ރާއްޖޭގެ ގައުމީ ފުޓްބޯޅަ ޓީމުގެ ކުޅުންތެރިން ތިބީ ވަރަށް ފައްސި ވިސްނުމެއްގައި ކަމަށާއި، ފިލިޕީންސްއާ ވާދަކޮށް ޕޮއިންޓެއް ހޯދުމަށް ގަދައަޅައި މަސައްކަތްކުރާނެ ކަމަށް ޓީމުގެ ކޯޗު އަލީ ސުޒެއިން ބުނެފިއެވެ.
އޭއެފްސީ އޭޝިއަން ކަޕް ކޮލިފައިންގައި ފިލިޕީންސްއާ ވާދަކުރުމަށް ގައުމީ ޓީމުން ތައްޔާރުވަމުން އަންނައިރު، މިކަމާއި ގުޅޭގޮތުން "ޕީއެސްއެމް ނިއުސް" އަށް ދިން އިންޓަވިއުއެއްގައި ސުޒެއިން ބުނީ މި މަހުގެ 19 ވަނަ ދުވަހު އިންޑިއާއާ ދެކޮޅަށް ކުޅުނު އެކުވެރިކަމުގެ މެޗަކީ ލިބުނު ވަރަށް ބޮޑު ތަޖުރިބާއެއްކަމަށެވެ. އެމެޗުން ލިބުނު ފިލާވަޅުތަކުން ކަންކަން އިތުރަށް ރަނގަޅުކޮށް ފިލިޕީންސްއާ ދެކޮޅަށް ނުކުންނާނީ ހޯދޭނެ އެންމެ ގިނައަކުން ޕޮއިންޓް ހޯދުމުގެ އަޒުމުގައި ކަމަށެވެ.
"މީ އަވޭ މެޗެއް. އެހެންކަމުން ޕޮއިންޓެއް ހޯދުން ފުރަތަމަ ކަމަކީ. ޕޮއިންޓެއް ހޯދުމޭ އަޅުގަނޑު ދެންނެވިޔަސް އެއީ އެއް ނޫން ފޯކަސްއަކީ. ރާއްޖެ އޭޝިއަން ކަޕްގައި ކުރިއަށްދާން މެކްސިމަމް އޭގެ ތެރެއިން ނެގެން އޮތް އެއްޗެއް ނެގުން އަޒުމަކީ" ސުޒެއިން ބުންޏެވެ.
އިންޑިއާ މެޗަށް އިޝާރާތްކޮށް ސުޒެއިން ބުނީ އަވައްޓެރި އިންޑިއާއާ ގައުމީ ޓީމުން ކުރިމަތިލީ ނުކުޅެ ތިބޭތާ ގިނަ ދުވަސްތަކަކަށްފަހުގައި ކަމަށެވެ. އެހެންކަމުން ކުޅުންތެރިންނަށް އެ މެޗުން ގޮންޖެހުންތަކަކާ ކުރިމަތިވި ކަމަށާއި، މެޗުން ފާހަގަކުރެވުނު ކަންކަމުގެ ތެރޭގައި ގައުމީ ޓީމުން ސެޓް ޕްލޭސްއަށް އެކަށީގެންވާ ވަރަށް ތައްޔާރުވެވިފައި ނެތްކަން ފެނިގެން ދިޔަކަމަށް ސުޒެއިން ފާހަގަކުރިއެވެ.
އަންނަ އަންގާރަ ދުވަހު ފިލިޕީންސްއާ ދެކޮޅަށް ނިކުންނާނީ މިކަންކަމަށް ވިސްނައިގެން ކަމަށާއި، ނިމިދިޔަ މެޗުގައި ހެދުނު ގޯސްތައް ރަނގަޅުކޮށް، ކުޅުން އިތުރަށް ރަނގަޅުކޮށްފައިވާ ކަމަށް ސުޒެއިން ބުންޏެވެ.
"ހުރިހާ އެންމެން ފަހަތަށް ފައިބައިގެން ޑިފެންސްކުރުމުގެ ބަދަލުގައި ހަމަ ކުޅެފައި ކައުންޓަރ އެޓޭކުވެސް ކުރުން" ކުރިއަށް އޮތް މެޗުގައި ސަމާލުކަންދޭނެ ކަންކަމާ ގުޅޭގޮތުން ސުޒެއިން މައުލޫމާތުދިނެވެ.
ގައުމީ ޓީމަކީ މީގެ ކުރިންވެސް ފިލިޕީންސްއާ ވާދަކޮށް ރަނގަޅު ކުޅުމެއް ދައްކާފައިވާ ޓީމެއްކަން ފާހަގަކުރަމުން ސުޒެއިން ބުނީ ޓީމުގައި ތިބި ތަޖުރިބާކާރު ކުޅުންތެރިންގެ ހުނަރު ބޭނުންކޮށްގެން އެކުޅުންތެރިންގެ ވިސްނުމާއި އެއްގޮތަށް ރަނގަޅު ކުޅުމެއް ދެއްކުމަށް ވިސްނާފައިވާ ކަމަށެވެ. ޓީމުގެ ބައެއް ކުޅުންތެރިންނަކީ މީގެ ކުރިން ފިލިޕީންސް ކޮޅަށް ލަނޑު ޖަހާފައިވާ މޮޅު ކުޅުންތެރިން ކަމަށް ސުޒެއިން ބުންޏެވެ.
އޭޝިއަން ކަޕް ކޮލިފައިންގައި ފިލިޕީންސްއާ ދެކޮޅަށް ކުޅޭ މެޗު އޮންނާނީ 25 ވަނަ ދުވަހުގެ ހަވީރު 16:00 ގައި ފިލިޕީންސްގައެވެ. މި މެޗު ޕީއެސްއެމްގެ ޔެސް ޓީވީން ވަގުތުން ދައްކާގޮތަށް ވަނީ ހަމަޖެހިފައެވެ.
އޭޝިއަން ކަޕް ކޮލިފައިންގައި ހަ މެޗެއް ރާއްޖެއިން ކުޅުމަށްވަނީ ތާވަލްކޮށްފައެވެ. އޭގެ ތެރެއިން ފުރަތަމަ ތިން މެޗު ކުޅޭނީ ރަށުން ބޭރުގައެވެ. އެގޮތުން ފިލިޕީންސް މެޗަށްފަހު، ޖޫން މަހުގެ 10 ވަނަ ދުވަހު ރާއްޖެ ނުކުންނާނީ އީސްޓް ޓިމޯއާ ދެކޮޅަށެވެ. އެއަށްފަހު އޮންނާނީ އޮކްޓޯބަރު ނުވަވަނަ ދުވަހު ތަޖަކިސްތާނާ ދެކޮޅަށް ކުޅޭ މެޗެވެ.
އޭޝިއަން ކަޕް ކޮލިފައިންގައި ރާއްޖޭގައި ކުޅޭ މެޗުތަކުގެ ތެރެއިން ފުރަތަމަ މެޗުގައި އޮކްޓޫބަރު މަހުގެ 14 ގައި ބައްދަލުކުރާނީ ތަޖަކިސްތާނާއެވެ. އަދި ދެވަނަ މެޗުގައި ނޮވެމްބަރު މަހުގެ 18 ގައި ފިލިޕީންސްއާ ދެކޮޅަށް ކުޅުމަށްފަހު، ގައުމީ ޓީމުން ދެން ނުކުންނާނީ އަންނަ އަހަރުގެ މާޗު މަހުގެ 31 ގައި އީސްޓް ޓިމޯއާ ދެކޮޅަށެވެ.