މެންޗެސްޓާ ސިޓީގެ ތާރީޚުގައި އެ ކުލަބު ދުށް އެންމެ މޮޅު އެއް މިޑްފީލްޑަރު އަދި ކެޕްޓަން ކެވިން ޑި ބްރޭނާ މި ސީޒަނަށްފަހު ކުލަބު ދޫކޮށްލަން ނިންމައިފިއެވެ. މި ނިންމުން ސޯޝަލް މީޑިއާ މެދުވެރިކޮށް އިއުލާންކުރަމުން 33 އަހަރުގެ ކުޅުންތެރިޔާ ބުނީ ފުޓްބޯޅައިގައި ވަކިވާ ދުވަސް ބައްދަލުކުރާނެ ކަމީ އަބަދުވެސް ހަގީގަތެއް ކަމަށެވެ.
"އަހަރުމެންނަށް ނޭނގެނީ ކޮން އިރަކުކަން ވަކިވާން ޖެހޭނީ. މިއަދު މި އޮތީ އެ ދުވަސް އައިސްފައި. އަހަރެންނަށް މިއީ އުނދަގޫ ނިންމުމެއް. އެހެން ނަމަވެސް އަހަރެން ނިންމީ ދިގު ނުދަންމައި މިއީ އަހަރެންގެ ފަހު ސީޒަން ކަމުގައި ހަދަން،" ޑި ބްރޭނާ ބުންޏެވެ.
ބެލްޖިއަމްގެ ގައުމީ ޓީމުގެ ވެސް ކެޕްޓަން ބުނީ ޓީމުން ވަކިވާކަން ސަޕޯޓަރުންނަށް އެންމެ ފުރަތަމަ އެނގެން ބޭނުންވީ އޭނާގެ ފުށުން ކަމަށެވެ.
"އަހަރެން ފަދައިން އެތައް ކުޅުންތެރިއަކި ވަކިވެކެން ހިނގައްޖެ. އަހަރުމެންނަށް މިއީ އުނދަގޫ ނިންމުމަކަށް ވިޔަސް މި ހަގީގަތާ ކުރިމަތިލާން ޖެހޭނެ. މި ސިޓީގައި، މި ކުލަބުގައި އަހަރެންނަށް ނުލިބޭ އެއްޗެއްނެތް. އަހަރެންގެ މުޅި ހަޔާތް ބަދަލުވީ މިތަނުގައި. އަހަރެން އެކަމަށްޓަކައި ޝުކުރުވެރިވަން،" ޑި ބްރޭނާ ބުންޏެވެ.
އޭނާ ސިޓީއާ ގުޅުނީ 2015 ވަނަ އަހަރު ޖަރުމަނުގެ ވުލްފުސްބާގުންނެވެ. މިއަށްފަހު މިވީ 10 އަހަރު ތެރޭގައި އޭނާ ފާހަގަވެފައިވަނީ އިނގިރޭސި ޕްރިމިއާ ލީގުގެ ތާރީހުގައިވެސް ފެނުނު އެންމެ މޮޅު އެއް މިޑްފީލްޑް ކުޅުންތެރިޔާގެ ގޮތުގައެވެ. ސިޓީގައި ހޭދަކުރި 10 ސީޒަނުގައި އޭނާ ވަނީ ހަ ފަހަރު ލީގު ކާމިޔާބުކޮށްފަ އެވެ. އަދި ސިޓީގެ ތާރީހުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގާއި ޔޫރަޕިއަން ސުޕަ ކަޕް އަދި ކުލަބު ވޯލްޑް ކަޕް ކާމިޔާބުކޮށްދިނުމުގައި އޭނާ އަކީ އެންމެ މުހިންމު އެއް ބައިވެރިޔާއެވެ.
ޖުމުލަ 413 މެޗު ކުޅެ 106 ލަނޑު ޖަހައި، ޑި ބްރޭނާ ވަނީ ލަނޑު ޖަހަން 174 ފުރުސަތު ހޯދައިދީފަ އެވެ. ޑި ބްރޭނާ އެންމެ ބޮޑަށް ފާހަގަ ކުރެވެނީވެސް ލަނޑު ޖަހަން މަގުފަހިކޮށްދޭ އެފަދަ ދެވަނައެއް ނެތް ކުޅުންތެރިއެއްގެ ގޮތުގައެވެ.
ޑި ބްރޭނާ ޓީމު ދޫކޮށްލަން ނިންމީ ސިޓީއާއެކު ހަދާފައިވާ އެއްބަސްވުން މި ސީޒަނަށް ހަމަވާތީ އެވެ. އަދި މި އެއްބަސްވުން އާކުރުމާމެދު ސިޓީގެ މާބޮޑު ޝައުގުވެރިކަމެއް ނެތެވެ. ސަބަބަކީ ޑި ބްރޭނާގެ އުމުރު މަތިވަމުންދިއުމާއި، މި ސީޒަނުގައި ސިޓީއަށް އެއްވެސް ތައްޓެއް ނުލިބި ނިންމާލަން ޖެހިފައިވުމާއެކު، ޓީމު ޒުވާންކުރަން ކޯޗު ޕެޕް ގާޑިއޯލާވެސް ބާރު އަޅަމުންދާތީއެވެ.
ނަމަވެސް ގާޑިއޯލާ ބުނީ ޑި ބްރޭނާ ކުލަބު ދޫކޮށްލަން ނިންމުމުން މިއަދަކީ ހިތާމަވެރި ދުވަހެއް ކަމަށެވެ. ޑި ބްރޭނާ ދިއުން އެންމެ ގާތީ ސައުދީ އަރަބިއްޔާގެ ލީގަށް ކަމަށް އިނގިރޭސި މީޑިއާތަކުން ގަބޫލުކުރެއެވެ.