ޔުއެފާ ޗެމްޕިއަންސް ލީގުގައި އެންމެ ފަހުގެ ޗެމްޕިއަން ފްރާންސްގެ ޕީއެސްޖީ އާއި އެ ޓީމާ އެންމެ ވާދަވެރި ސްޕެއިންގެ ބާސެލޯނާ ވާދަކުރަން ޖެހިއްޖެއެވެ.
މި ދެ ޓީމުގެ މެޗު ހާއްސަވާ އެންމެ މުހިންމު ސަބަބަކީ ޕީއެސްޖީގެ ކޯޗު ލުއިސް އެންރީކޭ އެވެ. އޭނާ އަކީ ބާސެލޯނާގެ ކުރީގެ ކެޕްޓަން އަދި ކޯޗެވެ. އެންރީކޭ ވަނީ 2015 ވަނަ އަހަރުގެ ޗެމްޕިއަންސް ލީގު ބާސެލޯނާ އަށް ހޯދައިދީފަ އެވެ. އޭނާ ޕީއެސްޖީ ގޮވައިގެން ބާސެލޯނާގެ ދަނޑަށް އައުމަކީ ހުރިހާ ގޮތަކުން ހާއްސަ ވެގެންދާނެ ކަމެކެވެ.
މިއަށްފަހު ދެން މެޗު ހާއްސަވާނެ ކަމަކީ ޕީއެސްޖީގެ ފޯވަޑް އޮސްމާނޭ ޑެމްބެލޭ އެވެ. އޭނާ އަކީ ބާސެލޯނާގެ ކުރީގެ ކުޅުންތެރިއެކެވެ. އަދި މި އަހަރުގެ ޔޫރަޕާއި ދުނިޔޭގެ އެންމެ މޮޅު ކުޅުންތެރިޔާގެ މަގާމަށް ވެސް އެންމެ ބޮޑަށް ވާދަކުރާ އެއް ކުޅުންތެރިއަކީ އޭނާ އެވެ. ދެން ބާސެލޯނާގެ ޒުވާން ވިންގަ ލަމީން ޔަމާލެވެ. މިހެންވެ މިއީ މި ދެ ކުޅުންތެރިންގެ ވަރަށް ބޮޑު ވާދަވެރިކަމަކަށް ވެގެންދާނެ އެވެ.
ގްރޫޕް ސްޓޭޖުގައި ޕީއެސްޖީ އަށް ބާސެލޯނާގެ އިތުރުން ވާދަ ކުރަން ޖެހެނީ ޖަރުމަނުގެ ޗެމްޕިއަން ބަޔާން މިއުނިކާއި ބަޔާ ލެވަކޫސެން އަދި އިޓަލީގެ އެޓްލާންޓާ އާއި އިނގިރޭސިވިލާތުގެ ޓޮޓެންހަމާއި ސްޕޯޓިން ކުލަބު އަދި ނިއުކާސަލް އާއި ސްޕޭނުގެ އެތްކެޓިކް ބިލްބާއޯ އެވެ.
ބާސެލޯނާ ފުރަތަމަ ނުކުންނާނީ އަމިއްލަ ދަނޑުގައި ޕީއެސްޖީއާ ދެކޮޅަށެވެ. އެއަށްފަހު ކުލަބު ވޯލްޑް ކަޕު ޗެމްޕިއަން ޗެލްސީއާ ދެކޮޅަށް ސްޓެންފަޑް ބްރިޖުގަ އެވެ. އޭގެ ފަހުން ފްރޭންކްފަޓާއި ކުލަބު ބުރޫޖް އަދި އޮލިމްޕިއާކޯސް އާއި ސްލާވިއާ ޕްރާހާ އާއި ކޯޕެންހޭގަން އާއި ނިއުކާސަލް އެވެ.