ބާސެލޯނާގެ ޑެނީ އޮލްމޯ އާއި ޕައު ވިކްޓާއަށް މި ސީޒަނުގެ ނިޔަލަށް ކުޅެވޭނެ ކަމަށް ސްޕެއިންގެ ނެޝަނަލް ސްޕޯޓްސް ކައުންސިލުން ނިންމައިފިއެވެ.
ޑެނީ އޮލްމޯ އާއި ޕައު ވިކްޓާއަށް މިދިޔަ ހޫނު މޫސުމުގައި ސްޕެނިޝް ލީގުން ވަނީ ވަގުތީ ހުއްދައެއް ދީފައެވެ. ނަމަވެސް ލީގުގައި ވާދަކުރާ ކްލަބްތަކުގެ މާލީ ހިސާބުތައް ހުންނަން ޖެހޭ ގަވާއިދުތަކުގައި ބުނާ ކަންތައްތައް ބާސެލޯނާއަށް ފުރިހަމަ ނުވާތީ އެކަންތައް ހައްލު ކުރުމަށް މިދިޔަ ޑިސެމްބަރު މަހުގެ ނިޔަލަށް ވަނީ އަނެއްކާވެސް ވަގުތީ ހުއްދައެއް ދީފައެވެ.
އަދި ބާސެލޯނާ އިން ވަނީ އެ މައްސަލަ ސްޕެއިންގެ ނެޝަނަލް ސްޕޯޓްސް ކައުންސިލަށް ހުށަހަޅައި، އެކަމަށް ވަގުތީ ހައްލެއް ހޯދާފައެވެ. ނަމަވެސް އިއްޔެ އެ އިދާރާއިން ވަނީ އެ ދެކުޅުންތެރިންނަށް މި ސީޒަނުގެ ނިޔަލަށް ކުޅެވޭނެ ކަމަށް ނިންމާފައެވެ. އެކަމަކު ކުރިއަށް އޮތް ސީޒަން ފެށުމުގެ ކުރިން ބާސެލޯނާއިން އެ ޓީމުގެ މާލީ ހާލަތު ރަނގަޅު ކުރެވޭނެ ގޮތްތަކެއް ހޯދައިގެން ނޫން ގޮތަކަށް އިތުރު ކުޅުންތެރިން ރަޖިސްޓަރީ ނުކުރެވޭނެ އެވެ.
މިދިޔަ ބުދަ ދުވަހު ސްޕެނިޝް ލީގުން ބުނެފައިވަނީ އެ ދެ ކުޅުންތެރިން ރަޖިސްޓަރީކޮށް އެ ކުޅުންތެރިންނަށް މުސާރަ ދެވޭނެ މާލީ ތަނަވަސްކަން ބާސެލޯނާގައި ނެތް ކަމަށެވެ.
ނަމަވެސް ސްޕޯޓްސް ކައުންސިލުން ވަނީ ސްޕެނިޝް ލީގާއި ސްޕެއުންގެ ފުޓްބޯޅަ ފެޑަރޭޝަނާ ދެމެދު ހަދާފައިވާ އެއްބަސްވުން ބާތިލުކޮށް، އެ ކުޅުންތެރިންގެ ހައްގުތައް ވަގުތީ ގޮތުން ނަމަވެސް ހިމާޔަތްކޮށްދީފަ އެވެ. އެއާއެކު މި މައްސަލަ މަތީ ކޯޓުގައި އިސްތިއުނާފު ކުރާނެ ކަމަށް ސްޕެނިޝް ލީގުން ވަނީ ބުނެފަ އެވެ.
ބާސެލޯނާގެ މާލީ ހާލަތު ރަނގަޅު ކުރުމަށްޓަކައި ވަނީ އެ ޓީމުގެ ސްޓޭޑިއަމްގެ ވީއައިޕީ ބޮކްސްތައް ވިއްކާލުމަށްޓަކައި މިދިޔަ ޖެނުއަރީ މަހުގެ ތިންވަނަ ދުވަހު އެއްބަސްވުމެއްގައި ސޮއިކޮށްފައެވެ. އަދި މި އެއްބަސްވުމުގެ ދަށުން އެ ޓީމަށް 83 މިލިއަން އެމެރިކާ ޑޮލަރުގެ އިތުރު އާމްދަނީ އެއް ލިބިގެންދާނެއެވެ.
ނަމަވެސް ސްޕެނިޝް ލީގުން ބުނެފައިވަނީ މި ހިސާބުތައް ބާސެލޯނާއިން މިދިޔަ ހަފްތާގައި ހުށައަޅާފައިވާ ލިޔެކިއުންތަކުގައި ހިމަނާފައި ނުވާ ކަމަށެވެ. އަދި އެ އެއްބަސްވުމުގެ ސައްހަކަން ކަނޑައަޅާފައިވަނީ ނަން ހާމަނުކުރާ އޮޑިޓަރެއް ކަމަށެވެ.
ބާސެލޯނާގެ އެކަޑެމީގައި ކުރިން ހުރި އޮލްމޯ ވަނީ މިދިޔަ ހޫނު މޫސުމުގައި 52 މިލިއަން ޕައުންޑުގެ ފީއަކަށް ބާސެލޯނާ އާ ގުޅުމުގެ ކުރިން ޑީނަމޯ ޒެގްރެބް އާއި ޖަރުމަނުގެ އާރްބީ ލައިޕްޒީގަށް ކުޅެފަ އެވެ.