"ޤައުމު ބިނާކުރުމަށް އެންމެން އެކުގައި މަސައްކަތްކުރަންޖެހޭ"

ސިޔާސީ ގޮތުން ޚިޔާލުތަފާތުވި ކަމުގައި ވިޔަސް ސަރުކާރާއި އެކު ޤައުމު ބިނާކުރުމަށް މަސައްކަތްކުރާ ބަޔަކަށްވުމަށް ރާއްޖޭގެ ރައްޔިތުންގެ ކިބައިން އިކޮނޮމިކް އެންޑް ޔޫތް ކައުންސިލް (އީވައިސީ)ގެ ޗެއަރ، މިނިސްޓަރު އަހުމަދު ޒުހޫރު އެދިވަޑައިގެންފިއެވެ.

މިނިސްޓަރ ޒުހޫރު މިހެން ވިދާޅުވީ މޯލްޑިވްސް އިންލެންޑް ރެވެނިއުއޮތޯރިޓީ، މީރާގެ ހަވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅުދައްކަވަމުންނެވެ. މިނިސްޓަރގެ ވާހަކަފުޅުގައި 2010 ގައި މީރާ އުފެދުނު ފަހުން މީރާގެ މަސައްކަތްތަކަށް ބަލާއިރު އަހަރަކަށްވުރެ އަހަރެއް ކުރިއަރަމުން އަންނަކަން ފާހަގަކުރެއްވިއެވެ.

މިނިސްޓަރގެ ވާހަކަފުޅުގައި ޓެކްސްގެ ނިޒާމެއްގެ ތެރެއިން ޓެކްސް ނެގެނީ ދައުލަތުގެ ތެރެއަށް ކަމުގައިވީނަމަވެސް މިއީ ރައްޔިތުންނަށްޓަކާ ނެގޭ އެއްޗެއްކަން ފާހަގަކުރެއްވިއެވެ. އަދި ބައެއް ފަރާތްތަކުން ޓެކްސް ނުދައްކާކަން ފާހަގަކުރައްވާ ޤައުމު ބިނާކުރެވޭނީ ތަފާތު ފިކުރުގެ މީހުންގެވެސް އެއްބާރުލުމާއިއެކުގައި ކަމަށް މިނިސްޓަރ ވިދާޅުވިއެވެ.

img:http://s2.psmnews.mv/images/660x400/14701681673059.jpg|އިކޮނޮމިކް އެންޑް ޔޫތް ކައުންސިލް (އީވައިސީ)ގެ ޗެއަރ، މިނިސްޓަރު އަހުމަދު ޒުހޫރު- ފޮޓޯ: ޕީއެސްއެމް

"ޤައުމުތަރައްޤީވާން މިއޮތީ އަޅުގަނޑުމެން އެންމެންގެ ހިއްސާއާއި އެކު އެންމެން އަތުގުޅާލައިގެން. އަޅުގަނޑުމެން އެންމެންނަކީ ޒިންމާދާރު ބަޔަކަށްވެގެން. އެންމެންނަކީ ދުރުވިސްނޭ ހެޔޮވިސްނޭ އަދި ޤައުމަށް ހެޔޮއެދޭ ބަޔަކުކަމުގައި ބަލައިގެން. މިގޮތުން ސަރުކާރުގެ އިލްތިމާސަކީ ޚީޔާލުތަފާތުވި ކަމުގައިވީނަމަވެސް ޓެކްސް ނިޒާމުގައި ނުވަތަ ޓެކްސް ދެއްކުމުގައި އެއްވެސް މީހަކު ފަހަތަށް ނުޖެހުމަށް. އެހެންނަމަވެސް އަޅުގަނޑުމެންނަށް ފެނިގެން މިދަނީ އަޅުގަނޑުމެންނާ ޚިޔާލުތަފާތު ވެއްޖެ ނަމަ މިހުރިހާކަމަށްވެސް ގޮންޖެހުމަށް މަސައްކަތްކުރާތަން." މިނިސްޓަރ ޒުހޫރު ވިދާޅުވިއެވެ.

މި ރަސްމިއްޔާތުގައި ކޮމިޝަނަރަ ޖެނެރަލް އޮފް ޓެކްސޭޝަން ޔަޒީދު މުޙައްމަދު ދެއްކެވި ވާހަކަފުޅުގައި ވޭތުވެދިޔަ 6 އަހަރުގެ ތެރޭ މީރާ ހޯދާފައިވާ ކާމިޔާބީތަކަށް ބައްލަވާލެއްވިއެވެ. އަދި ކުރިއަށް އޮތްތަނުގައި މީރާއިން ކުރުމަށް ނިންމާފައިވާ ކަންތައްތައް ހާމަކުރެއްވިއެވެ.

img:http://s2.psmnews.mv/images/660x400/14701680061341.jpg|ކޮމިޝަނަރަ ޖެނެރަލް އޮފް ޓެކްސޭޝަން ޔަޒީދު މުޙައްމަދު - ފޮޓޯ: ޕީއެސްއެމް

"މިރާގެ ޚިދުމަތްތައް ޒަމާނީ ޓެކްނޮލޮޖީގެ އެހީގައި އިތުރަށް ތަރައްޤީކޮށްގެން ޚިދުމަތްތައް ލިބިގަންނަ ފަރާތްތަކަށް ފަސޭހަކުރުމަށް އިތުރު ހައްލުތަކެއް ހޯދުމަށް ފާއިތުވި އަހަރުގެ ތެރޭގައި އަޅުގަނޑުމެން ގިނަ ގުނަ މަސައްކަތްތަކެއް ވާނީ ކޮށްފައި. މިގޮތުން ޓެކްސް ދައްކާފަރާތްތަކަށް ދޭ ޚިދުމަތް އިތުރަށް ފުރިހަމަ ކުރުމުގެ ގޮތުން އޭޑީބީގެ އެހީގައި ޤާއިމްކުރާ ކަސްޓަމަރ ރިލޭޝަންޝިޕް މެނޭޖްމަންޓް ސިސްޓަމް ޤާއިމްކުރުމުގެ މަސައްކަތް މިހާރު ކުރިއަށްދަނީ. މިހާރުވެސް ލިބެމުންދާ މީރާ ކަނެކްޓް އޮންލައިން ޚިދުމަތުގެ އިތުރަށް ކޮންމެ ތަނެއްގައި ތިބެ ކޮންމެ ވަގުތެއްގައިވެސް މީރާގެ ޚިދުމަތް ހޯދުމަށް ފަސޭހަކުރުމަށްޓަކާ ތައްޔާރުކުރެވިފައިވާ މީރާ މޮބައިލް އެޕްލިކޭޝަނެއް ވަރަށް ކައިރި މުސްތަޤުބަލެއްގައި އާންމުންނަށް ހުޅުވިގެންދާނެ. 

ޓެކްސް ދައްކާ ފަރާތްތަކަކީ ރާއްޖޭގެ އެކި ކަންކޮޅުތަކަށް ބެހިފައިވާ ފަރާތްތަކަށްވުމާއި އެކު ޓެކްސް ދައްކާ ފަރާތްތަކަށް ގާތުން ޚިދުމަތް ލިބޭނެ މަގުފަހުކޮށްދިނުމަކީ ސަރުކާރުގެ ސިޔާސަތާ އެއްގޮތަށް އަޅުގަނޑުމެން ވަރަށް ބޮޑު އިސްކަމެއް ދީގެން ކުރިއަށްގެންދާ ކަމެއް. މިގޮތުން ރާއްޖޭގެ ތަފާތު 6 އަތޮޅެއްގައި މިރާގެ އޮފީސްތައް ޤާއިމްކުރެވިފައިވާއިރު އިތުރު 5 އަތޮޅެއްގައި މީރާގެ އޮފީސްތައް ޤާއިމްކުރެވިގެންދާނެ. އަދި މިކަމަށް ބޭނުންވާ ވަސީލަތްތައްވެސް ސަރުކާރުންވަނީ ފަހިކޮށްދެއްވާފައި. މީގެ އިތުރުން މީރާގެ އޮފީހެއް ޤާއިމްވެފައި ނެތް އަތޮޅުތަކަށް މީރާއަށް ދައްކަންޖެހޭ ފައިސާ ކައުންސިލް މެދުވެރިކޮށް ބަލައިގަތުމަށްޓަކާ އެކަމަށް ޚާއްސަ އެޕްލިކޭޝަނެއްވެސް ދަނީ ތައްޔާރުކުރެވެމުން." ކޮމިޝަނަރަ ޖެނެރަލް އޮފް ޓެކްސޭޝަން ޔަޒީދު މުޙައްމަދު ވިދާޅުވިއެވެ.

 މިރޭގެ ރަސްމިއްޔާތުގައި ޚިދުމަތުގެ އަގުވަޒަންކުރުމުގެ ގޮތުން 3 މުއައްސަސާއަކަށް ހަނދާނީ ފިލާ އަރުވާފައިވެއެވެ. އަދި ދައުލަތަށް ޤަވާޢިދުން ޓެކްސް ދައްކާ ފަރާތްތަކަށް މީރާއިން ދޭ"ރަން ލާރި" އެވޯޑް ސަތާރަ ފަރާތަކަށްވެސް ދީފައިވެއެވެ. މީގެ އިތުރުން މީރާއިން ހުޅުވާލި ކުރެހުމާއި ފޮޓޯ ނެގުމުގެ މުބާރާތުން ވަނަތަކަށް އައި ދަރިވަރުންނަށްވެސް ހަނދާނީ ލިޔުން ދީފައިވެއެވެ. މިރޭގެ ރަސްމިއްޔާތުގައި ޓުއަރިޒަމް ޓެކްސްއާއި ގުޅޭގޮތުން ލިޔެފައިވާ ފޮތެއްވެސް ނެރެފައިވެއެވެ.