އެމްޕީއެލްއިން ސިޓީ ހޮޓާ ހިންގުމަށް އައްޑޫ ސިޓީގެ ދޫގަސް ލިބޭތޯ ސަރުކާރާއެކު ވާހަކަ ދައްކަމުންދާކަމަށް އެކުންފުނިން ބުނެފިއެވެ.
މޯލްޑިވްސް ޕޯޓްސް ލިމިޓެޑްގެ ސީ.އީ.އޯ މުޙައްމަދު ޖުނައިދު ވިދާޅުވީ ދޫގަހަކީ މިހާރުވެސް ހަދާފައި ހުރިތަނަކަށްވުމާއި އެކު އެތަނަށް ގެންނަންޖެހޭ ކުދި ކުދި މަރާމާތުތަކަށްފަހު އެތަން ދެމަސްދުވަހުގެތެރޭގައި އޮޕަރޭޓްކުރަން ފަށާ، ފަތުރުވެރިން ގެނެވޭނެކަމަށެވެ.
ދޫގަހަކީ އައްޑު ސިޓީގެ ރައްޔިތުންނަށް އާމްދަނީ ލިބޭނެ މަގެއްކަމަށާއި އެތަން ބަންދުކޮށްފައި ބެހެއްޓުމުން އެ ސިޓީގެ ރައްޔިތުންނަށް އާމްދަނީ ލިބޭނެ މަގު ބަންދުވެފައިވާކަން ފާހަގަކުރައްވާ ޖުނައިދު ވިދާޅުވީ، އައްޑު ސިޓީގެ ކޮންމެ ރައްޔިތަކުވެސް އެތަން ހުޅުވި އެތަނުން ވަޒީފާ ލިބޭނެ ދުވަހަކަށް އިންތިޒާރު ކުރަމުންދާކަމަށެވެ. އެހެންކަމުން އެ ކުންފުނިން ދޫގަސް ހޯދުމަށް ކަމާގުޅޭ ފަރާތްތަކާއި ވާހަކަ ދައްކަމުންދާކަމަށާއި އައްޑުއަތޮޅުގައި ހޮޓަލެއް ތަރައްޤީކުރުމުގެ ވިސްނުން އަދިވެސް އެބައޮތްކަމަށް ޖުނެއިދު ވިދާޅުވިއެވެ.
މޯލްޑިވްސް ޕޯޓްސް ލިމިޓެޑުން އައްޑޫ ސިޓީގައި ސިޓީ ހޮޓަލެއް އަޅަން ނިންމީ އައްޑޫއާއި ފުވައްމުލަކުގައި ފަށާފައިވާ ދަތުރުފަތުރުގެ ޚިދުމަތް ދެމެހެއްޓެނިވި ގޮތެއްގައި ކުރިއަށްގެންދިޔުމުގެ ގޮތުން ކަމަށް އެކުންފުނިން މައުލޫމާތުދެއެވެ.