9 ރަށެއްގެ ފެނާއި ނަރުދަނާގެ އަމަލީ މަސައްކަތް ފަށައިފި

ސާފުފެނާއި ރައްކާތެރި ނަރުދަމާ މުޅި އާބާދީއަށް ކަށަވަރުކޮށްދިނުމުގެ ސިޔާސަތުގެ ދަށުން 9 ރަށެއްގެ ފެނާއި ނަރުދަމާގެ މަސައްކަތް ފެށިގެން ކުރިއަށް ދާކަމަށް މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވެއްޖެވެ.

ފެނުގެ ޚިދުމަތުގެ ކަށަވަރުކަން އިތުރުކުރުމަކީ އެމްޑަބްލިއުއެސްސީގެ އެންމެ މުހިންމު އެއް އަމާޒެވެ. އެގޮތުން، ގްރޭޓަރ މާލެ ސަރަހައްދުގައި ހުންނަ ފެން އުފައްދާ މައި މަރުކަޒުގެ އިތުރުން މާލޭގެ އެހެން ދެ ސަރަހައްދެއްގައި ފެން އުފައްދާ ދެ މަރުކަޒެއް ގާއިމްކޮށް، ފެން އުފެއްދުން ވަނީ ލާމަރުކަޒު ކުރެވިފައެވެ.

މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވީ ސާފުފެނާއި ރައްކާތެރި ނަރުދަމާ މުޅި އާބާދީއަށް ކަށަވަރުކޮށްދިނުމުގެ ސިޔާސަތުގެ ދަށުން ގިނަ ރަށްތަކެއްގެ މަސައްކަތް ފެށިގެން ކުރިއަށް ދާކަމަށެވެ. އެގޮތުން އިމާރާތްކުރުމާ ގެދޮރުވެރިކަމާ ބިނާރާބެހޭ ވުޒާރާއިން އެމްޑަބްލިއުއެސްސީއާއި ހަވާލުކޮށްފައިވާ ރައްތަކުގެ ތެރެއިން 9 ރަށެއްގެ ފެނާއި ނަރުދަމާގެ މަސައްކަތް ފެށިގެން ކުރިއަށްދާކަމަށް މަތީން ވިދާޅުވިއެވެ.

އޭގެތެރޭގައި ށ.ނޫމަރާ އަދި އެއަތޮޅު ބިލެތްފަހީގެ އިތުރުން ނ. މިލަދޫއާއި އެއަތޮޅު މަގޫދޫގައި ފެނުގެ ޚިދުމަތް ޤާއިމްކުރުމުގެ މަސައްކަތް ކުރުމަށް ބޭނުންވާ އެކްސްކަވޭޓަރ އެ ރަށް ރަށަށް ގެންގޮސް، އާރް.އޯ ބިލްޑިންގްގެ ސައިޓް ސާފުކުރުމުގެ މަސައްކަތް އެމްޑްބްލިޔުއެސްސީގެ މުވައްޒަފުން ފަށާފައިވާކަމަށް މަތީން ވިދާޅުވިއެވެ. ނޫމަރާގައި ގޭގެއަށް ޚިދުމަތް ގުޅުމަށް ކުރަންޖެހޭ ސަރވޭގެ މަސައްކަތް މިހާރުވަނީ ޝެޑިއުލް ކުރެވިފައިކަމަށް މަތީން ވިދާޅުވިއެވެ.

ހަމައެހެންމެ ބިލެތްފަހި އަދި މިލަދޫގައި ފެން މީޓަރތައް އެސެމްބްލް ކުރުމުގެ މަސައްކަތް އެމްޑަބްލިޔުއެސްސީގެ މުވައްޒަފުން ފަށާފައިވާކަމަށްވެސް މަތީން ވިދާޅުވިއެވެ.

މީގެއިތުރުން ނ.މަގޫދޫގައި ފެނުމުގެ ޚިދުމަތް ޤާއިމްކުރުމުގެ މަސައްކަތަށް ބޭނުންވާ ސާމާނު ގެންގޮސް، ގޭގެއަށް ޚިދުމަތް ގުޅުމަށް ކުރަންޖެހޭ ސަރވޭގެ މަސައްކަތާއި ފެން މީޓަރތައް ގޭގެއަށް ގުޅުމުގެ މަސައްކަތް ކުރަމުންދާކަމަށް މަތީން ވިދާޅުވިއެވެ. އަދި ބ. ކުޑަރިކިލުގެ މަސައްކަތް ފަށައިގަތުމަށް ބޭނުންވާ އެކްސްކަވޭޓަރ ރަށަށް ގެންދިޔުމާއެކު އާރ.އޯ ބިލްޑިންގް ގެ މަސައްކަތް ފެށުމަށް ކުރަންޖެހޭ ކަންކަމަށް އެމް.ޑަބްލިޔު.އެސް.ސީގެ މުވައްޒަފުން ވަނީ ސައިޓަށް ގޮސްފައިކަމަށް ވިދާޅުވިއެވެ.

އދ. ފެންފުށީގެ ފެނުގެ ނިޒާމުގެ މަސައްކަތް އަލުން ފަށައިގަތުމަށް ބޭނުންވާ ސާމާނުވެސް އެ ރަށަށް ގެންދެވި އާރ.އޯ ބިލްޑިންގް ސައިޓު ސާފުކުރުމާއި މ. ރަތްމަންދޫގެ ގޭގެއަށް ޚިދުމަތް ގުޅުމަށް ކުރަންޖެހޭ މަސައްކަތްތައްތަކާއެކު އާރ.އޯ ބިލްޑިންގް ސައިޓް ސާފުކުރުމުގެ އިތުރުން ތ.ދިޔަމިގިލީގެ މަސައްކަތް ފެށުމަށް ސާމާނު ރަށަށް ގެންދެވި އާރް.އޯ ބިލްޑިންގގެ ސައިޓް ސާފުކުރުމުގެ މަސައްކަތްވެސް ވަނީ ފަށާފައެވެ.

މީގެ އިތުރުން ތ. މަޑިފުށީގެ މަސައްކަތް ފެށުމަށް ކުރަން ޖެހޭ އެންމެފަހުގެ ތައްޔާރީތައް އެ ކުންފުނިން ވަނީ ތައްތާރުވެފައެވެ. ރާއްޖޭގެ އެކިކަންކޮޅުތަކުގައި ހުއްޓިފައިވާ ފެނާއި ނަރުދަމާގެ ހުރިހާ މަޝްރޫޢެއްގައި ދިމާވެފައިވާ މައްސަލަތައް ޙައްލުކޮށް ސަރުކާރުގެ ފުރިހަމަ ބާރު އޮންނަގޮތަށް އެ މަޝްރޫއުތައް ފެށިގެން ކުރިއަށްގެންގޮސް ނިންމަވާނެކަމަށް ސަރުކާރުން ވަނީ ވިދާޅުވެފައެވެ.