ނިމުނު ހަފްތާގައި 192 ދޯންޏަކަށް 11.6 މިލިޔަން ރުފިޔާ ދޫކޮށްފި
-
މިއީ ކުރީ ހަފްތާއާއި އަޅާބަލާއިރު %40 އިތުރު އަދަދެއް
-
އެންމެ ގިނައިން ފައިސާ ދޫކުރީ ހޮނިހިރު ދުވަހު ކިރުވި މަހަށް
-
ހޮނިހިރު ދުވަހު ކިރުވި މަހަށް 3.2 މިލިޔަން ރުފިޔާ ދޫކުރި
މިދިޔަ ހަފްތާގައި މަސްވެރިންނަށް ދޫކުރި ފައިސާ އޭގެ ކުރީ ހަފްތާއާ އަޅާ ބަލާއިރު ގާތްގަނޑަކަށް 40 އިންސައްތަ އިތުރު ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯގެ ތަފާސްހިސާބުތަކުން ދައްކައިފިއެވެ.
މިފްކޯއިން އާންމުކޮށްފައިވާ ތަފާސްހިސާބުތަކަށް ބަލާއިރު، ނިމުނު ހަފްތާގައި މިފްކޯއިންވަނީ މަސްވެރިންނަށް 11.6 މިލިޔަން ރުފިޔާ ދޫކޮށްފައެވެ. މިފައިސާ ދޫކޮށްފައިވަނީ 192 ދޯންޏަކަށެވެ. މިފްކޯގެ ތަފާސް ހިސާބުތައް ދައްކާގޮތުން މިއީ ޖޫންމަހުގެ ދެވަނަ ހަފްތާއާ އަޅާ ބަލާއިރު 39.8 އިންސައްތަ އިތުރު އަދަދެކެވެ. ޖޫން ދެވަނަ ހަފްތާގައި މިފްކޯއިން މަސްވެރިންނަށް ދޫކޮށްފައިވަނީ 8.3 މިލިޔަން ރުފިޔާއެވެ.
މިދިޔަ ހަފްތާގައި އެންމެ ގިނަ ފައިސާ މަސްވެރިންނަށް ދޫކޮށްފައިވަނީ ހޮނިހިރު ދުވަހުއެވެ. އެ ދުވަހު 40 ދޯންޏަކަށް، 3.2 މިލިޔަން ރުފިޔާ ދޫކޮށްފައިވެއެވެ.
ޖޫން ތިންވަނަ ހަފްތާގައި މިފްކޯއިން މަސްވެރިންނަށް ދޫކުރި ފައިސާ ދެވަނަ ހަފްތާއަށް ވުރެ އިތުރުވި ނަމަވެސް، މިއީ ޖޫން މަހުގެ ފުރަތަމަ ހަފްތާގައި ދޫކުރި ފައިސާއަށް ވުރެ މަދު އަދަދެކެވެ. ޖޫން މަހުގެ ފުރަތަމަ ހަފްތާގައި 165 ދޯންޏަކަށް 16.7 މިލިޔަން ރުފިޔާ ދޫކޮށްފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ދަނީ ފައިސާ ދޫކުރަމުންނެވެ. މިވަޢުދު ތަންފީޒުކުރަން ފަށާފައިވަނީ ފާއިތުވި މަސްވެރިންގެ ދުވަހުއެވެ. ސަރުކާރުން ވަނީ އައު އުސޫލާއި ގުޅިގެން މަސްވެރިކަމަށް ނިކުންނަ ދޯނިތަކުގެ އަދަދު އިތުރުވެފައިވާ ކަމަށް ވިދާޅުވެފައެވެ.
މަސްވެރިކަމަށް ނިކުންނަ ދޯނިތައް އިތުރުވެ، މަސްވެރިންނަށް ޤަވާއިދުން ފައިސާން ދޭން ފެށުމާއެކު މާލީ ނިޒާމުގެ ތެރެއިން މަސްވެރިންނަކީ ބަލައިގަންނަ ބަޔަކަށް ހެދުމަށް ސަރުކާރުން ވަނީ މަސައްކަތް ކޮށްފައެވެ. އެގޮތުން މަސްވެރިންގެ ދަފްތަރު އެކުލަވާލައި، މަސްވެރިންނަށް އެމީހުންގެ އާމްދަނީއަށް ބިނާކޮށް ލޯނު ލިބޭގޮތް ވަނީ ހަމަޖައްސަވާފައެވެ.
މަސްވެރިކަމުގެ ސިނާޢަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާޢަތަށް މަސްވެރިކަން ހެދުމަކީ ސަރުކާރުގެ އަމާޒެކެވެ. އެގޮތުން މިސިނާޢަތަށް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ގެނެސްދިނުމަށް މަސްވެރިކަމުގެ ފެސިލިޓީތައް ތަރައްޤީކުރުމުގެ މަސައްކަތްވެސް ދަނީ ކުރަމުންނެވެ.