އޯޓިޒަމް ހުންނަ ކުދިންނަށް އަޅާލުމާއި ލޯބި ދިނުމަކީ ޤައުމީ ވާޖިބެއް: ރައީސް
-
ކޮންމެ ދިވެހި ދަރިއަކީ ޤައުމަށް މުހިންމު، އަދި އަގުހުރި ދަރިއެއް
-
އޯޓިޒަމް ތަހައްމަލުކުރާ ކޮންމެ ކުއްޖަކީވެސް ޤައުމަށް މަންފާކޮށްދޭނެ އެތައް ހުނަރެއް ހުރި ކުއްޖެއް
އޯޓިޒަމް ހުންނަ ކުދިންނަށް އަޅާލުމާއި ލޯބި ދިނުމަކީ ޤައުމީ ވާޖިބެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ބައިނަލްއަގްވާމީގޮތުން ފާހަގަކުރާ އޯޓިޒަމް ދުވަހާ ގުޅިގެން ކުރެއްވި ޕޯސްޓެއްގައެވެ.
ސޯޝަލް މިޑިއާގައި ރައީސުލްޖުމްހޫރިއްޔާ ހިއްސާ ކުރެއްވި ޕޯސްޓުގައި ވިދާޅުވީ ކޮންމެ ދިވެހި ދަރިއަކީ ޤައުމަށް މުހިންމު، އަދި އަގުހުރި ދަރިއެއް ކަމަށެވެ. އަދި އޯޓިޒަމް ތަހައްމަލުކުރާ ކޮންމެ ކުއްޖަކީވެސް ޤައުމަށް މަންފާކޮށްދޭނެ އެތައް ހުނަރެއް ހުރި މޮޅު ކުދިންތަކެއް ކަމަށްވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ އޯޓިޒަމް ތަހައްމަލު ކުރާ ކޮންމެ ކުއްޖަކަށްވެސް އަޅާލުމާއި ލޯބި ދޭންޖެހޭ ކަމަށާއި އެއީ ޤައުމީ ވާޖިބެއް ކަމަށެވެ.
— Dr Mohamed Muizzu (@MMuizzu) April 2, 2025
ބައިނަލްއަގުވާމީ ފެންވަރުގައި އޯޓިޒަމް ދުވަސް ފާހަގަކުރަނީ އޯޓިޒަމް ހުންނަ ފަރާތްތަކުގެ ޙައްގުތަކާއި އޯޓިޒަމާ ގުޅޭގޮތުން ހޭލުންތެރިކަން އިތުރުކުރުމަށެވެ. އެންމެ ފުރަތަމަ މި ދުވަސް ފާހަގަކުރަން ފެށީ 2 އޭޕްރިލް 2007ގައެވެ.
އޯޓިޒަމާއި ގުޅޭގޮތުން ހޭލުންތެރިކުރުވުމުގެ ދުވަހުގެ މިއަހަރުގެ ޝިޢާރަކީ، "އެޑްވާންސިންގ ނިއުރޯޑައިވަރސިޓީ އެންޑް ދަ ޔޫއެން ސަސްޓެއިނަބަލް ޑިވެލޮޕްމަންޓް ގޯލްސް" މިޝިޢާރެވެ. މިއީ ސިޔާސަތުތައް ކަނޑައެޅުމުގައި އޯޓިޒަމް ހުންނަ ފަރާތްތަކުގެ ބައިވެރިވުން އޮންނާނެހެން ތަރައްޤީގެ މަސައްކަތްތައް ރޭވުމަށް ބާރު އެޅުމަށް އަލިއަޅުވާލާ ޝިޢާރެކެވެ.
އޯޓިޒަމް އެސޯސިއޭޝަން އޮފް މޯލްޑިވްސްއިން މައުލޫމާތު ދެއްވާ ގޮތުގައި މިވަގުތު އެތަނުން 168 ކުއްޖަކު އަންނަނީ ޚިދުމަތް ހޯދަމުންނެވެ.