ރައީސްގެ "ރައްޔިތުންނާ އެކު" ޕޮޑްކާސްޓުގެ ދެވަނަ އެޕިސޯޑް މިއަދު
-
ޕޮޑްކާސްޓުގައި ރައްޔިތުންގެ ސުވާލުތަކަށް ޖަވާބުދެއްވާނެ
-
ޤައުމުގެ މުހިންމު ކަންކަމާ ގުޅޭގޮތުން މައުލޫމާތު ހިއްސާކުރައްވާނެ
ސަރުކާރާ ގުޅުންހުރި މަޢުލޫމާތުތައް ހިއްސާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިއަށްގެންދަވާ ޕޮޑްކާސްޓުގެ ދެވަނަ އެޕިސޯޑް މިއަދު ގެނެސްދޭނެއެވެ.
ރައީސުލްޖުމްހޫރިއްޔާގެ އޮފީހުން ވިދާޅުވީ މިއީ ރައްޔިތުންނަށް ވީހާވެސް ގާތުން މައުލޫމާތު ހިއްސާކޮށް، ރައްޔިތުންގެ ޚިޔާލުތަކާއި ސުވާލުތަކަށް ޖަވާބުދެއްވުމަށް "ރައްޔިތުންނާ އެކު"ގެ ނަމުގައި ރައީސުލްޖުމްހޫރިއްޔާ ކުރިއަށްގެންދަވާ ޕޮޑްކާސްޓެއް ކަމަށެވެ.
މި ޕޮޑްކާސްޓުގެ ފުރަތަމަ އެޕިސޯޑް މިދިޔަ ހަފުތާގެ ބުރާސްފަތި ދުވަހު ވަނީ ގެނެސްދީފައެވެ. އެ އެޕިސޯޑުގައި ރައީސުލްޖުމްހޫރިއްޔާ ވަނީ ޤައުމުގައި މިވަގުތު ހުރި ކަންކަމާގުޅޭގޮތުން މައުލޫމާތު ދެއްވައި ރައްޔިތުންގެ ހުރި ސުވާލުތަކަށް ޖަވާބު ދެއްވާފައެވެ.
ރައްޔިތުންނާ އެކު ޕޮޑްކާސްޓުގެ ދެވަނަ އެޕިސޯޑް މިއަދު މެންދުރު 1:00 ޖަހާއިރު ޓީވީއެމް އަދި ޕީއެސްއެމް ނިއުސް އިން ގެނެސްދޭނެއެވެ.
ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށްގެންދަވާ މި ޕޮޑްކާސްޓް ހޯސްޓުކުރައްވަނީ ކުރީގެ ޓީވީ ޝޯތަކުން ފެނިގެންގޮސްފައިވާ ގިނަބައެއްގެ މެދުގައި މަގުބޫލު ޕްރެޒެންޓަރު އަހުމަދު ޝަކީބު (ޝަކީއްބެ)އެވެ.