމާއި ދެމެހެއްޓެނިވި ގޮތެއްގައި ޤުދުރަތީ ވަޞީލަތްތައް ރައްކާތެރިކުރުމަށްވެސް ރާއްޖެއިން ޚާއްސަ އިސްކަމެއްދޭކަމަށެވެ. އެހެންނަމަވެސް މޫސުމީ ބަދަލުތަކަށް ވިލުންތެރި މުސްތަޤުބަލެއް، ރާއްޖެފަދަ ކުދި ޖަޒީރާ ޤައުމުތަކަށް ހޯދޭނީ ބައިނަލްއަޤުވާމީ އެހީތެރިކަން ލިބިގެންކަމަށް ވަޒީރު ވިދާޅުވިއެވެ.
At the SDGs in Action 2025 panel discussion held during the World Governments Summit, I noted the urgency of acting against climate change.
— Thoriq Ibrahim (@Thoriqibrahim) February 12, 2025
SIDS remain at the forefront of climate change, and despite the many challenges, continue to lead and take bold action against climate… pic.twitter.com/AcYVbT6HD1
ރާއްޖޭގައި ބިނާކުރެވޭ އިމާރާތްތަކަކީ މޫސުމީ ބަދަލުތަކަށް ވިލުންތެރިވާނެ ތަންތަންކަން ކަށަވަރުކުރުމަށް ސަރުކާރުން ވަނީ މަސައްކަތްތަކެއް ފަށްޓަވާފައެވެ. އެގޮތުން ރާއްޖޭގައި މޫސުމީ ބަދަލުތަކަށް ވިލުންތެރިވާނެ ގޮތަށް ގެދޮރު ބިނާކުރުމުގެ އިރުޝާދު ފޮތެއް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން އެކުލަވާލާފައިވެއެވެ. މި ފޮތުގައި ކާރިސާތަކާއި މޫސުމަށް އަންނަ ބަދަލުތަކުން ރައްކާތެރިކުރެވޭނެ ގޮތަށް ގެދޮރު ވަރުގަދަކުރުމަށާއި ކަރަންޓު ޚަރަދު ކުޑަވާނެ ގޮތަށް ތިމާވެއްޓާއި ރައްޓެހި ތަކެތި ބޭނުންކުރުމަށް އިރުޝާދުދީފައިވެއެވެ.