ޔުއެފާ ނޭޝަންސް ލީގުގެ ކުއާޓާ ފައިނަލުގައި ސްޕެއިންއާ ދެކޮޅަށް ކުޅޭ މެޗަށް ނެދަލަންޑްސްގެ ސްކޮޑުން ޑެންޒެލް ޑަމްފްރީސްއަށް ފުރުސަތު ދީފައިނުވާނެ ކަމަށާއި، އަދި ބާސެލޯނާގެ ފްރެންކީ ޑި ޔޮންގެ ފިޓްނަސްއާ މެދުވެސް ޔަގީންކަން ކުޑަކަމަށް އެ ގައުމުގެ ފުޓްބޯޅަ އެސޯސިއޭޝަނުން ބުނެފިއެވެ.
އިންޓަ މިލާނަށްކުޅޭ ޑަމްފްރީސްއަށް މިފުރުސަތު ގެއްލިފައިވަނީ އޭނާއަށް ލިބިފައިވާ އަނިޔާގެ ސަބަބުންނެވެ. މި އަނިޔާ އޭނާއަށް ވެފައިވަނީ އާދީއްތަ ދުވަހު އެޓަލާންޓާއާ ދެކޮޅަށް އިޓާލިއަން ސެރީއޭ ގައި ކުޅުނު މެޗުގެ ތެރެއިންނެވެ. ޑަމްފްރީސްއަށް އަނިޔާވެ ދަނޑުން ބާލަންޖެހުމުން، އޭނާގެ ބަދަލުގައި ކުޅެން އަރުވާފައިވަނީ އަޔެކްސް އެމްސްޓަޑަމްގެ ޒުވާން ޑިފެންޑަރު، ޔޫރީ ބާސްއެވެ. މިއީ ގައުމީ ޓީމަށް ބާސް ކުޅުނު ފުރަތަމަ މެޗަށްވާއިރު، އިއްތިފާގުން އެދުވަސް ދިމާވީ އޭނާގެ 22 ވަނަ އުފަންދުވަހާއެވެ.
ނެދަލެންޑްސްގެ ކޯޗު ރޮނާލްޑް ކޮއިމަން ބުނެފަވަނީ އެޓީމުގެ މުހިންމު މިޑްފީލްޑަރ ޑި ޔޮންއަށްވެސް އަނިޔާއާ ކުރިމަތިވެފައިވާ ކަމަށެވެ. އަދި އޭނާ ނެތްތަން ފޫބައްދަން ބްރައިޓަންގެ މެޓްސް ވީފަރގެ އިތުރުން ހޯވް އެލްބިއަން ބޭނުންކުރުމަށް ރާވާފައިވާކަމަށްވެސް ކޯޗު ބުންޏެވެ. އާދިއްތަ ދުވަހު އެތުލެޓިކޯއަތުން ބާސާ މޮޅުވި މެޗުންވެސް ޑި ޔޮން ފެނިފައެއް ނުވެއެވެ.
ޖެހިގެން އައި އާދިއްތަ ދުވަހު ނެދަލެންޑްސް ޓީމުގެ ޕްރެކްޓިސްއަށް އޭނާ ހާޒިރުވެފައިވީ ނަމަވެސް އެއްވެސް ތަމްރީނެއްގައި އޭނާ އަދި މިހާތަނަށް ބައިވެރިވެފަ ނުވާކަމަށް މީޑިއާތަކުން ބުނެއެވެ.