މަންމައަށްޓަކައި

ގަޑިން މެންދަމު އަލިވެ 2 ޖަހަނީއެވެ. އެނދުގެ ދެފަރާތަށް ފުރޮޅި ފުރޮޅިއޮތް ނައިޒް އަށް އަދިވެސް އޮތީ ނިދޭގޮތް ނުވެފައެވެ. އާދައިގެ ކުޑަކުޑަ އެގޭގައި ވަނީ ހަމަ އެންމެ ދެ ކޮޓަރިއެވެ. ވާރޭކޮޅެއް ވެހިލައިފިނަމަ އެ ކޮޓަރިތަކަށް އޭގެ އަސަރު ނުކޮށެއް ނުދެއެވެ. ތެޅިގަލުން ރާނާފައިވާ އެގޭގެ ވަށައިގެން އެއްވެސް ފާރެއް ނެތެވެ. ކަޅުފޮއި އެރޭގެ އަނދިރިކަމުގެ ތެރެއިން އަޑަކަށް އިވެނީ ހަމައެކަނި ރޭގޮވާ ފަނީގެ ބާރު އަޑެވެ. ފަތިސް ގަޑިއަށް ނުވިއެއް ކަމަކު ކޮވެލިތަކުގެ ހިތްގައިމު ރާގުން މެންދަމުގެ ހިމޭންކަން ވަނީ ނަގާލާފައެވެ. އަވަށުތެރޭގައިވާ އެހެން ގެތަކާއި ޚިލާފަށް އެގެއަކީ ފުދޭވަރަކަށް ވަލުތެރެއާއި ކައިރި ހިސާބެއްގައިވާ ގެއެކެވެ.
ގްރޭޑް 10 ގައި ކިޔަވަމުންދާ ނައިޒް އަށް އަދިވެސް އޮތީ ނިދޭގޮތް ނުވެފައެވެ. އޭނާ ކޮންމެ ރެއަކުހެން ބޭނުންކުރަމުންދާ ފޭސްބުކާއި ސްނެޕްޗެޓް އަދި އިސްޓަގްރާމަށް ނުވަދެވޭތީ އޭނާގެ ހިތަށް ހަމަޖެހުމެއް ނުލިބިގެންނެވެ. ގްރޭޑް 10ގެ ފަހު ދުވަސްތަކޮޅަށްވާތީ އޭނާގެ މައިންބަފައިން ވަނީ އޭނާއަށް ފޯނު ދިނުން މަޑު ޖައްސާލާފައެވެ. އެއީ އެދެމަފިރިންގެ ހުރި ހަމައެކަނި ދަރިފުޅެވެ. ފަގީރު އާއިލާއެއްކަމުން އެތަކެއް ބުރަ މަސައްކަތެއްކޮށް އެދެމީހުންގެ ދަރިފުޅު ރަނގަޅު މަގުން ގެންގޮސް ރަނގަޅު ތައުލީމެއް ދެވޭތޯ އެ ދެމަފިރިން ވަރަށް މަސައްކަތް ކުރެއެވެ. ނަމަވެސް އެއާއި ޚިލާފަށް ނައިޒްގެ ކިބައިގައި ކިޔެވުމުގެ ބައި އެމީހުން އުންމީދުކުރާ ވަރާއި ގާތަށްވެސް ނެތެވެ. ދުވާލު ވަގުތުގައި ގިނައިން ފޯނު ބޭނުންކޮށްގެން ގޭމުކުޅުމާއި ރައްޓެހި ކުދިން އެއްވެ، ގަނޑަށް އެރުމަކީ އެކުދިންގެ ކިބައިގައި ކިޔެވުމަށްވުރެ ބޮޑަށް އަށަގަނެފައިވާ ގޯސް އަމަލެކެވެ. އޭނާގެ މަންމަ ވަދީފާ ކޮންމެ ނަސޭހަތެއް ދިނަސް އަޑުވެސް އަހާނުލައެވެ. ނަމަވެސް އޭނާގެ ބައްޕަ ދެކެ އޭނާ އަބަދުވެސް ޖެހިލުންވެއެވެ.
ނިދަން އުޅެ އުޅެ ނުނިދުމުން ނައިޒް އޭނާ ކޮޓަރިން ބޭރަށް ނުކުތެވެ. މަޑު މަޑު ވައިރޯޅިތައް އައިސް އޭނާގެ މޫނުގައި ބީހިލުމާއެކު، ހިތަށް ކުޑަވަރެއްގެ ހަމަޖެހުމެއް ލިބުނެވެ. އޭނާ މަޑުމަޑު ހިނގުމެއްގައި ގޮސް މަންމަމެން ތިބި ކޮޓަރީގެ ދޮރު ހުޅުވިއެވެ. އޭރު އަރާމް ނިންޖެއްގައި އެ ދެމީހުން ނިދާފައި ތިއްބެވެ. ނައިޒް ގޮސް އޭނާގެ މަންމަގެ ބާލީސް ދަށުން ފޯނު ނެގިއެވެ. މަންމައަށް އެކަން ރޭކާ ނުލާ ތަނުގައި ބައްޕައަށް ހިލަމެއް ވެސް ނުވެއެވެ. އޭނާ ސިއްރު ސިއްރުން އަވަހަށް ކޮޓަރިން ނުކުތެވެ. ފޯނު ލިބުމުން ހަގީގަތުގައި ވެސް އޭނާ ހުރީ އުފަލުން ފޮޅިފައެވެ.
އެނދުގައި ޖައްސާލުމަށްފަހު ނައިޒް ހަމަޖެހުމުގެ ނޭވާއެއް ދޫކޮށްލިއެވެ. ފޯނު ނެގުމަށްފަހު ކޯޑު ޖަހާލުމުންވެސް ފޯނު ހުޅުވޭ ގޮތެއް ނުވިއެވެ. އެކަމުގެ ސަބަބުން އޭނާގެ ރުޅި ދިޔައީ ގަދަވަމުންނެވެ. އެކި ގޮތްގޮތަށް ކޯޑު ޖަހަމުން ދިޔައިރުވެސް އޭނާގެ މަންމަމެން ޖަހާފައިވާ ކޯޑާ ދިމާވާގޮތެއް ނުވިއެވެ. އޭނާ ފުންކޮށް ވިސްނިއެވެ. ދެން ކަންތައް ކުރަންވީ ގޮތަކާ މެދުގައެވެ. އެހެނަސް މި ފުރަމެންދަމުގައި ގެއިން ބޭރަށް ދިޔުމުގެ ޚިޔާލެއް އޭނާ ނުގެން ގުޅެއެވެ. އަދިވެސް މަސައްކަތްކުރީ ކޯޑު ޖަހައިގެން ފޯނު ހުޅުވޭތޯއެވެ، އެހެން އުޅުމުގެ ތެރޭގައި އެކަން ކާމިޔާބުވެ އޭނާގެ ހިތަށް ތަސައްލީއެއް ލިބުނެވެ. އަވަހަށް އިސްޓަގްރާމަށް ވަދެ ބަލައިލީ އޮންލައިންގައި ނައިޒްގެ ގްރޫޕްގަނޑު ތިބިތޯއެވެ. އެމީހުން ހަދާފައިވާ ކުލާސް ގްރޫޕްގައި މަދީ އެންމެ ދެކުދިންނެވެ.
އަންނަމަހު ފަށާ ޖީސީއީ އޯލެވެލް އިމްތިހާނަށް ތައްޔާރުވުމަށް ނައިޒްވެސް ކޮންމެވެސް ވަރެއްގެ މަސައްކަތްތަކެއް ކުރެއެވެ. ނަމަވެސް ކިޔެވުމަށް ހޭދަކުރާ ވަގުތަށްވުރެ ރަށުތެރޭގައި އެނބުރޭ ވަގުތުތައް ގިނައެވެ. ގިނަ އެކުވެރިންތަކާއެކު މަޖަލާ ސަކަރާތުގައި ގިނަ ވަގުތު ދިޔައީ ހޭދަ ކުރަމުންނެވެ. އެކުވެރިންގެ ނަސޭހަތްތަކާ އެކުވެރި ގުޅުންތަކަށް އާބަސް ބުނަމުން ދިޔައީ އެ އެކުވެރިންނަކީ ހަޔާތުގައި މުހިންމު ބައެއް ކަމަށް އޭނާގެ ޒަމީރު ގަބޫލު ކުރާތީއެވެ. އަދި އެ އެކުވެރިންގެ ފަރާތުން ލިބޭ އެހީއާއި މަދަދަކީ މާދަމާއަށްވެސް މުހިންމު ކަމެއް ކަމަށް ދެކެމުންދާތީއެވެ.
ދުވަސްތައް މާޒީއާ އެކުވަމުންގޮސް، އޯލެވެލް އިމްތިހާނުގެ ނަތީޖާ ލިބުނު ދުވަހެވެ. ކިޔެވުމަށް މާބޮޑު ސަމާލުކަމެއް ނުދިންނަމަވެސް ނައިޒްވެސް ހަފޮޅުން އެތެރެވާވަރުވިއެވެ. މަޖުބޫރު 4 މާއްދާއިން ސީ ފާސް ލިބި ސްޓްރީމް އެއް މާއްދާއިން ޑީ ފާސް ލިބުނެވެ. ކިތަންމެ ދަށް ނަތީޖާއެއް ނަމަވެސް އޭލެވެލް އަށް ކިޔެވޭވަރަށް ފާސްވުމުން އޭނާގެ މައިން ބަފައިން ތިބީ އުފަލުންނެވެ.
މަތީ ސާނަވީ ތައުލީމު ހާސިލުކުރުމަށްޓަކައި ނައިޒް ބޭނުންވީ މާލެދާށެވެ. އުފަން ރަށުގައި އޭލެވެލް ހެދުމުގެ ފުރުސަތު އޮތް ނަމަވެސް މެއެވެ. ކިރިޔަ ކިރިޔާ އޯލެވެލްއަށް ފާސްވިކުދިންގެ ތެރޭގައި ނައިޒްއާ އެކު އޭނާގެ ބެސްޓީ ލާމިއުވެސް ހިމެނުނެވެ. ކިތަންމެ ދަށް ނަތީޖާއެއް ލިބުނު ކަމުގައިވިޔަސް ނައިޒްގެ މަންމައާއި ބައްޕަ ތިބީ އުފަލުންނެވެ. އެންމެ މުހިއްމު ދުވަސްތަކުގައިވެސް ކިޔެވުމަށް އެހާބޮޑު ޝައުގެއް ނުދީ އެހެން އުޅުމުންވެސް އޭލެވެލްއަށް ފާސްވީތީއެވެ. އިތުރަށް ކިޔެވުމަށް ނައިޒް މާލެދާން އެދުމުން އޭނާގެ މައިންބަފައިން ވަރަށް ކަންބޮޑުވިއެވެ. ރަށުގައި އެފުރުސަތު އޮއްވައި މިފަދަ ޒަމާނެއްގައި މާލެފަދަ ތާކަށް ދިޔުމަށް ނައިޒް ނިންމީތީއެވެ. އެދެމަފިރިން ވަރަށް ނަސޭހަތްވެސް ދިނެވެ. ނަމަވެސް ނައިޒް ބޭނުންވީ ހަމަ މާލެދާށެވެ. ދަރިފުޅާ! އައިސްބަލަ. ނައިޒް ގެއިން ނުކުމެ ހިނގައިގަންނަނިކޮށް އޭނާގެ ބައްޕަ ގޮވާލުމުން މަޑުކޮށްލިއެވެ.
ދަރިފުޅާ! އަދިވެސް ރަނގަޅަށް ވިސްނާލަބަލަ! ކީއްކުރަންތަ ރަށުގައި އިތުރަށް ކިޔެވެން އޮއްވާ މާލެދާން ތިއުޅެނީ؟ ބައްޕަމެންވެސް ހާދަ ބޭނުމޭ ބައްޕަމެން މުސްކުޅިވާ ދުވަހު ދަރިފުޅު ބައްޕަމެން ގާތު ހުންނަން. ދަރިފުޅު ދާ ވާހަކަ ބުނި ހިސާބުން ފެށިގެން މަންމަ އެ ވާހަކަ ނުވެސް ހުއްޓާ. އަބަދު ދެރަވެގެން އުޅެނީ. ރޭގަވެސް އެ ވާހަކަ ދައްކާފަ ވަރަށް ރުއި. އެކަމަކު ބައްޕާ! މާލެ ގޮސްގެން ކިޔަވާނަމަ ހާދަ މޮޅެއްވާނޭ. ބަލައްޗޭ އަޅުގަނޑު ކިޔަވައިގެން އައިސް ވަންނާނީ ސީދާ ރަށު ސްކޫލުގެ ޕްރިންސިޕަލަކަށް. އަޅުގަނޑު އެކަންޏެއް ނޫނޭ މާލެދަނީ. ލާމިއުއާ ރާއިފްއާ ލަސަންގެ އިތުރުން އަންމަޑޭވެސް ކިޔަވަން ދަނީ ހަމަ މާލެއަށް. ބައްޕާ ޕްލީޒް. އަޅެ މިކަމަށް އެއްބަސްވެދީބަލަ. އެހެން ބުނިތަނާހެން ނައިޒްގެ ބައްޕަ ހަލީމަށް ފޯނެއް އައެވެ. އެކޮޅުން ވާހަކަ ދެއްކީ އޭނާގެ އެއްބަނޑުގައި ހަމައެކަނި ހުރި ދައްތަ ހަލީމާއެވެ. އޭނާ ގުޅީ ނައިޒް އޭލެވެލްއަށް ފާސްވި ޚަބަރު ލިބިގެން އެކަމަށް މަރުހަބާ ކިޔައި އޭނާ މާލެއަށް ކިޔަވަން ފޮނުވަން އެދުމަށެވެ. ހަލީމާ ގާތުވެސް ހަލީމް ދެއްކީ އެވާހަކައެވެ. ނަމަވެސް ހުރިހާ ކަމެއް ރަނގަޅުވާނެކަމަށް ބުނެ އެންމެފަހުން ހަލީމް އެއްބަސް ކުރުވީއެވެ. ހިތާ ދެކޮޅަށް ނަމަވެސް ހަލީމްގެ ދައްތައަށް ކުރާ އިތުބާރާއެކު ދަރިފުޅުގެ އުފަލަށްޓަކައި އެއްބަސްވާން މަޖުބޫރުވީއެވެ.
ދުވަސްގަނޑަކަށްފަހު ކިޔެވުމުގެ ބާކީބައި ފުރިހަމަކުރުމަށްޓަކައި މާލެފުރުމުގެ ތައްޔާރީތައް ނައިޒްމެންވާން ފެށިއެވެ. އޭނާގެ ލޯބިވާ މަންމައާ ބައްޕަވެސް ދަތުރު ތައްޔާރުކޮށްދިނުމަށް ފޯރީގައި އުޅެމުން ދިޔައެވެ. އެދެމީހުން ދެކެމުންދާ ހުވަފެންތަކުގައި ހަގީގީ ކުލަ ޖައްސައިދޭނެ ދަރިއަކަށް ނައިޒް ވުމަކީ އެދެމަފިރިން އަބަދުހެން ކުރާ އުއްމީދެކެވެ. ދުޢާއެކެވެ. ކޮންމެއަކަސް ނައިޒްގެ އަންނައުނުތަކާ ކުޅެންދާ ބޫޓާއި ޖާޒީތަކާއި ޖެހެންދެން އޭނާގެ މަންމަ ފޮށްޓަށްލާ ތައްޔާރުކޮށްދިނެވެ. ޑިސެމްބަރުމަހު އޭނާގެ ބައްޕަ އުމުރާއަށްދާން އެއްކޮށްފައި ހުރި ރުފިޔާގެ ތެރެއިން 15 ހާސް ރުފިޔާ ނައިޒްއަށް ދިނީ ބޮލުގައި ފިރުމާލުމަށްފަހުގައެވެ.
"ބައްޕާ! ދެން މިވަރަށް ރުފިޔާ ދިނީމަ ބައްޕަ ކިހިނެއް އުމުރާއަށް ދާނީ. މީ ހާދަ ބައިވަރެކޭ. އަޅުގަނޑު ވަރަށް ދެރަވޭ ބައްޕަ ބުރަކޮށް ކުރި މަސައްކަތުން ހޯދި ފައިސާ އަޅުގަނޑަށް ޚަރަދުކުރަން ޖެހޭތީ."
" ނޫނޭ ދަރިފުޅާ! ބައްޕަމެން މިހެން މިއުޅެނީ ހަމަ ދަރިފުޅުގެ ހައްގުގައޭ. ބައްޕަމެން އިތުރަށް މަސައްކަތްކޮށް އަނެއްކާވެސް ރުފިޔާ ހޯދާނީ. ދަރިފުޅު އެކަމާ ހާސްނުވޭ. ހިނގާ އަވަހަށް ސައިބޯން ދާން. އެގާރަގަޑި ބައިގަ ފެރީ އަންނަ ވާހަކަ އެބައޮތް ގްރޫޕުގަ ޖަހާފަ."
ސައިބޮއެ ނިމުމަށްފަހު އެންމެފަހުގެ ސަލާން ކުރުމަށްފަހު އެ ދެމީހުންނާ ވަކިވެލަމުން މަންމައާއި ބައްޕަދެކެ ވަރަށް ލޯބިވެޔޭ ބުނެ ފެރީއާ ދިމާލަށް ހިނގައިގަތެވެ. އޭނާ ފެރީއަށް އެރުމުގެ ކުރިން އެ ދެމީހުންވެސް ނަސޭހަތްތެރިވިއެވެ. ވިޔާނުދާކޮށް ނޫޅުމަށާއި ގެއިން ބޭރުގައި ވަގުތުތައް ހޭދަނުކުރުމަށާއި ދައްތަގެ ބަސްއެހުމަށާއި ތިޔަ ދެވެނީ މާލެކަން އެތައް ފަހަރަކު ހަނދާންކޮށްދިނެވެ. އަދި ވިޔާނުދާ ކުދިންނާ ގުޅިގެން ނޫޅުމަށާ ބަސްއަހައިގެން ކިޔެވުމަށް ތަކުރާރުކޮށް އެދެމުން ދިޔައެވެ. މިދަތުރުގައި ހަލީމަށް މާލެ ނުދެވި އޭނާ ބަލިކޮށް އުޅެންޖެހުމުގެ ސަބަބުންނެވެ.
ކިޔެވުމުގެ ދުވަސްތައް ފެށި އާ ރައްޓެހިން ލިބި މާލޭގެ ފެނަށް ނައިޒް ހޭނޭކަށް މާގިނަ ދުވަސްތަކެއް ނުނެގިއެވެ. ގިނަ ދުވަސްވާ ވަރަކަށް މާލެ ތެރެއަށް ފަރިތަވެ އެންމެ ފަހުން ސުކޫލަށް ދިއުންވެސް މަދުވާން ފެށިއެވެ. އެކަން އޭނާގެ ދައްތައަށް ރޭކާވެސް ނުލައެވެ. ސުކޫލުން ބައެއްފަހަރު ގުޅާއިރު ދައްތަ ފޯނު ނުނަގާތީ ޖަވާބު ލިބޭގޮތެއް ނުވެއެވެ. އެހެން އުޅެނިކޮށް އެއްދުވަހަކު އޮތް ޕޭރެންޓް މީޓިންއެއްގައި ޓީޗަރުން އެކަން ފާހަގަ ކުރިއެވެ. އެވަގުތު ހަލީމާގެ ދެލޮލުން ފާއްދާލީ ހިތާމައިގެ ކަރުނައެވެ. ނައިޒް މާލެ ގެނައިފަހުން އަދި މިއުޅެނީ ތިން މަސް ނުވެގެންނެވެ. މިހާ އަވަހަށް މިކަމުގައި ހަލީމާ ފެއިލް ވެއްޖެނަމަ ދެން ކަންތައް ވާނީ ކިހިނަކުން ބާވައެވެ. ހަލީމާ އުއްމީދު ކަނޑައެއް ނުލައެވެ. އިތުރަށް ނައިޒްއަށް ނަސޭހަތްދީ ކަންކަން ރަނގަޅުކުރަން ބާރު އެޅިއެވެ. ނައިޒްގެ ކިބައިގައި ހުންނަ ސިފަތަކަކީ ހަލީމްގެ ދެމަފިރިންގެ ފަރާތުން އެނގިފައިވާ ކަންކަން ކަމުގައިވާތީ އެކަމާ އެހާ ބޮޑަށް ވިސްނާކަށްވެސް ހަލީމާ ބޭނުމެއްނުވެއެވެ.
ދުވަސްތަކުގެ ތެރެއިން ދުވަހެކެވެ. ނައިޒްގެ މަންމަ އޭނާ ގެންގުޅޭ ގަހަނާ ދަޅު ނުފެނިގެން ހޯދަނީއެވެ. އޭގައި ރަން ކެވެއްޔާ ފަށާ އަނގޮޓިވެސް ހުންނާނެއެވެ. ނަމަވެސް ހޯދާ ހޯދާ ވެސް ނުފެނުނެވެ. ވަދީފާ ނައިޒްއަށް ގުޅާފައި އެވާހަކަ ދެއްކުމުންވެސް އެނގޭ ކަމަކަށް ނުހެދިއެވެ. ނަމަވެސް މާލެ ފުރި ދުވަހުގެ ކުރީދުވަހު ނައިޒް އައީ އޭނާގެ މަންމައަށް ސިއްރުން އޭތި ހިފައިގެންނެވެ. އެ ވިއްކާލުމަށްފަހު އޭގެ ފައިދާވެސް ނައިޒް މިހާރު ވަނީ ނަގާފައެވެ. އޭނާގެ ބައްޕަ އެހާ ގިނަ އަދަދެއްގެ ފައިސާ ދިންއިރުވެސް އޭނާގެ ހިތް ނުފުރުނީ ކީއްވެގެން ކަމެއް ނޭނގެއެވެ.
ނައިޒްއާއެކު ރަށުން މާލެ ކިޔަވަންދިޔަ ރައްޓެހިން ނައިޒްއަށް ވަރަށް ނަސޭހަތް ދެއެވެ. ކިޔެވުމަށް ހިތްވަރުވެސް ދެއެވެ. ގޯސް ގޮތްގޮތަށް ނޫޅުމަށް އެދި ލާމިއުމެން ރާއިފްމެން އަބަދުހެން ނަސޭހަތް ދެއެވެ. ކޮފީއިން ބައްދަލުވާ ކޮންމެ ފަހަރަކު އެންމެންވެސް ކިޔަނީ އެކައްޗެކެވެ. ކިޔަވާ ނިމި ކޯހެއް ހަދައިގެން ކޮންމެވެސް ވަޒީފާއެއް އަދާކުރުމަށް އެންމެން އެ އަޒުމުގައި ތިބުމަށް ވާހަކަ ދެކެވެއެވެ. ނައިޒް ކިޔެވުމަށް ފަރުވާ ކުޑަކުރާތީ އެކަމާ ހުރިހާ ކުދިން ވަރަށް ދެރަވެއެވެ. އެކި ކުދިން އެކި ސްކޫލްތަކުގައި އުޅުނަސް ނައިޒް އުޅޭގޮތް އެމީހުންނަށް އެނގެއެވެ. އޭނާއާ އެކީ އެއް ކުލާހެއްގައި ކިޔަވާ އަންމަޑޭވެސް އެތައް ނަސޭހަތެއް ނައިޒްއަށް ދެއެވެ. ނަމަވެސް އޭނާގެ އަމަލުތަކާ ވާހަކަތައް ހުންނަ ގޮތުން އެކަންކަން ރަގަޅުކުރާ ވިސްނުމެއް އޭނާގެ ހުންނަހެނެއް ހިއެއް ނުވެއެވެ.
ނައިޒް މާލެ އައިފަހުން އަހަރެއްވީއެވެ. ގްރޭޑް 11 ފާޑަކަށް ފުރިހަމަ ކުރުމަށްފަހު އޭނާ 12 ކިޔަވަން ޚިޔާލެއް ނުކުރިއެވެ. ސްކޫލަށް ދިއުން މުޅިންހެން ހުއްޓާލިއެވެ. އެކަން ރަށުގައި ތިބި އޭނާގެ މައިންބަފައިންނަށް އެނގުމުން އިންތިހާއަށް ވީ ދެރައެވެ. މީހަކުދޭ ނަސޭހަތަކުން އަޑުއަހާ ވަރަށްވުރެ އޭނާ އެހެރީ ގޯސްވެފައެވެ. މުޅި މާލެ ހިތުދަސްވުމުން އޭނާ އުޅެނީ އުޅޭނެ ގޮތަކަށެވެ. މުޅި މާލެތެރޭ އޭނާ އުޅެނީ ފާޑެއްގެ ގްރޫޕަކާ އެކީގައެވެ. ގެއަށް ނިދަންވެސް ދަނީ މަދު ރެއަކުއެވެ. މާލެތެރޭ ކުރާ ކޮންމެ ވައްކަމެއްގައި އޭނާގެ ބައިވެރިވުން އޮވެއެވެ. ފިހާރައެއް ފަޅާލިޔަސް މަގުމަތިންދާ މީހަކު އަތުން ފޭރުނަސް އޭނާ އެކަމުގައި ޝާމިލްނުވެއެއް ނުދެއެވެ. އޭނާއާ އެކީ އެއް ކުލާހެއްގައި އޭރު އުޅުނު 3 ކުއްޖަކުވެސް ހަމަ ދަނީ މި މަގުންނެވެ. ކިތަންމެ ފަހަރަކު ފުލުހުންގެ އިދާރާއަށްވެސް ހާޒިރު ކުރެވުނެވެ.
ނައިޒްގެ މި އަމަލުތަކުގެ ސަބަބުން އޭނާގެ އާއިލާއިން ވަރަށް ކަންބޮޑުވާން ފެށިއެވެ. މުސްކުޅި ވަމުންދާ އޭނާގެ މަންމައާ ބައްޕަ ހިތާމަނުކުރާ އެންމެ ދުވަހެއްވެސް ނުދެއެވެ. ޓީވީއިން ހަބަރު ބަލާ ގިނަ ފަހަރު އޭނާގެ ދަރިފުޅުގެ ޚަބަރު ނުކިޔާ ދަނީ މަދު ފަހަރަކުއެވެ. މުޅި ރަށުގައި ދެކެވެނީ އެވާހަކަތަކެވެ. ލަދުން ބޯހަލާކުވެ ގެއިން ބޭރަށް ނުކުތުމަށްވެސް އެ ދެމަފިރިން މިހާރު ވަނީ ނުކުޅެދިފައެވެ. ރޭތަކުން ރެއެކެވެ. ސްނެޕްޗެޓުން އައި ގްރޫޕް ރިކްއެސްޓެކެވެ. ނައިޒް އެ ރިކްއެސްޓް އެކްސެޕްޓް ކުރިއެވެ. އެއީ އޭނާއާ ގުޅޭ ގްރޫޕެއްކަން އެނގުނީ ފުލުފުލުގައި ސްނެޕް އަންނަން ފެށުމުންނެވެ. ޕާޓީކޮށް މަޖާނަގާ ގްރޫޕެކެވެ. މިކަންކަން ފެނި އޭނާއަކަށް ހިމޭނަކުން ނުހުރެވުނެވެ. އޭނާ ވަގުތުން އެދިމާއަށް ހިނގައިގަތެވެ. އެރޭގެ އުފަލާ މަޖަލާ ސަކަރާތުގައި އުޅުމަށްފަހު އޭނާއަށް ގެއަށް އާދެވުނުއިރު ފަތިހު 5 ޖަހަނީއެވެ. މުޅި މީހާ ހުރީ ހަމައަކު ނޫނެވެ. އެރޭ އެމީހުން އައީ އަންނަ ހަފްތާގައި ލަންކާއަށް ދިއުމަށް ނިންމައިގެންނެވެ. އެ ކުޅިވަރުގެ ފޯރި އިތުރަށް ގަދަކުރުމަށް ލަންކާގެ ޚާއްސަ ގްރޫޕަކުން ދައުވަތު ދީގެންނެވެ.
ނައިޒް އައިސް ގެއަށް ވަންއިރު އޭނާގެ ދައްތަ ހަލީމާ ފަތިސް ނަމާދަށް ތެދުވެ އުޅެއެވެ. ހޫމް މިރޭވެސް ހިތްޕަވައިގެން ދޯ ތިއައީ. ކިހާ ދެރަކަމެއް ދެންތީ. ކަލޭވެސް ތިހިރީ މިހާރު 19 އަހަރުވެ ބޮޑު ފިރިހެނަކަށްވެފަ. ހެވާ ނުބަޔާ އެނގޭވަރުވެފަ. ކަލޭގެ ސަބަބުން ކަލޭގެ މަންމަ އާއި ބައްޕަ އެތިބަ ދުނިޔެއިން މޮޔަވަނީ. މިހާރު ކަލޭ ގެނެވުނު މޮޔަ އަހަންނަށްވެސް ހީވެއްޖެ. މިހެންވާނެކަމެއް ނޭނގޭ ވިއްޔަ. ތިޔަށްވުރެ އިސްލާހުވާކަށް ނުވޭތަ. އަހަރެން ބޭނުމެއްނުވޭ ތިކަހަލަ މީހަކު މިގޭގަވެސް ބަހައްޓާކަށް. އެކަމަކު އަހަރެންނަށް މިނޫންގޮތެއް އެބައޮތްތަ. ކަލޭ ބައްޕަގެ ހައްގުގައި އަދިވެސް މިބަހައްޓަނީ. ހަލީމާ ފަތިފައްޗަށް އަމުނާލި ޖުމުލަތަކުންވެސް ނައިޒް ކަހާތަން ހިރުވާވެސް ނުލައެވެ. ތަންތަނަށް ބިއްޖެހެމުން ގޮސް ވަނީ ކޮޓަރިއަށެވެ. ކުރާނެކަމެއް ނެތެވެ. އޭނާ އެވަނީ މަސްތުގެ ދުނިޔެއަށް ހަމަ ރަނގަޅަށްވެސް ގެނބިފައެވެ. އެ ހުރިހައި ނުބައި ވަބާތަކެއްގައި ޖެހި އޭނާ ވަނީ އެ ހުރިހައި ކަމަކަށް ދެވި ހިފާފައެވެ. އިސްލާމްދީނުގައި ކުރުމަށް އަންގަވާފައިވާ ކަންތައްތަކާ ދުރުވެ، ނުކުރަން އަންގާވައިފާ ކަންތައްތަކުގެ ތެރެއަށް ވަދެ މުޅި މީހާ އެވަނީ ޚަރާބުވެފައެވެ.
މަސްތުގެ ނުރައްކާތެރި ވަބާގެ ތެރެއަށް ނައިޒް ގެނބި އެކަމުން ސަލާމަތް ނުވެވި އުޅެނިކޮށް އެކުވެރިންތަކާއެކު ނައިޒްވެސް ލަންކާގެ ފުލުހުގެ ބެލުމުގެ ދަށަށް ގެންދިޔައީއެވެ. އުފަން ރަށާ އަދި އުފަން ގައުމާ މާދުރުގައިވާ އެހެން ގައުމެއްގެ ޖަލުގައި ދުވަސްތައް ހޭދަކުރަން ޖެހުނީއެވެ. ޖަލުގެ ހިތްދަތިކަމާއި އެތަނުގެ ނާމާންކަމުގެ ތެރެއިން ސަލާމަތްކުރުމަށް ކުރީގެ އެއްވެސް އެކުވެރިއެއްގެ އެހީއެއް ނުލިބުނެވެ. ނައިޒް ޖަލުގެ އަނދިރިކަމުގެ ތެރޭގައި ތާށިވީ ދުވަހު އެކުވެރިންގެ ފަރާތުން އެއްވެސް އެހީތެރިކަމެއް ނުލިބުނު ނަމަވެސް ނައިޒް އެމީހުންނާ ހެދި އުޅުނީ މަންމައާ ބައްޕަ އަދި އާއިލާގެ މީހުންނާ ހެޔޮއެދޭ ރައްޓެހިން މަތިންވެސް ހަނދާން ނައްތާލާފައެވެ. ޖަލުގެ ތޭރިތަކުގެ ތެރޭގައި ބަނދެވުނު ފުރަތަމަ ދުވަހުވެސް އޭނާގެ ލޮލުން ފާއްދާލީ އަސަރުން ފުރިގެންވާ ކަރުނަތަކެވެ. ނަމަވެސް ނެތީ އެކަރުނަތައް އަޅާ މަންޒަރު ބަލާނެ މީހެކެވެ. ފުރަތަމަ ފަހަރަށް މިކަހަލަ ބޮނޑިއެއް ލިބުމުން އޭނާ ހުރީ ބިރުން ވިރޭވަރު ވެފައެވެ. ގްރޫޕްގަނޑު ތެރޭ އުޅޭއިރު މިހާ ގަޓު ކެރޭ މީހަކުވެސް ނުހުރެއެވެ.
ލަންކާގައި ފުލުހުންގެ ފަރާތުން ލިބެމުން އައި އަނިޔާތަކަކީ ކެތް ކުރެވޭވަރުގެ އަނިޔާތަކެއް ނޫނެވެ. އެތަނަށް އެ އަންނަ ކަޅު ބިޔަ ފުލުހުން ފެނިފައިވެސް މީހަކު ހޭނެތޭވަރު ވާނެއެވެ. ކާންހުންނަ ކެއުމެއްގެ ސަބަބުން އަރުން ދިރެނީ މަދު ފަހަރަކުއެވެ. މުގުރުން ޖަހާލާ އެތިފަހަރުން މުޅި ގަޔަށް ލޮޅުން އަރައެވެ. ގައިގައި އެރިހޭ ރިހުމާއި ކުކުރުމުގެ އަޑު އަހާނެ މީހަކު މިއަދަކު ނެތެވެ. ޖަލުގެ ކަންކަން ހުންނަ ގޮތުން އޭނާއަށް ނުވެސް ނިދެއެވެ. މުޅި މީހާގެ ހަށިގަނޑު އަނަރޫފަވަމުން އަންނައިރު މުޅިމީހާ ވަނީ ކަށިގަނޑަކަށްވެފައެވެ. ނައިޒް ޖަލުގައި ހޭދަ ކުރަމުންދާ 3 މަސްދުވަސް ވެސް ހީވަނީ އެއް އަހަރު ހެންނެވެ. މިކަމުން ސަލާމަތްވުމަށް އަދި އަތްނުލާ 10 އަހަރު އެބައޮތެވެ.
ނައިޒް ހަމަ ރަނގަޅަށް ވެސް ބޯ ގޮވައިފިއެވެ. ދަންނަ ދެކެފަރިތަ އެކަކުވެސް ލޮލަކަށް ނުފެނެއެވެ. އޭނާއާއެކު އައި ރައްޓެހިންގެ ހާލަކީ ކޮބައިކަމެއްވެސް އަދި ނޭނގެއެވެ. ނައިޒްއަށް ރޮވެނީއެވެ. އޭނާގެ މަންމައަށާއި ބައްޕައަށް އިރުއިރުކޮޅާ ގޮވެން ފެށުނެވެ. އަޑުގެ ނެތްތަނަށެވެ. އޭނާއާއެކު ކިޔަވަން ރަށުން މާލެދިޔަ ކުދިންގެ މަތިންވެސް ހަނދާންކޮށް ގިސްލެވެއެވެ. އެދުވަހު ލާމިއުމެން ދިން ނަސޭހަތްތައް ސިކުނޑީގެ ހުރިހައި ދިމާލއްގައި އެނބުރެނީއެވެ. ސިކުނޑީގެ ނާރުތައްވެސް ހީވަނީ ބުރިވެދާނެ ހެންނެވެ. އުފަން ގައުމު ހަނދާންވާ ކޮންމެ ފަހަރަކު ބާރަށް ރޮއެ ގަނެވެއެވެ. މި އަނދިރި ތޭރިތަކުގެ ތެރެއިން އޭނާ ސަލާމަތް ވާނީ ކިހާ އަވަހަކަށް ބާއޭ އޭނާގެ ހިތަށް އަރައެވެ. އެއީ އޭނާގެ ދުޢާއެވެ.
މެންދަމުގެ ހަމަހިމޭން ވަގުތެވެ. ނައިޒް ހުރީ ތޭރިތަކުގެ ތެރެއިން ބޭރު ބަލާށެވެ. އޭރުވެސް އޭނާގެ ލޮލުން ހިސާބަކަށް ކަރުނަ ހިލެމުން ދިޔައެވެ. މަންމާ! ބައްޕާ! އަހަންނަށް މަޢާފުކުރޭ. އަހަންނަށް ވިސްނިއްޖެ. އަހަރެން ތައުބާވާން ބޭނުން. އަހަރެން ދެން ދުވަހަކުވެސް އެފަދަ އަމަލެއް ނުކުރާނަން. ލާމްބޭ އާދޭ އަހަރެން ބަލާ. އަހަރެން ބާކީކޮށް ނުލާ. ރާއިފްއާ އަންމަޑޭ ގޮވައިގެން އަހަރެން ބަލާ އަވަހަށް އާދޭ. އަހަރެންނަށް އިތުބާރު ކުރޭ. އޭރު އަހަރެންނަށް ދިން ލޯތްބާ އެކުވެރިކަން އަހަރެންނަށް އަލުން ދީ! ޕްލީޒް. ނައިޒް ވަނީ ހަމަ ރަނގަޅަށްވެސް ހިތްދަތިކަމުގެ ތެރޭގައި ބަނދެވިފައެވެ. އެ ކުށުގެ ސަބަބުން އޭނާ ކަރުނަ އަޅާ ރޮނީއެވެ. އެވޭންތަކުގެ ތެރޭގައެވެ. ވަގުތު ފާއިތުވުމުގެ ކުރިން އޭނާއަށް ވިސްނުނީއެވެ. އެކަމުން ބަރީއަވުމަށް އަދިވެސް އޭނާއަށް ވަގުތު އެބައޮތެވެ.
ކެންސަރުގެ ނުރައްކާތެރި ބަލިޖެހި ނައިޒްގެ މަންމަ ޓްރީޓޮޕުގައި އެޑްމިޓް ކުރެވުނެވެ. އޭނާގެ މަންމަ އެވަނީ އެބަލީގެ ފަހު ސްޖޭޖުގައެވެ. އެ ބަލީގެ ވޭން ތަހަންމަލް ކުރަމުންދާ ދަނޑިވަޅުގައިވެސް ނައިޒްގެ މަންމަގެ ސިކުނޑި ތެރޭގައިވަނީ އޭނާގެ ދަރިފުޅުގެ ހަނދާންތަކެވެ. އޭނާގެ ފަހުނޭވާ ދުނިޔެތެރެއަށް ދޫކޮށްލުމުގެ ކުރިން އެދަރިފުޅު ފެނުމަކީ އޭނާގެ ދުޢާއެވެ. އެދަރިފުޅު ގާތުގައި ނެތި އޭނާގެ ބަލިވެސް ވަނީ ހައްތަހާ ބޮޑެވެ. ވާނީވެސް އެހެންތާއެވެ. އެމީހަކަށް ބައްޔެއްޖެހި އެބަލީގެ ވޭނުގައި އުޅޭނަމަ ކޮންމެ މީހަކުވެސް ބޭނުންވާނީ ކައިރީގައި ތިބި ލޯބިވާ މީހުންގެ އަޅާލުމާއި ލޯތްބެވެ. މިއަދު ވަދީފާގެ ގާތުގައި އެދަރިފުޅު ހުރިނަމަ ވަދީފާއަށް ހާދަ ބޮޑު ހިތްހަމަޖެހުމެއް ލިބުނީހެވެ. ހޮސްޕިޓަލުގައި އޮންނަ ކޮންމެ ދުވަހަކުވެސް ވަދީފާގާތަށް އަންހެންކުއްޖަކު އާދެއެވެ. އޭނާ އަންނަ ކޮންމެ ފަހަރަކު ކާއެއްޗެހިވެސް ގެނެސްދެއެވެ. ވަދީފާ އެއީ ކާކުތޯ ސުވާލުކުރުމުން އޭނާ ޖަވާބެއް ނުދެއެވެ. ހިނިތުންވެލާފައި ހުންނަނީއެވެ. ނަމަވެސް އެއީ ނައިޒްދެކެ ލޯބިވެގެން އުޅުނު އަރީހާއެވެ. ނައިޒްގެ ލޯބި ލިބޭތޯ އޭނާ ވަރަށް މަސައްކަތް ކުރިއެވެ. ނަމަވެސް އެތައް ފަހަރަކު ނައިޒް ތިކަމެއް ނުވާނެއޭ ބުނުމުންވެސް އޭނާ އެހެރީ ދުރަށް ނުގޮސްފައެވެ. ނައިޒް އެހާބޮޑު ކުށެއްގައި ބެދިގެން އުޅޭއިރުވެސް އޭނާ ނައިޒްދެކެވާ ލޯތްބަކަށް ކުޑަވެސް ބަދަލެއް ނާދެއެވެ. ހަގީގީ ލޯތްބަކީ އެއީއެވެ.
އެތައް ބުރަ މަސައްކަތެއްކޮށް ރާއްޖޭގައި ހުންނަ ލަންކާ އެމްބަސީ މެދުވެރިކޮށް ނައިޒްމެންނަށް ރާއްޖެ އާދެވޭގޮތް ވެއްޖެއެވެ. އެކަމުގެ ފަހަތުގައި އަބަދުވެސް އޭނާދެކެ ލޯބިވާ ލަސަންއާ ލާމިއު އާ ރާއިފްމެންގެ އަތެއްވެސް ވެއެވެ. އެއީ ހަގީގީ ރައްޓެހިންނެވެ. ކުށެއް ކުރެވުމުންވެސް ދުރަށް ނުގޮސް ގައިމު އެތިބީ ނައިޒްދެކެ ކިހާ ލޯބިވާތީ ހެއްޔެވެ؟ އެއީ ދެދުނިޔޭގެ މިތުރުންނެވެ. ނައިޒް އެހައި ގޯސްކޮށް އުޅުމުންވެސް ބާކީކޮށްނުލާނީ ގައިމު ކަމެއް ވީމަތާއެވެ. އޭނާ އެކަން މުޅި އުމުރަށްވެސް ދަންނާނެއެވެ. ކުރިން އޭނާ ހީކުރީ އޭނާ ވަރަށް ބާކީ ވާނެކަމަށެވެ. ނަމަވެސް އޭނާއަށް ހަމަވިސްނުން ދެއްވީތީ ކަލާނގެ ހަސްރަތަށް އޭނާ ހަމްދުކޮށް ޝުކުރު ކުރިއެވެ. ރާއްޖެއައިސް ކަރެކްޝަންގައި ދުވަސްކޮޅަކު މަޑުކުރަން ޖެހުނެވެ. އެކަމުގައި ރާއްޖެއިންވެސް ބަލަންޖެހޭ އެތައް އެތައް ކަމެއްވާތީއެވެ. އެކަމުގައިވެސް ނައިޒްގެ ހުރިހައި ރައްޓެހިން ކަހަލަގޮތަކަށް އޭނާއަށް އެހީވަމުން ދިޔައެވެ. އެތަކެއް ވުޒާރާތަކަށް އެތަކެއް ލިއުމެއް ހުށަހަޅައިގެންވެސް އޭނާ އަބަދުގެ އަބަދަށް މިނިވަން ކުރެވޭތޯއެވެ. އެ އެކުވެރިން ތިބީ އެ އެކުވެރިންނަށް ވަރަށް މުހިއްމު މީހެއްގެ ގޮތުގައި ނައިޒް ދެކިގެންނެވެ. ހަމަ އެގޮތަށް ނައިޒްއަށްވެސް އެއީ ވަރަށް މުހިއްމު ބައެކެވެ. ހަޔާތުގައި އެ ރައްޓެހިން ބޮޑު އަކުރުން އޭނާ ލިޔުނެވެ. އެއީ މުޅި ހަޔާތުގައިވެސް މަދަދުގާރުން ކަމުގައި ދެކޭނެއެވެ.
އެތަކެއް ކަޅު ދުވަހެއް ހަޔާތުގެ މާޒީއަށް ދޫކޮށް އެތަކެއް ވޭންތަކާއި ކެކުޅުމެއް ޖަލުގެ ތޭރިތަކުގެ ތެރޭގައި ހޭދަކުރުމަށްފަހު މިއަދަކީ ނައިޒް މިނިވަންވާ ދުވަހެވެ. އުފާވެރިކަމުގެ ކޮޅެއް ނެތެވެ. އޭނާއަށް ހަވާލުވުމަށް ގުޅުމުން ހަލީމާގެ ފިރިމީހާ ހާލިދު އެހުރީ އޭނާ ބަލާގޮހެވެ. ނައިޒް ފެނުމުން ހާލިދު ހުރީ ހީލާންވެސް ރޯލާންވެސް ނޭނގިފައެވެ. ހާލިދުއަށް ނައިޒް ފެނުނުއިރު މުޅި މީހާގެ ސިފަ ވަނީ ގެއްލިފައެވެ. ދިގު ތުނބުޅިއާއި ކޮނޑާއި ހަމައަށް ދިގުވެފައިވާ އިސްތަށިގަނޑެވެ. އަތުގެ ނިޔަފަތިތައް ދިގުވެފައިވާއިރު ހާލިދު ފެނުމުން ނައިޒް އިސްދަށަށް ޖަހާލިއެވެ. ހުދު ނައިޒްއަށްވެސް ހުރީ ހިނިތުންވެލަން ނުކެރިފައެވެ. ހާލިދު ހުރީ ވަރަށް ބޮޑަށް ދެރަވެފއެވެ. ސަބަކަކީ ކޮބައިބާއެވެ. އޭނާއަށް ނައިޒް ފެނުނުއިރު ހުރި ސިފައިން ބާވައެވެ.
ސައިކަލަށް އެރުމަށްފަހު ނައިޒް ބޭބެގެ ހާލު ކިހިނެއްތޯ އަހާލިއެވެ. ނަމަވެސް ހާލިދު އެއްޗެކޭ ނުބުނެއެވެ. އެކަމާ ނައިޒްއަށް ފުން އަސަރުތަކެއް ކުރިއެވެ. އޭނާ ހީކުރީ އޭނާއަށްޓަކައި އަދިވެސް ބޭބެގެ ހިތް ސާފުނޫނީކަމަށެވެ. ބުރިޖަށް އެރުމުގެ ކުރިންވެސް ނައިޒް ބޭބެގާތު އަހާލީ މިހާރު އުޅެނީ ހުޅުމާލޭގަތޯއެވެ. ނަމަވެސް ހާލިދުގެ ޖަވާބެއް ނައެވެ. ނައިޒް ފެންކަޅިވިއެވެ. ސައިކަލް ދުއްވަން އިން ހާލިދުގެ ހާލަކީ ވެސް އެއީއެވެ. ނައިޒްއަށް ނުފެނުނެއް ކަމަކު ހާލިދުވެސް އެދަނީ ރޮމުންނެވެ. ކުރު ދަތުރަކަށްފަހު ސައިކަލް އައިސް ހުއްޓާލީ ހުޅުމާލެ ސަހަރާގެ ދޮރުމައްޗަށެވެ. އޭރު އެތައް ބަޔަކު އެތަނުގައި ތިއްބެވެ. އިވެމުންދިޔައީ މީހުންގެ ރުއިމާއި ގިސްލުމުގެ އަޑެވެ. ކުރިއަށް އެޅި ފިޔަވަޅާއިއެކު ނައިޒް ހުއްޓުން އެރިއެވެ. މޭޒުމަތީގައި ބާއްވާލެވިފައިވަނީ އޭނާގެ މަންމަގެ ފުރާނަނެތް ހަށިގަނޑެވެ. އޭރު އޭނާގެ ބައްޕަ މަންމަގެ ބޯލާކޮޅުގައި އިނދެ ކަރުނަ ފޮހެމުންދިޔައެވެ. އޭނާ ކުޑަ ތަންކޮޅެއް ލަސްވީއެވެ. ނައިޒް ދުވެފައި ކަހަލަގޮތަކަށް ގޮސް އޭނާގެ މަންމައާއި ކައިރިވެލިއެވެ. މަންމާ! މަންމާ! ލޯ ހުޅުވާލަބަލަ. އަހަރެން މިހިރީ މަންމަ ގާތަށް އައިހޭ. އަޅެ މަންމާ އުފަލެއް ނުވޭތަ. އަހަރެންނަށް މާފުކުރޭ މަންމާ. މީ ކުރީގެ ނައިޒްއެއް ނޫނޭ މަންމާ. އަހަރެންވެސް ގޮވައިގެންދޭ. ނައިޒްއަށް ހުރިތަނަށް ތިރިވެވުނެވެ. ފަހަތުން ލާމިއުމެން އައިސް އޭނާ އަތުލަފިކޮށްގެން ދުރަށް ގެންދިޔައެވެ.
ހަގީގަތުގައިވެސް ނައިޒްއަށް ވަނީ ވަރަށް ފުން އަސަރުތަކެއް ކޮށްފައެވެ. އޭނާއަށް އެންމެ މުހިންމު މީހާގެ މަޢާފު ނުލިބި ހަޔާތުގެ ގިނަ ދުވަސްތަކެއް ޖަލުގައި ހޭދަކުރަންޖެހުމުން ހަމަ ރަނގަޅަށްވެސް އޭނާ އަށް ކުރެވެމުންދިޔައީ ހިތްދަތިކަމުން މުޅި ހަފަރާތް ބައްދާލެވިފައިވާކަމުގެ އިހުސާސެކެވެ. މިއީވެސް އިމްތިހާނެކެވެ. ހަޔާތުގައި އޭނާއަށް ލިބުނު މުހިއްމު ފިލާވަޅެކެވެ. އެދުވަސްތަކުގައި އޭނާ ވަނީ ބަރުދާސްތުކުރަން ދަތި އެތަކެއް ވޭންތަކެއް އުފުލާފައެވެ. ކޮންމެ ދުވަހަކުހެން އޭނާގެ ހިތުތެރޭގައި އެބިރުވެރި ދުވަސްތައް އެނބުރެމުން ދެއެވެ. އޭނާ ކިތަންމެ ބޭނުންވިޔަސް ދެން އެމަންމައެއް ނުފެންނާނެއެވެ. މަންމައަށް ހިދުމަތްކުރަން ކިތަންމެ ބޭނުންވިޔަސް ދެން އެކަން ވާކަށް ނެތެވެ. ނައިޒްއަށް އޭނާގެ މަންމައަށް އަނގައިން ބުނެލާ މާފަށް އެދުމުގެ ފުރުސަތު ލިބުނުނަމަ އޭނާ ހާދަ އުފަލެއް ވީހެވެ. ބަލި އެނދުގައި އޭނާގެ މަންމަ އޮތްއިރު ނައިޒްގެ ވާހަކަ ނުދައްކާ އެންމެ ދުވަހެއްވެސް ނުދެއެވެ. ނަމަވެސް ދެން ކުރެވޭނެ އެއްވެސް ކަމެއް ނެތެވެ. ދެންއޮތީ އެ މަންމައަށް ހެޔޮދުއާކޮށް މަހުޝަރުން ބައްދަލުވުމަށް އެދި ދުއާކުރުމެވެ. މަންމަގެ ފާފަ ފުއްސެވުން އެދި ދުއާކޮށް އެ މަންމައަށްޓަކައި ސަދަގާތް ކުރުމެވެ. އެމަންމަގެކަށްވަޅުއަލިކޮށްއާހިރަތް ބާއްޖަވެރިކޮށްދެއްވުން އެދި އެކަލާނގެ ހަޟްރަތަށް ތާ އަބަދު ދެންނެވުނެވެ.
އެއް މަސްފަހުން ނައިޒް ބަދަލުވީ އަނެއްކާވެސް ރަށަށެވެ. އޭނާގެ ލޯބިވާ ބައްޕައާއެކު ރަށުގައި ހަޔާތުގެ ބާކީބައި ފުރިހަމަކުރާށެވެ. ދައްތަ އުޅުނީ މާލޭގައި އޭނާގާތު ނައިޒްގެ ބައްޕަ ބަހައްޓާށެވެ. ނަމަވެސް އެގޮތް ނައިޒް ބޭނުންނުވީއެވެ. އެދުވަހު ނައިޒް ގޭގައި އުޅެނިކޮށް ލާމިއުމެން ގްރޫޕް ވައްޓާލިއެވެ. އެއީވާ ލާނެތް ގްރޫޕެކެވެ. ކޮބާ ބްރޯ! ބްރޯ ދެންވީ އަވަހަށް ހަޔާތެއް ފަށަން އެހެރަ އަރީހާވެސް ބްރޯއާ ހެދި އެހެރަ މޮޔަވަނީ. ކަލެޔަށްވެސް އެކަން އެނގޭއިރު އަޅާނުލާ ތިހުންނަނީ ވިއްޔަ. އައްޗީ! މަށެއް ނޫޅޭނަން. ކަލޭމެން ތިނޫން ވާހަކައެއް ދައްކަބަލަ. އަރީހާ ކައިރީ ބުނޭ ތިނޫން އެހެން ކަމަކާ އުޅޭށޭ. ނައިޒް ހުރީ ފާޑަކަށް ހިތްހަމަނުޖެހިފައެވެ. ބަލަ ކަލޭ ލަދެއް ނުގަނޭތަ. ކަލޭ މަންމަ ޓްރީޓޮޕްގަ އެޑްމިޓްކޮށްގެން އުޅުންއިރު އެތަނަށް ދައްކަންޖެހޭ 50 ހާސް ރުފިޔާ ދެއްކީ އަރީހާއޭ. އެވަރު ބޮޑުކަމެއް މިޒަމާނުގަ މީހަކު ކޮށްދޭނެތަ. ރާއިފް އެހެން ބުނިއިރު ހިސާބަކަށް ހުރީ ރުޅިވެސް އައިސްފައެވެ. ނައިޒް އިސްދަށަށް ޖަހާލިއެވެ. އެވަގުތުއެވެ. ނައިޒްގެ ބައްޕަ އައިސް ދިއްކޮށްލީ ނޯޓެކެވެ. ދަރިފުޅާ! ތީ މަންމަ ހޮސްޕިޓަލުގަ އޮތްއިރު ދަރިފުޅަށް ދޭށޭ ކިޔާފަ ދިން ކުރު ނޯޓުކޮޅެއް. މިކުދިން އެވާހަކަ ދެއްކީމަ ބައްޕަ މި ހަނދާންވީވެސް. ނައިޒް އެނޯޓުކޮޅު ކިޔަންފެށިއެވެ. "ލޯބިވާ ދަރިފުޅަށް. ދަރިފުޅާ. މަންމައަށް ދަރިފުޅުގެ އެހީއާއި މަދަދު އެންމެ ބޭނުންވި ދުވަހު ދަރިފުޅު ތިހުރީ މަންމައާ އެތައް މޭލެއް ދުރުގަ. އެހެންނަމަވެސް މަންމަ މި ހޮސްޕިޓަލުގަ އޮތްއިރު މަންމައަށް ކާތަކެތި ގެނެސްދީ ނުވިތާކަށް އަގުބޮޑެތި ބޭސްތަކާ ހޮސްޕިޓަލަށް ދައްކަންޖެހޭ ބިލުތައްވެސް ދެއްކީ ދަރިފުޅުދެކެ އަދި މަންމަދެކެވެސް ވަރަށް ލޯބިވާ ކުއްޖެއް. މަންމަ އެދެނީ ދަރިފުޅު އޭނައާ ކައިވެނިކޮށްގެން ބައްޕަ ރަނގަޅަށް ބެލުމަށް. ދަރިފުޅާ! އޭނަދެކެ ލޯބިނުވިޔަސް މަންމައަށްޓަކައި މިކަން ކޮށްދީ. ވަރަށް ހޮޔޮ ދުއާ ސަލާމް.
މަންމަގެ ނޯޓަށްފަހު ނައިޒްއަށް ރޮވެން ފެށިއެވެ. އެ އަސަރުގަދަ ކަރުނަތިކިތަކުން އެ ކަރުދާސްކޮޅު ފޯކޮށްލުމަށް ނެގީ ކުޑަ ވަގުތުކޮޅެކެވެ. ނައިޒް ބޭނުންވީ ހަމަ ވަގުތުން އެކަމަށް އިޖާބަދޭށެވެ. އިތުރަށް އެންމެ ވަގުތުކޮޅެއްވެސް ލަސްކުރާކަށް އޭނާ ބޭނުމެއްނުވިއެވެ. އަދި މަންމަ އެދުނު ފަދައިން ބައްޕައަށް ހިދުމަތްކޮށްދޭންވެސް އޭނާ ބޭނުންވީ އެކަން ކުރާށެވެ. އެ މަންމަ އެހާ ލޯބިން އެދުނު ކަމަކަށް ފުރަގަސް ނުދިނުމަށްޓަކައެވެ. އަދި މަންމަގެ އެންމެ ފަހު ވަސިއްޔަތެއްގެ ގޮތުންވެސް މެއެވެ.
- ނިމުނީ -