ދެކުނު އޭޝިއާގެ ފުޓްބޯޅައިގެ މައި ޖަމުއިއްޔާ (ސާފް) ގެ ރައީސްގެ މަގާމަށް އުމުރުން 70 އަހަރު ވިޔަސް ކުރިމަތިލެވޭ ގޮތަށް ގަވާއިދު ބަދަލުކޮށްފިއެވެ.
މިކަން ކުރީ އެ ޖަމިއްޔާގެ މިހާރުގެ ރައީސް ބަނގްލަދޭޝްގެ ޢާޒީ ސަލާހުއްދީނަށް އިތުރު ދައުރަކަށް ކުރިމަތިލުމުގެ ފުރުސަތު ހޯދައިދިނުމުގެ ގޮތުންނެވެ. ރައީސް ކަމުގައި ހަތަރުވަނަ ދައުރު ގުނަމުންދާ ސަލާހުއްދީންގެ މިހާރުގެ އުމުރަކީ 70 އަހަރެވެ. އޭނާ އުފަންވީ 23 ސެޕްޓެމްބަރު 1954ގަ އެވެ.
މި ބަދަލު ގެނައީ އޭޝިޔާގެ ފުޓްބޯޅައިގެ މައި ޖަމާއަތް ކަމަށްވާ އޭއެފްސީގެ ރައީސް ޝައިހް ސަލްމާން ބިން އިބްރާހީމް އަލް ހަލީފާގެ ކުރިފުޅު މަތީގައި ސްރީލަންކާގައި ބުދަ ދުވަހު ބޭއްވި ސާފްގެ އެކްސްޓްރާ އޯޑިނަރީ ކޮންގްރެސްގަ އެވެ. ކުރިން އޮތް ގޮތުން އުމުރުން 70 އަހަރު ވެފައިވާ މީހަކަށް ރައީސް ކަމަށް ކުރިމަތިނުލެވޭނެ އެވެ. ނަމަވެސް ސާފްގެ ގަވާއިދަށް މީގެ ހަތަރު އަހަރު ކުރިން ގެނައި އިސްލާހު އުވާލީ މެމްބަރު ހަތް ގައުމުގެ ވެސް ތާއީދާއެކުގަ އެވެ. މި ބަދަލު ގެންނަން އިސްނެގީ ބަނގްލަދޭޝް، ނޭޕާލް، ސްރީލަންކާ އަދި ބޫޓާނެވެ.
ސަލާހުއްދީނަށް ކުރިމަތިލުމަށް ހުރަސް އެޅުމުގެ ގޮތުން ސާފުން ކުރިން ގެނައި އެހެން އިސްލާހެއް ވަނީ 2022 ވަނަ އަހަރު އުވާލައިފަ އެވެ. އެއީ އެކަކަށް ރައީސް ކަމުގެ މަގާމު ފުރޭނީ ގިނަވެގެން ތިން ދައުރު ކަމަށް ބުނެ އިސްލާހު ކުރި މާއްދާ އެވެ.
މިހެންވެ މިހާރު ގަބޫލު ކުރެވެނީ އަންނަ އަހަރު ބާއްވާ ސާފް ފެޑަރޭޝަނުގެ އިންތިހާބުގައި އަނެއްކާ ވެސް ވާދަކުރާނީ އޭނާ ކަމަށެވެ.
މި ކޮންގްރެސް ހުޅުވައި ދެއްވުމުގެ ގޮތުން ވާހަކަ ދައްކަވަމުން އޭއެފްސީގެ ރައީސް ޝައިހް ސަލްމާން އިބްރާހީމް ހަލީފާ ވިދާޅުވީ ފުޓްބޯޅަ ކުރިއަށް ގެންދިއުމަށް އެންމެ މުހިންމު ކަމަކީ އެކުވެރިކަމާއި ބަދަހި ހަރުދަނާ ލީޑަރޝިޕެއް އޮތުން ކަމަށެވެ.
"ވަރުގަދަ އަދި ދެމެހެއްޓެވި ލީޑަރޝިޕެއް ފުޓްބޯޅައިގެ ކުރިމަގަށް ކޮންމެހެން ބޭނުންތެރިކަމެއް. އަހަރެން ޔަގީން ކުރަނީ މި ކޮންގްރެސްގައި ނިންމާ ނިންމުންތައް ވާނީ މި ސަރަހައްދުގެ ފުޓްބޯޅަ ކުރިއަށް ގެންދިއުމަށް ނިންމާ އެންމެ ރަނގަޅު ނިންމުތަކަށް ވާނެ ކަމަށް،" ޝައިހް ސަލްމާން ވިދާޅުވި
އެވެ.
ސަލާހުއްދީން ވަނީ އޭނާގެ ޒައާމަތުގައި ސާފުގެ ހިންގުން ހަރުދަނާކޮށް، އެ ޖަމާއަތުން އިންތިޒާމް ކުރާ މުބާރާތްތަކާއި ފުޅާ ކުރެވެމުންދާ ގޮތާމެދު ހިތްހަމަޖެހުން ފާޅުކޮށްފަ އެވެ.
ސާފުން ކުރިން ވަނީ ރާއްޖެއިން އެ ޖަމާއަތަށް ދައްކަންޖެހޭ ފައިސާ ނުދައްކާތީވެ ސާފް ޗެމްޕިއަންޝިޕުގައި ރާއްޖެ ބައިވެރިނުކުރުމާ ބެހޭ ގޮތުން މަޝްވަރާކޮށްފަ އެވެ. މި ފައިސާ އަކީ 2021 ވަނަ އަހަރުގެ ސާފް ޗެމްޕިއަންޝިޕް ރާއްޖޭގައި ބާއްވައިގެން ސާފަށް ދައްކަންޖެހޭ ފައިސާ އެވެ. ނަމަވެސް މި ފަހަރުގެ ބައްދަލުވުމުގައި މިކަމާ ގުޅޭ ގޮތުން މަޝްވަރާކުރިކަން މުޅިން ޔަގީނެއްނޫނެވެ.