އަންނަ އަހަރު ތޮއްޑުއަށް 500 ކިލޯ ވޮޓްގެ އާ ޖަނަރޭޓަރު ސެޓެއް ގެންދަން ޕްލޭންކުރަމުން އަންނަކަމަށް ސްޓެލްކޯއިން ހާމަކޮށްފިއެވެ.
މިދިޔަ އަހަރުގެ ފަހުކޮޅު ސްޓެލްކޯއާއި ތޮއްޑޫ ކަރަންޓްގެ ޚިދުމަތް ދިނުމަށް ޙަވާލުކުރެއްވިއިރު އެރަށުގައި ކަރަންޓް ދެމުން ދިޔައީ ދެއަވަށަށް ވަކިންނެވެ.
ސްޓެލްކޯއިން އެރަށުގައި މިހާރު ސައުވީސް ގަޑިއިރަށް ކަރަންޓްގެ ޚިދުމަތްދޭއިރު މި ޚިދުމަތް ދެމުން ގެންދަނީ 260 ކިލޯ ވޮޓްގެ ޖަނަރޭޓަރަކާއި، 320 ކިލޯ ވޮޓްގެ ޖަނަރޭޓަރަކާއި 120 ކިލޯ ވޮޓްގެ ޖަނަރޭޓަރެއް ބޭނުންކޮށްގެންނެވެ.
ސްޓެލްކޯގެ އެސިސްޓެންޓް ސްޓޭޝަން މެނޭޖަރ މުޙައްމަދު އަޝްރަފް ވިދާޅުވީ ތޮއްޑުއަކީ ގެސްޓްހައުސްތައް ގިނަ ރަށަކަށްވެފައި، އަދި މިހާރުވެސް ގެސްޓްހައުސްތައް އިތުރުވަމުން އަންނަ ރަށަކަށްވުމާއެކު ކުރިއަށް އޮތް ތަނުގައި ކަރަންޓް ބޭނުންވާ މިންވަރު އިތުރުވާނެތީ، އެރަށުގެ އިންޖީނުތަކުގެ ކެޕޭސިޓީ މަތިކުރަން ވިސްނަމުންދާކަމަށެވެ. އަދި އެރަށުގެ ކަރަންޓް ނެޓްވޯކްވެސް ބަދަލުކުރުމަށް ޕްލޭންކުރެވިފައިވާކަމަށް ވިދާޅުވިއެވެ.
އަޝްރަފް ވިދާޅުވީ ތޮއްޑޫގެ އިންޖީނުގެ ހުރީ މީހުން ދިރިއުޅޭ ސަރަޙައްދުގައިކަމަށް ވުމާއެކު އާ އިންޖީނުގެއެއް ޢިމާރާތްކުރުމަށް އަންނަ އަހަރުގެ ބަޖެޓްގައި ހިމަނައިގެން ކުރިއަށްގެންދަން ޕްލޭންކުރެވިފައިވާކަމަށެވެ.
ސްޓެލްކޯއިން ގެންދަނީ އެރަށުގައި ފެނުގެ ޚިދުމަތްވެސް ދެމުންނެވެ.