މުޝްފިޤް ހޯދުމަށް 53 އަކަނޯޓިކަލް މޭލުގެ ސަރަޙައްދެއް ބަލައިފި

ދޯނީގައި ރޯވެ ހިނގި އަލިފާނުގެ ހާދިސާގައި ގެއްލިގެން ހޯދަމުންދާ ޢަލީ މުޝްފިޤް ޝަރީފް ހޯދުމަށްޓަކައި މިހާތަނަށް 53 ނޯޓިކަލް މޭލަށްވުރެ ބޮޑިު ސަރަޙައްދެއް ބަލާފައިވާކަމަށް އެމްއެންޑީއެފްއިން ވިދާޅުވެއްޖެއެވެ.

ޢަލީ މުޝްފިޤް ހޯދުމުގެ މަސައްކަތް ކޯސްޓްގާޑްގެ ތިން އުޅަނދެއްގެ އިތުރުން ޑައިވަރުންނާއި އެއާރ ކޯރގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ހުއްޓުމެއްނެތި ކުރައްވަމުންދާކަމަށް އެމްއެންޑީއެފްއިން ވިދާޅުވެއެވެ.

‎ތ. ހިރިލަންދޫއިން ފުރައިގެން މާލެ ދަތުރުކުރަމުން ދަނިކޮށް "ހޮޅުދޫ ބޯޓު" މުދާ އުފުލާ ބޯޓުގައި އަލިފާން ރޯވެފައިވަނީ ރޭގެ ވަގުތެއްގައެވެ.

މިޙާދިސާގައި ގެއްލިގެން ހޯދަމުންދާ ޢަލީ މުޝްފިޤް ޝަރީފް ހޯދުމަށް އެމްއެންޑީއެފްގެ ސަރޗް އެންޑް ރެސްކިއުގައި މިހާތަނަށް 53.04 އަކަކިލޯ މީޓަރުގެ ސަރަޙައްދެއް ބަލާފައިވާކަމަށް އެމްއެންޑީއެފްއިން ވިދާޅުވެއެވެ. އަދި ކަނޑު އަޑީގެ 64240 އަކަމީޓަރުގެ ސަރަޙައްދެއް ބަލާފައިވާކަމަށެވެ. އަދި ވައިގެ މަގުން 4000 އަކަ ކިލޯމީޓަރުގެ ސަރަޙައްދެއް ބަލާފައިވާކަމަށް އެމްއެންޑީއެފްއިން ވިދާޅުވެއެވެ.

މި ބޯޓުން ދަތުރު ކުރީ ކެޕްޓަނާއެކު 18 މީހުންނެވެ. އޭގެތެރެއިން އެކަކު ފިޔަވައި އެންމެން ސަލާމަތްކޮށްފައިވާކަމަށް އެމްއެންޑީއެފުން ވިދާޅުވިއެވެ. އަދި މިހާތަނަށް ނުފެނިވަނީ ލ.މާވަށަށް ނިސްބަތްވާ ޢުމުރުން 25 އަހަރުގެ ޢަލީ މުޝްފިގް މުހައްމަދު ޝަރީފެވެ.

އަލިފާނުގެ ޙާދިސާއަށްފަހު ބޯޓު އަޑިއަށް ގޮސް އޭގެ ބައިތައް އޮޔާދާތީ އެ ސަރަހައްދުން ދަތުރުކުރާ ފަރާތްތަކުން ޚާއްޞަ ސަމާލުކަމެއް ދިނުމަށް އެމްއެންޑީއެފުން ވަނީ އިލްތިމާސްކުރައްވާފައެވެ.