ޚަބަރު

ސަކާގެ ލަނޑުން އާސެނަލް މޮޅުވެއްޖެ


އިނގިރޭސި ޕްރިމިއަރ ލީގުގައި ރޭ ފުލަމްއާ ދެކޮޅަށް ކުޅުނު މެޗުގައި ބުކަޔޯ ސަކާ ކާމިޔާބުކޮށްދިން ލަނޑާއެކު، 2-1 ގެ ނަތީޖާއަކުން އާސެނަލް މޮޅުވެއްޖެއެވެ.

ލަންޑަނުގެ އެމިރޭޓްސް ސްޓޭޑިއަމްގައި ފަސްދޮޅަސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 37 ވަނަ މިނިޓުގައި މިކޭލް މެރީނޯ ވަނީ ލަނޑެއް ޖަހައި އާސެނަލްއަށް ކުރި ހޯދަދީފައެވެ.

އާސެނަލްގެ ކޯޗު މިކޭލް އާޓޭޓާ ވަނީ އަނިޔާގެ ސަބަބުން ކުޅުމާއި ދުރުގައި ގިނަ ދުވަސްތަކެއް ވަންދެން ހުރި ބުކަޔޯ ސަކާއަށް މެޗުގެ ދެވަނަ ހާފުގައި ފުރުސަތު ދީފައެވެ.

އަދި އޭނާ ކުޅެން އެރިތާ ހަތް މިނިޓު ފަހުން މެޗުގެ 73 ވަނަ މިނިޓުގައި ސަކާ ވަނީ ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފަ އެވެ.

ފުލަމް އިން މި މެޗުގައި ޖެހި ހަމައެކަނި ލަނޑު މެޗުގެ އިތުރު ވަގުތުގެ ކުޅުމުގައި އެ ޓީމަށް ކާމިޔާބު ކޮށްދީފައިވަނީ ރޮޑްރިގޯ މުނީޒްއެވެ. މުނީޒް ގޯލަށް އަމާޒުކޮށް ފޮނުވާލި ބޯޅަ އާސެނަލްގެ ޑިފެންޑަރު ވިލިއަމް ސަލީބާގެ ގައިގައި ޖެހިފައި ބޯޅައިގެ މިސްރާބު ބަދަލުވެގެން ގޮސް ގޯލުގެ ތެރެއަށް ވަންއިރު، ގޯލްކީޕަރު ޑޭވިޑް ރާޔާއަށް ކުރެވުނު މާބޮޑު ކަމެއް ނެތެވެ.

މި މެޗުން އާސެނަލް މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 30 މެޗުން 61 ޕޮއިންޓާއެކު ތާވަލުގެ ދެވަނަ މަގާމު ލިބިފަ އެވެ. ފުލަމްއަށް ލިބިފައިވާ 45 ޕޮއިންޓާއެކު އެ ޓީމު އޮތީ ތާވަލުގެ އަށްވަނަ މަގާމުގައެވެ.