ފުރަތަމަ ކުއާޓަރުގައި އުރީދޫއަށް ފައިދާގެ ގޮތުގައި 166 މިލިޔަން ރުފިޔާ

މިއަހަރުގެ ފުރަތަމަ ކުއާޓަރުގައި އުރީދޫއަށް ފައިދާގެ ގޮތުގައި 166 މިލިޔަން ރުފިޔާ ލިބިފައިވާކަމަށް އެ ކުންފުނީގެ މާލީ ހިސާބުތަކުން ދައްކައިފިއެވެ. މިއީ 2.5 އިންސައްތަ އިތުުރު އަދަދެކެވެ.

އުރީދޫއިން އާންމުކޮށްފައިވާ އެކުންފުނީގެ މާލީ ހިސާބުތައް ދައްކާގޮތުގައި 2025 ވަނަ އަހަރުގެ ފުރަތަމަ ކުއާޓަރުގައި ފައިދާގެ ގޮތުގައި 166 މިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި އެ ކުންފުންޏަށް ލިބިފައިވަނީ 162 މިލިޔަން ރުފިޔާއެވެ. އެހެންކަމުން މިއީ 2.5 އިންސައްތަ އިތުުރު އަދަދެކެވެ.

އުރީދޫއިން އާމްދަނީ ހޯދަނީ މައިގަނޑު 2 ދާއިރާއަކުންނެވެ. އެއީ މޯބައިލް ޚިދުމަތްތަކާއި ފިކްސްޑް ލައިން، ބްރޯޑް ބޭންޑް އިންޓަނެޓާއި އެންޓަޕްރައިޒް ވިޔަފާރިތައް މެދުވެރިކޮށެވެ.

އުރީދޫއިން އާންމުކޮށްފައިވާ މިއަހަރުގެ ފުރަތަމަ ކުއާޓަރުގެ މާލީ ރިޕޯޓުގައިވާގޮތުން މޯބައިލް ޚިދުމަތްތައް ފޯރުކޮށްދީގެން އެކުންފުނިން ވަނީ 411 މިލިޔަން ރުފިޔާގެ އާމްދަނީއެއް ހޯދާފައެވެ. މިދިޔަ އަހަރު މޯބައިލް ޚިދުމަތްތަކުން އެކުންފުންޏަށް ލިބިފައިވަނީ 430 މިލިޔަން ރުފިޔާއެވެ.

މޯބައިލް ޚިދުމަތްތަކުން ލިބުނު އާމްދަނީ ދަށްވެފައިވީނަމަވެސް ފިކްސް ބްރޯޑްބޭންޑު ޚިދުމަތުން ލިބުނު އާމްދަނީއަށް ވަނީ ކުރިއެރުން ލިބިފައެވެ. ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ ކުއާޓަރުގައި ފިކްސްޑު ބްރޯޑްބޭންޑު ޚިދުމަތްތަކުން 135 މިލިޔަން ރުފިޔާ ލިބިފައިވެއެވެ. އަދި 2024ވަނަ އަހަރުގެ ފުރަތަމަ ކުއާޓަރުގައި ފިކްސް ބްރޯޑްބޭންޑް އާމްދަނީގެ ގޮތުގައި އުރީދޫއަށް ލިބިފައިވަނީ 124 މިލިޔަން ރުފިޔާއެވެ. އެހެންކަމުން މިއީ 8 އިންސައްތަ އިތުރު އަދަދެކެވެ.

މިއާއެކު، މިއަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި އުރީދޫއަށް 547 މިލިޔަން ރުފިޔާ ލިބިފައިވާއިރު މި އަދަދަކީ 2024ވަނަ އަހަރު އެ ކުންފުންޏަށް އާމްދަނީގެގޮތުގައި ލިބުނު 554 މިލިޔަން ރުފިޔާއާ އަޅައި ބަލާއިރު 1 އިންސައްތަ ދަށް އަދަދެކެވެ.

އުރީދޫއިން މި އަހަރުގެ ފުރަތަމަ ތިން މަހުގެ ތެރޭގައި ވެސް ވަނީ ވިޔަފާރި ފުޅާކޮށް، ކަސްޓަމަރުންގެ އިތުބާރު ދަމަހައްޓައި އިތުރުކުރަން ގިނަ ހިދުމަތްތަކާއި ޕްރޮޑަކްޓުތަކެއް ތައާރަފްކޮށްފައެވެ.

އެގޮތުން، ރާއްޖޭގެ އާބާދީގެ 80 ޕަސެންޓަށް 5ޖީ ނެޓްވޯކު ފުޅާކުރުމާއި ސެމްސަންގް އީސިމް ބޭނުންކުރާ ސްމާޓްވޮޗްތައް ތައާރަފުކޮށްފައިވަނީ މި އަހަރުގެ ފުރަތަމަ ތިން މަހުގެ ތެރޭގައެވެ. އަދި މިދިޔަ ރޯދަ މަހު ވެސް އުރީދޫއިން ވަނީ ތަފާތު ކެމްޕެއިންތަކެއް ލޯންޗު ކޮށްފައެވެ.