އެރެއަކީ ނާމާންކަމުގެ ސިއްކަޖަހާފައިވާ ރެއެކެވެ. މަރުއައިސް ކަނފަތްބުޑުގައި ވައިއަޑުން އަހަރެން އަތުވެއްޖައީމޭ ބުނާކަހަލައެވެ. މި ބިރުވެރިކަމުގެ ހަތްޔަރުގައި ވާ އެ ޔޫސުފުގެ އުމުރުންމިވީ އެންމެ އަށާރަ އަހަރެވެ. ދުނިޔޭގެ މީރުކަން އަދިކިރިޔާ ތަލީގައި ހޭކިލީއެވެ. މިދުނިޔޭގައި އޭނާ މި ހޭދަކުރި މަދު އަހަރުތަކުގައިމެ އޭނާ އެހެންމީހުން މުޅި އުމުރުދުވަހުގައި ތަހައްމަލު ކޮށްފައިނުވާ މިންވަރަށް އާދަޔާ ޚިލާފު ކަންކަމާއި، އަދި މީހެއްގެ ދެލޯ ބޮޑުވެ އަޖައިބުވެ އަންތަރީސްވާނެހާ މަންޒަރުތައްދެކި އެފަދަ ހާދިސާތަށް ތަހައްމަލުކޮށްފައިވެއެވެ. އޭނާ މިހާރު އެ ދިރިއުޅެނީ އޭނާއަށް މުޅިން ބީރައްޓެހި ބައެއްގެތެރޭގައެވެ. މިއީ ޤަޟާޤަދަރުގެ މިންވަރުކަމަށް ދެކި އޭނާ ކެއްތެރިކަމާއިއެކު ބޯލަނބާލިއެވެ. އޭނާ ހަޔާތުގެ ކޮންމެ ކަމަކާ ކުރިމަތިލީ ކެރިހުރެމެއެވެ. އެކަމަކު މިރޭމީ ފަހަރެއްގައި އޭނާގެ ކެތްތެރިކަން ކޮޅުންލާނެ ރޭބާވައޭ އޭނާގެ ހިތައްއެރިއެވެ. މިރޭގެ ފަތިސް އަހަންނަށް ފެންނާނެބާއޭ އޭނާގެ ކެތްމަދުވެފައިވާ ހިތް، ރޮމުން ރޮމުން އޭނާއާ ސުވާލުކުރަމުންދިޔައެވެ. އާއެކެވެ. ބައެއްގެ ދީލަތިކަމުގެ ބަދަލުގައި އަހަންނަށް ދޭންމިޖެހުނީ އަހަރެންގެ ފުރާނައެވެ. މަރުގެ ސަކަރާތްގަނޑު އަހަންނާ ކުރިމަތިވާހިނދު އަހަންނަށް ކެއްވާނެބާއެވެ. ކޮންމެހެނެއްވިޔަސް އަހަރެން އަހަރެންގެ ފުރާނައެއް ތިޔަހާ ފަސޭހައެއްކޮށެއް ނުދޭނަމެވެ. އާނއެކެވެ. އަހަރެންގެ އަޖަލު ހަމަވެފައިވާނަމަ ދެން ކުރާނެކަމެއްނެތެވެ. ނަމަވެސް އެ އަޖަލުހަމަވީކަން އެނގޭނީ ހަމައެކަނި މާތް ކަލާނގެއަށެވެ. އަދި އެކަލާނގެ ހެއްދެވި މަތިވެރި މަރުގެ މަލާއިކަތާއަށެވެ. ވީމާ ފަހު ނޭވަޔާހަމައަށްދާންދެންވެސް އަހަރެން ތަޅާފޮޅާނަމެވެ. ވީވަރެއް ކުރާނަމެވެ.
ދާތިކިތަށް ނިއްކުރިމަތިންލާފައި އައިސް ދެބުމައިގައި ފުނިޖެހެން ފަށައިފިއެވެ. އިސާހިތަކު އެއިން ތިއްކެއް ބުމައިންނެއްޓި ޔޫސުފުގެ ކަނާތުލޮލުގެ އެސްފިޔަތައްމައްޗަށް ރާޅެއްފަދައިން ބިންދާލިއެވެ. އެ ދާފެންތިކީގެ ލޮނުގެ އަސަރުން ޔޫސުފުގެ ލޯކަރައިގަތެވެ. އޭނާ އެއްއަތުން އެލޯ އުނގުޅާލިއެވެ. އެހިންދު އޭނާއަށް އެ ފަން ޖިފުޓީގެ ބޭރުން އެއްޗެއްގެ ހަރކާތުގެ އަޑުއިވުނެވެ. ޔޫސުފު އޭނާގެ ބޯމަތިން ސޮއްސާލާފައިވާ ފޮތިގަނޑު ފަހަތައް ކަހާލިއެވެ. އަދި ދެލޯ ބޮޑުކޮށްލާފަ އެ ޖިފުޓީގެ ދޮރާދިމާއަށް ބަލައިލިއެވެ. އެތާކު ދޮރެއް ޖަހާފައެއްނެތެވެ. އެއީ ދޮރުހުންނަންވީ ތެނެވެ. މިހެން މިހިރީވެސް އެއެއްޗަށް ފަސޭހައިން އޭނާކައިރިއަށް އާދެވޭނެގޮތް ހެދުމަށެވެ. އެއެއްޗަކު އެޖިފުޓިއަށް އަވަހަށް ވަދެގަންނާކަށް ނުހަދައެވެ. އެއެއްޗަކު އެތާބޭރުގައި ޖިފުޓީގެބޭރު ފަންބިތުގައި އަތްކާއްތަނީއެވެ. އޭތި،އޭތިގެ ޝިކާރައާ ކުޅެނީއެވެ. ބައެއްފަހަރު ހަމަ ދެންމެ ދެންމެއަކު ދޮރުގެ ކައިރިން ފެނިދާނެއޭ ހީވާކަހަލައެވެ. ނަމަވެސް ދޮރާގާތަށް އައިސްފައިމެ އޭތި މަޑުކޮށްލައެވެ. އަދި ވަރަށް ބާރުލާފައި ނޭވާލައެވެ. ފުރަތަމަކޮޅު ޔޫސުފުގަތީ އަމަށަކު ބިރެއްނޫނެވެ. އެކަމަކު އިރުކޮޅަކުން ބޭރުން އިވެންފެށީ ޓޮއްޓޮއް އަޑެކެވެ. ޔޫސުފު ހައިރާންވެފައި އަޑުއަހަން އިނެވެ. އޭނާހިތައްއެރިއެވެ. އެއިވެނީ މިރަށުމީހުން ފައްޅީގައި ބޭނުންކުރާ އެއްޗެއްގެއަޑެވެ. އާނއެކެވެ. އެއިވެނީ އެމީހުން ގެންގުޅޭ 'ޑަމަރޫ"އެއްގެ އަޑެވެ. ފުރޭތައަކަށް 'ޑަމަރރޫއެއް' ތެޅުވުމުގެ ބޭނުމެއް އޮންނާނެހެއްޔެވެ؟ ޔޫސުފުގެ ހިތުގައި ޝައްކުގެ ހުޅުކޮޅެއް ރޯވިއެވެ.
ދެން ޔޫސުފް އަވަހަށް އޭނާ ލާފައިހުރި ހަރުވާޅުގެ ދަށުން ފޮތިއޮޅާ ފޮރުވައިފައިވާ ކުޑަ ފިއޮއްސެއް ނެގިއެވެ. އޭނާގެ ހިތަށްއެރިއެވެ. މިއީ އަހަރެން މީގެ މާކުރިން ކުރަންވީކަމެކެވެ. ނަމަވެސް އޭނާ ވެފައިވާ ހާސްކަމެއްގެ ބޮޑުކަމުން އެފިޔޮހިމަތިން މުޅިން ހަނދާން ނެތުނީއެވެ. އޭނާ އެތަނަށް ގެނައި މީހުން އެޖިފުޓީގެ އެތެރެކަނެއްގާ ހުރި މުޑިއެއްގައި އައްސާފައިވާ ރޯނުގަނޑަކުން އޭނާގެ ދެއަތްވަނީ ބަނދެފައެވެ. މިހެން ނުހަދައިފިނަމަ އެތަނަށް ގެނެވޭކުދިން ވަނީ އެތަނުން ދުވެފިލާފައެވެ. ދެން އަވަހަށް ޔޫސުފު މަސައްކަތް ކުރީ އެ ފިޔޮހިން ރޯނުތައް ބުރިކޮށްލެވޭތޯއެވެ. މިކަން ކުރަންޖެހުނީ އެ ފިޔޮހީގެ މުށްގަނޑުގައި ދަތްތަކުން ހިފަހައްޓައިގެނެވެ. މި މަސައްކަތް ފެށިތަނާހެން ބޭރުގާ އެއްޗެއް ކަމަށް ހެދިގެން ހުރި މީހަކު އެޖިފުޓީގެ ދޮރުމައްޗައް ހުއްޓިއްޖެއެވެ.
ޔޫސުފު އަވަހަށް އެޖިފުޓީގެ އެތެރެއަށް އެވާގަނޑު ޖަހާފައިހުރި ތަނބާކައިރިއަށް ފިރުކައިގަތެވެ. ދެން އޭނާ އެމީހާއަށް ފުރަގަސްދީ ބޯމަތީގައި އޮތް ފޮތިގަނޑު މޫނުމައްޗައް ތިރިކޮށްފާ ހަށިގަނޑު ގުޅަވެށިކޮށްލިއެވެ. ދެން މިހެން ފިލާއޮވެ އޭނާ އަވަސްވެގަތީ އެ ރޯނުތައް ބުރިކުރުމާއިގެންނެވެ.
އެމީހަކު ބަރުއަޑަކުން ވާހަކަދައްކަންފެށިއެވެ. "އޭތް! މިހިރަގޮތްކުޑަ ކުއްޖާގަނޑާ! ކަލޭގެ ކަލާނގެއަށް ކަލޭ ފުރަގަސްދެނީތަ؟"
ޔޫސުފު އެހާލުގައި އެއަނދިރީގައި އޮވެމެ، އެމީހާގެ ދުލުން ކަލާނގެއޭ ބުނިބަސްއަހާފައި ދެލޯއަޅާލިއެވެ.
"ކަލެއަކަށް ދެން ސަލާމަތެއްނެތް. ކަލޭތީ މިހާރު އަހަރެންގެ މިލްކެއް. އަހަރެން ކަލެއަށް ވަރަށް އަހުވަ ދައްކާނަން. މިދުނިޔޭން ކަލޭ ދާނީ ރޮމުން ނިކަމެތިކަންމަތީގަ. ތިހެން ގަދަހަދާ ރުޅިދައްކާ ކިތަންމެ ކުއްޖަކާ މީގެކުރިންވެސް އަހަރެންނާ ދިމާވި. އެއިން ކޮންމެކުއްޖެއްމެ އާޚިރުގައި ނިމިގެންދަނީ ރުއިމާ އާދޭހުގާ."
ޔޫސުފް ހިތައް އެރިއެވެ. އަދިވެސް ގިނަ ފޮނިކެނޑުމުގާ ކަލޭ ވަގުތުހޭދަކުރާށެވެ. މަގާތައްނައިސް އިހަށް ތި ދިއުޅި ދިގުކުރާށެވެ. ނަމަވެސް ޔޫސުގެ އެހާ ނަސީބު ރަނގަޅެއް ނުވިއެވެ. އެމީހާ އައިސް ޔޫސުފުގެ ފަހަތުން އޭނަގެ ގައިގައި ހިފައިގަތެވެ. އަދި އޭނާ އަމާޒުކޮށްގެން ހުރި ވަނާތަކާ ދިމާއަށް އަތްހިންގާލިއެވެ. ޔޫސުފު މިކަން ހުއްޓުވުމަށް ތެޅިފޮޅިގަތެވެ. އަދި މިހައިޖާނުގަނޑު ތެރޭގައި އޭނާ އަނގައިން އެ ފިޔޮހި ނެއްޓިގެން ވިއްސައިގެންގޮސް އެ ޖިފުޓީގެ ކޮންމެވެސް އަނދިރި ކަނަކަށް ގެއްލިއްޖެއެވެ. ޔޫސުފުގެ ހިތް ގެނބިގަތެވެ. ލިބުނު ކުޑަ އުންމީދުގެ ވާފަށް އަތުން ބީވެގެން ދިޔަކަމަށްޓަކައެވެ. ދެން އެމީހާ ޔޫސުފުގެ މޫނުގައި ވަރަށް ބާރަށް ގޮށްމުށުން ޖެހިއެވެ. އެ އަނދިރީގައިވެސް ޔުސުގެ ލޯމަތީގައި އަލިކަނިތަކެއް ނަށާލިކަހަލައެވެ. ހިނދުކޮޅަކަށް އޭނާގެ ހަށިގަނޑުން ވާގިދޫވިއެވެ. އެ ފުރުސަތުގެ ބޭނުންކޮށް އެމީހާ ޔޫސުފުގެ ހަށިގަނޑުގެ ވަނާތަކަށް ހަމަލާދޭން ފެއްޓިއެވެ. ކުއްލިއަކަށް އެމީހާ ސިއްސައިގެން ފަހަތަށް ޖެހިގަތެވެ. އަދި ރުޅިއައިސްފައި ހަޅޭއްލަވައިގަތެވެ. "އޭތް! ކަލޭތީ ފިރިހެނެއްދޯ؟" މިހާތަނަށް ޔޫސުފަށް ހޭވެރިކަން އަތުވެއްޖެއެވެ. "ހުރެބަލަ، ކަލޭ މަރާނަން މިރޭ. ކަލެއާ ކަލޭމިތަނަށް ތިގެނައި އާއިލާއެއްގެ އެންމެން މަރާ ސުންނާފަތިކޮށްލާނަން." ދެން އެމީހާ ޔޫސުފުގައިގާ އަތުންނާ ފައިން ވަރަށް ބާރަށް ތަޅަންފެށިއެވެ. ބައެއްފަހަރު ޔޫސުފަށްވެސް އެމީހާއަށް ރައްދު ހަމަލާ ދެވެއެވެ. ދެން އެންމެފަހުން ޔޫސުފު ބިންމައްޗަށް ވައްޓާލާ އޭމީހާ އޭނާގެ މޭމަތީގައި އިށީނދެ އިނދެ ޔޫސުފްގެ ކަރުގާ ބާރަށް ހިފާ ފިއްތަންފެށިއެވެ. ޔޫސުފު އޭނާގެ އައްސާފައިވާ ދެއަތުން އެމީހާގެ ކިބައިން މިންޖު ވެވޭތޯ ވަރަށް މަސައްކަތް ކުރިއެވެ. ފަހަރެއް ފަހަރަކަށް އޭނާގެ ހަށިގަނޑުން ބާރު ދެރަވާކަން އޭނާއަށް އިހުސާސުކުރެވެއެވެ. ދެން މިހާލުގާ އޭނާ ތެޅިފޮޅި ހަދަނިކޮށް އޭނާގެ އަތުގެ ރޯނުތައް ކަނޑައިގެންގޮއްސިއެވެ. އޭނާގެ ދެއަތް މިނިވަން ވެއްޖެއެވެ. ނަމަވެސް މިހާރަކު އޭނާގެ ހަށިގަނޑަކު އެއްވެސް ވަރެއް ނެތެވެ. އަދި އޭނާގެ އަތުން ބާރުދޫވެ އޭނަގެ ދެއަތް ދެފަރާތައް ވެއްޓުނެވެ. އަހަރެން މިމަރުވަނީއޭ، ޔޫސުފުގެ ހިތަށް އެރިއެވެ. އެހިނދު އޭނާއަށް އޭނާގެ ކަނާތު އަތް ދަށުގައި އެއޮތީ އޭނާގެ ފިޔޮހިކަން އިނގުނެވެ. ދެން އެލިބުނު ކުއްލި އުންމީދާއެކު އޭނާގެ ކިބައިގައި ނެތް ހިއްވަރެއްލާފައި އެ ފިޔޮހި ނެގިއެވެ.
އޭގެ ފަނަރަވަރަކަށް މިނެޓު ފަހެވެ. ޔޫސުފު އެހެރީ އެ ނުބައި ނުލަފާ މީހާގެ މަރުވެފައިވާ ހަށިގަނޑަށް ބަލައްޓައިގެނެވެ. އެ އަނދިރީގައި އެއީ ކާކު ކަމެއް ނޭނގެއެވެ. ދެން މިހެން ހުރެ ޔޫސުފުގެ ހަށިގަނޑުގައި ތަންކޮޅެއް ވަރުޖެހުމުން އޭނާ އެމީހާގެ ހަށިގަނޑު ދަމާފައި އެޖިފުޓިން ބޭރަށް ނެރުނެވެ. އެރެއަކީ ކަޅުފޮއެ ރެއެއްކަމުން އަދިވެސް އެމީހާގެ މޫނެއް ސާފެއްނުވެއެވެ. ދެން އެތާ ބޭރުގައި ހުރެ ޔޫސުފު ކޮޅުކޮޅަށް ނަޒަރުހިންގާލިއެވެ. އޭނާ ގުރުބާން ކުރުމަށް ހަދާފައި ހުރި މިޖިފުޓި އެހެރީ ރަށުގެ މީހުން ނޫޅޭ ހިސާބު އަތިރިމަތީ ތުނޑީގައެވެ. މިއީ އެރަށުގެ ބޮޑުފާރުގެވެސް ބޭރެވެ. ދެން މިހެން ފިރުކުބޮޑުވެފައި ހުއްޓާ އެފެށުނީ ވާރޭވެހޭށެވެ. އިރުކޮޅަކުން ގަދައަށް ވިދާލިއެވެ. މިވިދުވަރާއިއެކު އެ މަރުވެފައިވާމީހާގެ މޫނު އަލިވެގެން ދިޔައެވެ. އަދި ޔޫސުފުގެ ހިތަށް އެރިއެވެ. "އެއީ މަ ކޮންމެވެސްސްތާކުން ދެކެފައިވާމީހެކެވެ". ނަމަވެސް އެ ވިދުވަރުގެ ކުޑަ ހިނދުކޮޅުގާ ރަނގަޅަކަށް އަދިވެސް އެމީހާގެ މޫނުގެ ސޫރައެއް ސާފެއްނުވިއެވެ. ދެން ކުއްލިއަކަށް ޖެހި ބޮޑު ގުގުރިއަކާއިއެކު އެތާ ކައިރީގައިހުރި ގަހަކަށް ހޮނުއަޅައިފިއެވެ. ޔޫސުފުވެސް އަވަހަށް ބިންމައްޗައް ބިރުން ވެއްޓިގަތެވެ. މި ހޮނުއެޅުމުގެ ސަބަބުން އެގަހުގެ ގޮފިތަކުގައި ހުޅުރޯވިއެވެ. އެގަހަކީ މަރުވެ ދަރަށްވެފައިވާ ގަހެއްކަމުން އޭގެ ގޮފިތަކުގާ ވަރަށްގަދައަށް ރޯވެ އަނދަން ފަށައިފިއެވެ. އަދި އިސާހިތަކު މުޅިތަނަށް އަލިވެއްޖެއެވެ. ޔޫސުފު އެމީހާގެ މޫނަށް ރަނގަޅަށް ބަލައިލިއެވެ. އެހިނދު އޭނާ ސިއްސައިގެންގޮސް ދެލޯބޮޑުވިއެވެ. އަދި ޔޫސުފަށް ބޭއިޚްތިޔާރުގައި ބުނެވުނެވެ. "أَسْتَغْفِرُ ٱللَّٰهَ، ކަލޭދޯ؟ މިޤައުމުގެ މީހުންނަށް ރަންނަމާރިއޭ ކިޔައިގެން ބިރުދައްކާ، މީހުންގެ ބޯކާލައިގެން ތިއުޅެނީ ކަލޭދޯ؟" ހައިރާންވެ އަންތަރީވެފާހުރެ ޔޫސުފުގެ ހިތަށްއެރިއެވެ. މި ނުބައިކަމުގެ ފަހަތުގައި މިހުރީ މިޤައުމުގެ އެންމެން އެންމެ ބަސްގަބޫލުކުރާ، މުޅިޤައުމުގެ އެންމެ މާތްމީހާ ކަމަށް މީހުންދެކިއުޅޭ، ވެރިކަންކުރާ ރަށުގެ އެންމެބޮޑު ފައްޅީގެ މައި ފާދިރީތާއެވެ؟
ދެންހިނދުކޮޅަކު ވިސްނަން އިންދާ، ޔޫސުފުގެ ކަންބުޑުވުން އިތުރުވިއެވެ. އަހަރެންނަކީ މިޤއުމަށް ބީރައްޓެއްސެކެވެ. އަހަރެންނަކީ މާތްވެގެންވާ އިސްލާދީނަށް އުޅޭމިހެކެވެ. މިމީހުންނަކީ އެތަކެއް ތަފާތު ކަލާނގެތަކަކަށް އަޅުކަން ކުރާ ބުދުދީނުގެ އަހުލުވެރިންނެވެ. މިގަތުލުތަކުގެ ފަހަތުގައި ވަނީ އެމީހުންގެ ބޮޑު ފާދިރީއޭ ބުނުމުން އެމީހުން އެކަމެއް ގަބޫލެއްނުކުރާނެއެވެ. އަދިކިއެއްތަ، އެ މީހާ މަރާލީ އަހަރެންކަން އެނގުމުން އެމީހުން އަންނާނީ ރުޅި، ހިތުގައި އުފެދޭނީ ނަފުރަތުގެ އަލިފާންގަނޑެކެވެ. މިޖެހުނީ އަނެއްކާ އަނެއް މުސީބާތެވެ. ދެން މާޔޫސްވެ ޔޫސުފު ބިންމައްޗަށްތިރިވެ ދެއަތް މައްޗަށް ނަގާ މާތްކަލާނގެ ކިބައިން ވާގިއެދުނެވެ. ދެން މިހެން އިންދާ އަނެއްކާވެސް ވިދާލި ވިދުވަރަކުން ފެނުނީ ފަޅުތެރޭގައި މިތަނާ ކައިރީގައި އޮތް ދޯންޏެކެވެ. ނަމަވެސް އެދޯނި ފަރުމާކޮށްފައި އެހެރީ މިރާއްޖޭގައި ދޯނި ފަރުމާކުރާ ބައްޓަމަކަށް ނޫނެވެ. އެ ބަލާބެލުމަށް ހީވަނީ ޒާތެއްގެ ކަރުދިގު ދޫންޏެއްހެނެވެ. ޔޫސުފަށް ކުއްލިއަކަށް މިކަމުގެ ހަޤީޤަތް ވިސްނުނެވެ، ފަރުދާއެއް ކަޝުފުވީކަހަލައެވެ.
ޔޫސުފް މި ދިވެހިރާއްޖެއަށް އައީކީ އޭނަގެ އަމިއްލަ އިޚްތިޔާރަކުން ނޫނެވެ. އޭނާ އޭނަގެ އަމިއްލަ ޤައުމުކަމަށްވާ މޮރޮކޯގެ އައްސޭރިފަށުން ފުރީ ވިޔަފާރި ދަތުރެއްގައެވެ. މިއީ އޭނާ ބޮޑުވެ ޒުވާނަކަށްވެ އަމިއްލަ ފައިމައްޗަށް ތެދުވެ އާމްދަނީއެއް ހޯދުމަށް އޭނާގެ ގާތްތިމާގެ ބައެއްގެ ނަވެއްގާ ހަބަޝާއަށް ކުރި ވިޔަފާރި ދަތުރެކެވެ. ނަމަވެސް އެ ކުރި ފުރަތަމަ ދަތުރުވެގެން ދިޔައީ އޭނާގެ ހަޔާތް އެއްފުށުން އަނެއްފުށަށް ޖަހާލި ދަތުރަކަށެވެ. ގަދަ ތޫފާނެއްގައި ޖެހި، މިސްރާބު އޮޅި، އެމީހުން ދަތުރުކުރަމުންދިޔަ ކަނޑާ މާބޮޑަށް ބޭރަށް ދެވުނެވެ. ދެން ދެވޭ ނުދެވޭ ދިމާއެއްނޭނގި ކަނޑުމަތިއަޅައިގެން ގޮސް އެންމެފަހުން އެ ނައު ބެހިގެން އާދެވުނީ މިރާއްޖޭގެ ކަނޑަށެވެ. އަދި ތޫފާނީ ރޭގަނޑެއްގާ އެނައު ރާއްޖޭގެ ތިލަ ފަރަކަށް އެރިއެވެ. މުޅި ނައު ފަޅައިގެންގޮސް ފުނޑުފުނޑުވެ އެ ވިލުތެރެއަށް ގެނބިގެންދިޔައީ ޔޫސުފު ބަލަބަލާ ހުއްޓައެވެ. އެއޮއްބޮޑުނަވުން ސަލާމަތްވީ އުމުރުން ސަތާރައަހަރުގެ ޒުވާން ޔޫސުފު އެކަންޏެވެ. މިޤައުމުގެ މީހުންނަށް ޔޫސުފުގެ ބަހުރުވައެއް ނޭނގެއެވެ. އަދި ޔޫސުފަކަށްވެސް އެމީހުންގެ ބަހުރުވައެއް ނޭނގެއެވެ. އޭނާ އޭނާގެ ޤައުމަށް ގެންދާކަށް އެކަކުވެސް ނޫޅުނެވެ. ފުރަތަމަކޮޅު ޔޫސުފުގެ ހަމުގެ އަލިކަމަށް ބަލާފައި އެރަށުގެ ބޮޑުންގެ މީހުން ނިންމީ އޭނާވާނީ ކޮންމެވެސް މަތީ ދަރިފަސްކޮޅެއްގެ ކުއްޖެއްކަމަށެވެ. އެމީހުންނަކީ ދޮންހަމަށް ވަރަށް ލޯބިކުރާ ބައެކެވެ. އެ ބޮޑުންގެ މީހުން އޭނާއަށް ކާއެތިކޮޅު ދީ އެޅެތެވެ. ނަމަވެސް އެއްދުވަހަކު އެމީހުން އޭނާ ގޮވައިގެން އެމީހުންގެ ބޮޑު ފައްޅިއަށްގެންގޮސް އެމީހުންގެ ބޮޑު ބުދަށް އަޅުކަންކުރަން އެދުނެވެ. ޔޫސުފު މިކަމާ އިންކާރު ކުރިއެވެ. އަދި އިޝާރާތުން އޭނާ މައްޗަށް އަތްދިއްކޮށްލާފައި އޭނާގެ ކަލާންގެ ވަނީ އުޑުގައިކަމަށް ބުނެދެވޭތޯ މަސައްކަތް ކުރިއެވެ. ދެން އެމީހުން ޒާތްޒާރަށް ވާހަކަތަކެއް ދައްކަމުންދަނިކޮށް އެބޮޑު ފައްޅީގެ ވެރި ފާދިރީ އައިސް ޔޫސުފުގެ ނިއްކުރީގައި ކޮންމެވެސް ރަތްކުލައިގެ އެއްޗެއް ހާކާލިއެވެ. ޔޫސުފު އަވަސް އަވަހަށް އޭނަގެ ނިއްކުރިމަތިން އެ ކުލަތައް ފޮހެލިއެވެ. މިމަންޒަރު ދެކެފައި އެންމެން ދެލޯބޮޑުވެ، ބައެއްމިހުން އެމީހުންގެ އަނގަމަތީގައި އަތްއަޅާލިއެވެ. ދެން އެ ފައްޅީގެ ބޮޑުމީހާ އައިސް ޔޫސުފު މޭމަތީގައި ބާރަށްއަޅާ ކޮށްޕާލިއެވެ. އެވަރުން ނުފުދިގެން އެތާތިބިމީހުންނަށް ޔޫސުފު އެތަނުން ބޭރަށް ނެރުމަށް އަމުރުކުރިއެވެ. އެމީހުން ޔޫސުފުގެ އިސްތަށިގަނޑުގައި ހިފާ އޭނާ ދަމާކޫއްތާފައި އެތަނުން ބޭރަށްނެރި ބިންމައްޗަށް ވައްޓާލިއެވެ. ދެން މިހުންގަނޑު އޭނައަށް ހަމަލާ ދޭން އެއްވެގަތްތަނާހެން އެތަނަށް އެވަޑައިގަތީ އެގައުމުގެ ރަސްގެފާނެވެ. އެގައުމުގައި ރަސްގެފާނަށް ކިޔަނީ ރަދުންނެވެ. މިއީ ޒުވާން ބޭކަލެކެވެ. މިމަނުކުފާނު އެމީހުންނާ އެމީހުންގެ ބަހުރުވައިން ވާހަކަފުޅުތަކެއް ދެއްކެވިއެވެ. ދެން އިސާހިތަކު މީހުންގަނޑު މައިތިރިވެއްޖެއެވެ. ނަމަވެސް އެހާދިސާގެ ފަހުން އެ ބޮޑުންގެ އެންމެންވެސް ޔޫސުފަށް ފުރަގަސްދިނެވެ. އެމީހުންގެ އެކަކުވެސް ޔޫސުފަކަށް އަޅައެއްނުލައެވެ. ދެން މިހެން ކާނެ، ބޯނެ، ބޯހިޔާކުރާނެފަދައެއްނެތިފައި މަގުމަތީގައި ގަނަތެޅެން، ބިކަވެ ސަލާންޖަހަން މަޖުބޫރުވެފައި ހުއްޓާ، އެއްދުވަހަކު މީހަކުއައިސް ކާއެތިކޮޅެއް ދިއްކޮށްލިއެވެ. އަދި ބޯނެ ފެންފޮދެއްވެސް ދިނެވެ. ދެން މިމީހާ ޔޫސުފު ގޮވައިގެންގޮސް އޭނާގެ ފިހާރާގައި މަސައްކަތްކުރާ މީހެއްގެ ގޮތުގާ ބެހެއްޓިއެވެ. މިހެން މިމީހާގެ ދީލަތިކަމުގެ ހިޔާވަހިކަމުގައި އޭނާ އެމީހާގެ ގޭގައި ނޯކަރެއްގެ ގޮތުގައި އުޅެންފެށިއެވެ. ޔޫސުފަކީ ހިތްއަލި އަދި އެހާމެ ތޫނުފިލި ކުއްޖެއްކަމުން، އޭނާ އެންމެ އަހަރެއްގެ ތެރޭގައި އެ ގައުމުގެ މީހުންގެ ބަހުރުވަކަމަށްވާ ދިވެހިބަސް ރަނގަޅަށް ދަސްކޮށްފިއެވެ. ޔޫސުފު މިގައުމަށް ބެހިގެންއައިއިރުވެސް މިގައުމުގެ މީހުންނަށް ރަންނަމާރިއެރުމުގެ ވަބާ ވަނީޖެހިފައެވެ. ކޮންމެ ކަޅުފޮއެރެއެއްގައި ބިކުރުވެރި އަންހެންކުއްޖަކު، މިރަށަށް އަރާފުރޭތައަކަށް ޤުރުބާން ކުރެވެއެވެ. އެގައުމުގެ މީހުންގެ ކަލާންގެތަށްބެހިފައިވަނީ ވަނީ ރަނގަޅު ކަލާންގެތަކާ ނުބައި ކަލާނގެތަކަށެވެ. މިހެންވެ މިރަންނަމާރިއަކީ އެމީހުންދެކޭގޮތުގައި އަނިޔާވެރި ނެބައި ކަލާންގެއެކެވެ. އަދި އެފަދަ ހަރުކަށި ދޭވަތާއަކު ރުއްސުމަށް އޮތް ހަމައެކި ގޮތަކީ ބިކުރުވެރި އަންހެންކުއްޖެއް ޤުރުބާން ކުރުމެވެ. މިގޮތުން ޤުރުބާން ކުރެވޭ ކުއްޖަކީ ގުރުއަތުން ހޮވޭކުއްޖެކެވެ. ނަމަވެސް ޔޫސުފަށް އެނގިފައިވާ ގޮތުގައި އަދި މިހާތަނަށް އެއްވެސް މަތީފަންތީގެ މީހެއްގެ ދަރިއަކު މިގުރުއަތަކުން ނުހޮވެއެވެ. އެމީހުން ގަބޫލުކުރާގޮތުގައި އެހެންއެވަނީ މުއްސަދިންނަށް ކަލާނގެތައް ރުއްސުމަށްކުރާ އަޅުކަންކަމުގައި އެ އަރިސްކުރާ ހަދިޔާތައް އެރުވޭތީވެ، ކަލާނގެތައް އެމީހުންގެ ދަރިންތަކަށް ރައްކާތެރިކަން ދެނީކަމަށެވެ. ޔޫސުފު މިކަމަކާ ޖަދަލެއް ނުކުރެއެވެ. އެމީހުންގެ ކުރިމަތީގައި ޔޫސުފެކޭ އެމީހުންގެ އެންމެ ދަށުދަރަޖަކަމަށް ދެކޭ 'ބީހުން މަނާ މީހެކޭ' އެއްފަދައެވެ. ވީމާ ޔޫސުފުވެސް އުޅެނީ ނަޒަރުތިރިކޮށްގެން މީހެއްގެ ލޮލުގައި އަޅައިނުގަނެ އުޅޭވޭތޯއެވެ.
ޔޫސުފަކީ ނޯކަރެއްކަމުން އޭނާ ނިދަނީ އެގޭ ގެރިކޮށި ކައިރީގައެވެ. އެއްދުވަހަކު ބޮޑުންގެ ބަޔަކު މޮޅިވެރި މޫނުތަކަކާއިގެން އައިސް އެގޭ ދެމަފިރިންނާ ވާހަކަތަކެއްދެއްކިއެވެ. އިރުކޮޅަކުން އިވުނީ އެގޭ ކުދިންގެ މަންމަ 'އަޅެ ނޫން" މިހެންކިޔާ ރޮއެގެންފައި ޚަބަރުހުސްވެގެން ބިންމައްޗަށް ވެއްޓުނުތަނެވެ. އެމީހުންގެ ކިބައިން ވެގެންމިއުޅޭގޮތެއް އެހުމުގެކުރިންވެސް ޔޫސުފަށް މިވެގެންއުޅޭގޮތް ލަފާކުރެވުނެވެ. މިޤައުމުގެ މީހުން އެންމެ ނޭދޭ ކަންތައް ދިމާވީއެވެ. ޔޫސުފުހުރި ގޭގެ އަންހެންކުއްޖާ ގުރުއަތުން ހޮވުނީއެވެ. އެކުއްޖާއަކީ ޔޫސުފު ވަރަށް ލޯބިވާ ނުހަނު އޯގާތެރި މައުސޫމު ކުއްޖެކެވެ. އެކުއްޖާ އޭނާގެ މަންމަގެ ލިބާހުގައި ހިފާ އާދޭސް ކުރަނީއެވެ. "މަންމާ އަހަރެން ސަލާމަތްކުރޭ. މަންމާ އަހަރެން ނުދާނަން. ބައްޕާ އަހަރެން ސަލާމަތްކުރޭ." އެކުއްޖާގެ މާޔޫސްވެފައިވާ ހާލު ބަލާކަށް ޔޫސުފަކަށް ކެތެއްނުވިއެވެ. އެބޮޑުންގެ މީހުން އެތަނުން ދިއުމުން އޭނާ ބުންޏެވެ. "އެކުއްޖާގެ ބަދަލުގައި ދާނީ އަހަރެން." އެ ދެމަފިރިން ޔޫސުފަށް ހައިރާންވެފައިވާ ނަޒަރަކުން ބަލައިލިއެވެ. އެ އަންހެންކުއްޖާ ރޮމުން އާދޭސްކުރިއެވެ. "ބޭބޭ، އަހަރެން ސަލާމަތް ކުރޭ. އާދޭސްކޮށްފަ މިބުނީ. އަހަރެން ސަލާމަތްކުރޭ!"
އެތަކެއް ފަހަރު އެތަކެއް ގޮތްގޮތައް ހޫނު ބަހުސްތަކެއް ކުރުމަށްފަހު ކާމިޔާބު ވެދާނެކަމުގެ ކުޑަކުޑަ ޝުއާއެއް ފެނިއްޖެއެވެ. ރަނގަޅު ތަދުބީރެއް ރޭވިއްޖެއެވެ. އަންހެންކުދިންގެ އަލަތު ކައިވެނީގެ ހެދުމެއްގައި ޔޫސުފު ލަދުން އިސްޖަހައިގެންހުރިތަންފެނިފައި އެގޭ ވެރިމީހާއަށްވެސް ހެވުނެވެ. ނަސީބަކުން އެޤައުމުގެ ސަގާފަތުގެ މަތިން ކައިވެނި ކުރެވޭ އަންހެންކުއްޖާގެ މޫނެއް އެކަކަށްވެސް ނުދައްކާނެއެވެ. އެމީހުން ލާއުޅޭ ސާޅީގެ އެއްބައި އެކުއްޖެއްގެ ބޯމަތިން މޭމައްޗާ ހަމަޔަށް ތިރކޮށް އެކުއްޖެއްގެ މޫނު ނިވާކުރާނެއެވެ. އަދި ޔޫސުފުގެ މޭމަތީގައި އެހެރަ މަލުގެ ހާރުތަކާ ގަހަނާތަކުން މީހަކަށް އެއީ އަންހެން ކުއްޖެއްނޫންކަން އެނގޭނީ ކިހިނަކުންހެއްޔެވެ. އަދި އެމީހުން ޔޫސުފުގެ އަތުން ފެންނަން ހުރި ހިސާބުގާ ޒާތެއްގެ ކަޅު ތެލެއްހާކާ އޭނާގެ ހަމުގެ ކުލަ އެގޭ މީހުންގެ ހަމުގެ ކުލައާއި އެއްވައްތަރު ކޮށްފައިވެއެވެ.
ރަންނަމާރި އަރާރޭގައި އިރުއޮއްސުމާއިއެކު ރަށުތެރޭގައި ސަންގުފުމެވޭނެއެވެ. ބޮޑުފައްޅީގެ ބޮޑުފަދިރީ ހަރުކަށިކަމާއެކު އަމުރުކޮށްފައިވަނީ އެއަޑުއިމުވާއިއެކު އެންމެންވެސް އެބައެއްގެ ގެތަކަށްވަދެ ފިލާތިބުމަށެވެ. އެރޭ ބޭރުތެރޭގައި އުޅޭނީ އެއަންހެންކުއްޖާ އެތުނޑިޔަށްގެންގޮސް އެތާ އެކުއްޖާ ބަނދެ ހަތްޔަރުކުރަންދާ މީހުންކޮޅު އެކަންޏެވެ. މިމީހުންވެސް މިކަން ނިންމާފައި އަވަހަށް އައިސް އެބައެއްގެ ގެތަކަށްވަދެ ފިލާނެއެވެ. ރާވާފައިވާ ގޮތަކީ، މިރޭގެ އަނދިރީގައި އެގެއިން ބަޔަކު ސިއްރިޔާތުގައި އެއަންހެންކުއްޖާ ގޮވައިގެން މާލެއާއި ދުރު އަތޮޅެއްގައި، އެމީހުންގެ ރަހުމަތްތެރި ބައެއްގެ ގާތުގައި އެކުއްޖާ ފޮރުވުމަށެވެ. މިހެން އެކުއްޖާ އެބަހައްޓާ ގޭގެ މިހުންނަކީ މުސްތަޤުބަލުގައި އެކުއްޖާ ކައިވެނި ކުރަން ހަމަޖެހިފައިވާ މީހާގެ ގެއެވެ. މިއީ އެ ކުއްޖާގެ ޅަފަތުގައި މާކުރިންސުރެ އެދެއާއިލާގެ މީހުންވެސް ނިންމާފައިވާގޮތެވެ. އަދި މާދަމާ ހެނދުނު ހެނދުނާ ޔޫސުފުހުރިގޭ މީހުންގެ ބަޔަކު އަވަހަށްއައިސް ޔޫސުފުގެ މަރުވެފައިވާ ހަށިގަނޑު، އެމީހުންގެ އާދަކާދާގައިވާގޮތުގެމަތިން އަންދާލާނީކަމުގައެވެ. ޔޫސުފު ބޭނުންވީ އޭނާ ވަޅުލުމަށެވެ. ނަމަވެސް މިކަމުގައި ހުރި ނުރައްކާތައް ބޮޑުކަމުން އެންމެފަހުން ޔޫސުފު އެކަމާ އެއްބަސްވިއެވެ. މިހުރިހާ ރޭވުމެއްވެސް ރޭވީ ރަންނަމާރިއަކީ ކަނޑު ފުރޭތައެއްކަމަށް އެއެންމެނަށްވެސް ޤަބޫލުކުރެވޭތީއެވެ. ފަޅުތެރޭގައި އެއޮތް ދޯނީގެ ކުރީކޮޅު ފަރުމާކޮށްފައި އެހެރީ ފުރޭތައެއްގެ ސިފައިގައެވެ. އަދި އޭގެ ދެލޮލުގެ ފަހަތުދައި އެމީހުން ފައްޅިގައި ބޭނުންކުރާ ތެޔޮބައްތިއެއް ދިއްލާލީމާ ދުރުން ބަލާމީހަކަށް ހީވާނީ އެއީ ހަމަ ކަނޑު ފުރޭތައެއްހެންނެވެ. ޔަގީނުންވެސް އެމީހާ ދުވާލު މި ދޯނި ބާއްވާނީ ފަޅުރަށެއްގެ ފަޅުތެރޭގައި ކޮންމެވެސް ގޮތަކަށް ފޮރުވާފައެވެ. މިހާރު ޔޫސުފަށް މި ކުޅިގަނޑު ރަނގަޅަށް އެނގިއްޖެއެވެ. އަދި ކުއްލިއަކަށް ދެން ކަންތައް ކުރަންވީގޮތްވެސް ވިސްނިއްޖެއެވެ. ފުރަތަމަ ޔޫސުފު ފަތާފައިގޮސް އެ ކުޑަ ދޯންޏަށް އެރިއެވެ. އަދި އޭގައި ފަލިޖަހާފައި އެއްގަމާގާތްކުރިއެވެ. ދެން އަވަހަށްގޮސް އެ ފާދިރީގަނޑު ދަމާފައި ގެންގޮސް މޫދަށްލިއެވެ. ދެން އޭނާ އަތުލަފުކޮށްގެން ފަތާފައިގޮސް އެ ދޯންޏަށް އަރާ އެމީހާވެސް ލައްކަ ހާލުގައިއުޅެގެން އެ ދޯންޏަށް އެރުވިއެވެ. ޔޫސުފަކީ މިއަށްވުރެ ބޮޑު ނަވެއްގައި އުޅެފައިވާ ކުއްޖެއްކަމުން އޭނާ ވަރަށް ފަސޭހަކަމާއެކު އެދޯނީގެ ރިޔާ ނަގާ އެތާކައިރި ރަށަކާ ދިމާއަށް މިސްރާބު ޖެއްސިއެވެ. މިގައުމުގާ މިހާ ދުވަސްވީއިރު ޔޫސުފަށްވެސް މިރަށުގެ ކައިރީގައިވާ ރަށް ތައް ރަނގަޅަށް އެނގެއެވެ. ވީމާ މިތަނުން ފަޅުރަށަކީ ކޮބައިކަން އޭނައަށް އެނގެއެވެ. ދެން އެތާއެންމެ ކައިރީގައިވާ ފަޅުރަށަށް ކައިރިކޮށްލުމުން އެތާ މޫދުކައިރީގައި އިތުރު ކުޑަ ދޯންޏެއްވެސް އޮއްވާ ފެނިއްޖެއެވެ. ޔޫސުފަށް ހުއްޓުން އެރިއެވެ. އަނެއްކާ އެފަޅުރަށުގައި ބަޔަކުމީހުން އުޅެނީބާވައޭ، އޭނާ ހިތައްއެރިއެވެ. ނަމަވެސް މިހާރު އެހެން ރަށަކަށް ދާހާ ވަގުތެއް ނެތެވެ. ދެން އޭނާ ވަރަށް އަވަހަށް ކޮޅުކޮޅަށް ނަޒަރުހިންގަމުން، އާދޭހުގެ ދުޢާތަށް ކިޔަވަމުން، އެރަށާ ގާތްކުރިއެވެ. ދެންއަނެއްކާވެސް ވަރަށް މަސައްކަތުން އެއްކަލަމީހާގެ ހަށިގަނޑު ދޯނިން މޫދަށްބާލާ އަނެއްކާވެސް އަތުލަފު ކޮށްގެން ފަތާފައި އައިސް އެއްގަމަށް އެރުވިއެވެ. ދެން އަވަހަށް އެމީހާގެ ހަށިގަނޑު ވެލިގަނޑުގައި ދަމަމުން އެރަށުގެ ވަލުތެރެއަށް ވަނެވެ. ގަސްގަހުގެ ފަތްތައްތެރެއިންލާފައި ވައިރޯޅި ދެމިލާއަޑަށްވެސް ޔޫސުފުގެ ނޭވާ ހުއްޓެއެވެ. މޭގަނޑު އަނގަޔަށް އާދެއެވެ. ނަމަވެސް އެހިނދު ޔޫސުފުގެހިތުގައި ހިނގާދިޔައީ އޭނާގެ ބައްޕަ ވަރަށްގިނައިން ބުނެއުޅޭ އަރަބިންގެ މުސްކުޅި ބަހެއްކަމައްވާ، "މަސައްކަތްކުރާ މީހަކަށް އޭނާގެ ލަނޑުދަނޑި ހާސިލުވާނެއޭ" މިބަސްތަކެވެ. ދެން ހިތްވަރުކޮށްލައިގެން އޭނަ އެކަންތައް ކޮށްނިންމާލިއެވެ. ދެން އޭނަ ކުރިކަމަކީ އެ ދޯނީގައި ފަޅުން ބޭރަށް ނުކުމެފައި އެދޯނިން ފެނުނު ފުރޮޔަކުން އޭގެ ވަތުތެރޭގައި ބޯޑު ލޯވަޅެއް އެޅުމެވެ. މިހެން ހެދުމާއިއެކު ދޯނި ތެރެއަށް ލޮނުގަނޑު ވަދެގަތެވެ. ދެން އިސާހިތަކު އެ ކުޑަ ދޯނި ކަނޑަށް ގެނބިއްޖެއެބެ. ދެން އަނެއްކާ ފަތާފައި އެރަށާގަތްގޮށްފައި އެތާއޮތް އަނެއްދޯންޏަށް އަރާ އަވަސް އަވަހަށް އޭގައި ދަތުރުކޮށްފާ ޔޫސުފު ހުރިރަށްކަމަށްވާ މާލޭގެ، އެއްކަލަ ތުނޑިޔާ ކާރިކޮށްލިއެވެ. ދެން އޮތީ އެންމެ ފަހު ފެތުންގަނޑެވެ. މިހުރިހާ ކަންތަކެއްކޮށްނިމުނު އިރު ފަތިސްވާންގާތްވެއްޖެއެވެ. ޔޫސުފު ހުރީ ވަރަށް ވަރުބަލިވެފައެވެ.
ފަތިހުގެ އަލިކަން ކިރިޔަ ކިރިޔާ އުދަރެސްމަތިން ފާއްދާލިތަނާހެން ޔޫސުފުހުރިގޭމީހުން ދުވަމުން އެތަނަށް އަތުވެއްޖެއެވެ. އައިއިރު އެމީހުންނަށް ފެނުނީ އަތިރި މަތީގައި ފައިވަށްކޮށްލައިގެން ކޮންމެވެސް އެއްޗެއް ކިޔަވާލަ ކިޔަވާލާ އިން ޔޫސުފެވެ. ޔޫސުފަކީ ޤުރުއާން ހިތުދަސް ކުއްޖެއްކަމުން އޭނާ އިނީ މޫދު ލޮނުން ރަނގަޅަށް ސާފުވެ ގަޔާ ހެދުމާ ދޮވެ ލޭތައްފިލުވައިގެން ވުލޫކޮށްލައިން ޤުރުއާން ކިޔަވާށެވެ. އެއިރުގެ ދިވެހިންގެ ބުދުދީނުގައިވެސް އެމީހުން ޒާތްޒާތުގެ ކިޔެވެލިތައް ކިޔަވާ އުޅޭކަމުން އެމީހުނަށް ޔޫސުފުގެ ޤުރުއާން ކިޔެވުމަކުން އެހާ ހައިރާނެއް ނުވިއެވެ. އެމީހުންހައިރާންވީ ކަމަކީ ޔޫސުފު ސަލާމަތު ދިރިހުރިކަމަށްޓަކައެވެ. އެމީހުންގެ ސުވާލަކީ، "ޔޫސުފު ކަލޭ ކިހިނެއް އެ ފުރޭތަކިބައިން ތި ސަލާމަތްވީ؟"
"ޔޫސުފު ހިނދުކޮޅަކު ވިސްނަން އިނދެފައި ހަޤީޤަތް ފޮރުވަމުންމެ، ތެދުތެދަށް ޖަވާބުދިނެވެ. "ހުރިހާކަމަކުންމެ އަހަރެން ރައްކާތެރި ކޮށްދެނީ އަހަރެންގެ ވެރި ރަސްކަލާނގެ. އެއީ އެފަދަ ދެވައެއްނުވާ އެންމެހާބާރުތަކެއްގެ ވެރިރަސްކަލާނގެ. އެމާތްކަލާންގެ ވާގިފުޅާއެކު އަހަރެން އެނުބައި ރަންނަމާރީގެ ކިބައިން ކަލޭމެން ސަލާމަތްކޮށްދީފިން."
އެ މީހުންނަށް އެވަގުތު އެކަން ނޭގުނުކަމުގައިވިޔަސް އެ ޒުވާނާ އެއީ ހަޤީޤަތުގައިމެ ރާއްޖޭގެ އެތައް ޖީލެއްގެ މީހުން ސަލާމަތް ކުރި ކުއްޖާއެވެ. އެއީ ޣަފުލަތުގެ އަނދިރިކަމުން ހިދާޔަތުގެ އަލިކަމަށް މިރާއްޖެ ގެނެސްދިން މާތް ބަތަލެވެ.
އިސާހިތަކު މުޅިރަށުތެރޭގައި މިޚަބަރު ފެތުރި ގުގުމައިލިއެވެ. މީހުންގަނޑު އެތަނަށް އެއްވާން ފަށިއެވެ. ދެން ލަހެއްނުވެ މި ޚަބަރު ރަދުންނަށް އިވިވަޑައިގެން އެމަނިކުފާނު ފުރިހަމަ ޢިއްޒަތުގައި އެތަނަށް ވަޑައިގަތެވެ. އެ މަނިކުފާނު އެ ޒުވާނާކުރެން އޭނަގެ ނަން އެއްސެވިއެވެ.
އެހިނދު އެ ޒުވާނާ ޖަވާބުދިނެވެ. "އަޅުގަނޑަށް ކިޔަނީ އަބްދުލް ބަރަކާތު ޔޫސުފް އަލް ބަރްބަރީ."
- ނިމުނީ -