ޚަބަރު

އިނގިރޭސިވިލާތުގައި ކިޔަވަމުންދާ ދަރިވަރުންގެ އެކޮމޮޑޭޝަން ބްލޮކް އަލުން ކުދިންނަށް ހަމަޖައްސަވައިދެއްވައިފި


  • މި ޢިމާރާތް ހައި ކޮމިޝަންގެ ބޭނުމަށް ކުދިންގެ އަތުން ނަގާފައިވަނީ 2019 ވަނަ އަހަރު

  • ނަމްބަރ 9 ރޯޒްމަންޓް އެވެނިއުއަކީ އިނިގިރޭސިވިލާތުގައި ހުންނަ ދިވެހި ސަރުކާރުގެ ޢިމާރާތެއް

  • ރައީސްގެ މިދަތުރުފުޅުގައި ވަނީ ޢިމާރާތުގެ ރަޖިސްޓްރީ ސްޓޫޑެންޓްސް އެސޯސިއޭޝަނަށް ބަދަލުކުރައްވާފައި

އިނގިރޭސިވިލާތުގައި ކިޔަވަމުންދާ ދަރިވަރުންގެ އެކޮމޮޑޭޝަން ބްލޮކެއްގެ ގޮތުގައި އަދި "ހަބެއް"ގެ ގޮތުގައި ބޭނުންކުރަމުންދިޔަ "ނަމްބަރ 9 ރޯޒްމަންޓް އެވެނިއު" ޢިމާރާތް އަލުން ކުދިންގެ އެކި ބޭނުންތަކަށް ބޭނުންކުރެވޭނެ ޢިމަރާތެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަމަޖައްސަވައިފިއެވެ.

އިނގިރޭސިވިލާތުގައި ކިޔަވަމުންދާ ކުދިންގެ އެކޮމޮޑޭޝަން ބްލޮކެއްގެ ގޮތުގައި އަދި އެކުދިންގެ އެކި ބައްދަލުވުންތައް ބާއްވަމުންދިޔަ "ނަމްބަރ 9 ރޯޒްމަންޓް އެވެނިއު" ވަނީ 2019 ވަނަ އަހަރު ހައިކޮމިޝަންގެ ބޭނުމަށް ނަގާފައެވެ. އެހެންކަމުން އަލުން މި ޢިމާރާތަކީ އިނގިރޭސިވިލާތުގައި ކިޔަވަން ތިބޭ ކުދިންނަށް ބޭނުންކުރެވޭނެ ތަނެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހަމަޖައްސަވާދެއްވާފައެވެ. އަދި މިތަން އިނިގރޭސިވިލާތުގައި ކިޔަވަމުންދާ ދަރިވަރުންގެ އެސޯސިއޭޝަންގެ ދަށުގައި ވަނީ ރަޖިސްޓަރކޮށްފައެވެ.


މިއީ އެޤައުމުގައި ކިޔަވަމުންދާ ދަރިވަރުންގެ ހިތްހަމަޖެހުމާއި އެކުދިންގެ ދުޅަހެޔޮކަން ކަށަވަރުކޮށް އެޤައުމުގައި ކިޔަވަމުންދާ ދިވެހި ދަރިވަރުންގެ އިޖުތިމާޢީ ގުޅުންތައް ބަދަހިކުރުމަށް ރައީސުލްޖުމްހޫރިއްޔާ އެޅުއްވި މުހިއްމު ފިޔަވަޅެއްކަމަށް ސަރުކާރުން ވިދާޅުވެއެވެ.

ރައީސުލްޖުމްހޫރިއްޔާ އިނގިރޭސިވިލާތަށް ކުރައްވަމުންގެންދަވާ ދަތުރުފުޅުގެ ތެރެއިން ވަނީ އެޤައުމުގައި ކިޔަވަމުންދާ ދިވެހި ދަރިވަރުންނާއި ބައްދަލުކުރައްވާފައެވެ. މިބައްދަލުކުރެއްވުމުގައި ދަރިވަރުންނަށް ކުރިމަތިވަމުންދާ އެކި ދަތިތައް އަޑުއައްސަވާ އެކަމާގުޅޭގޮތުން ވަނީ އޮޅުންފިލުއްވާފައެވެ. އަދި ދަރިވަރުންނަށް ކުރިމަތިވަމުންދާ ދަތިތައް ހައްލުކުރުމަށް ސަރުކާރުން މަސައްކަތްކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާވަނީ ދަރިވަރުންނަށް އަރުއްވާފައެވެ.