ޖަރުމަން ލީގުގެ އާރްބީ ލައިޕްޒީގުގެ މިޑްފީލްޑަރު ޒަވީ ސިމޯންސް، 60 މިލިޔަން ޔޫރޯގެ ފީއަކަށް އިނގިރޭސި ޕްރިމިއަރ ލީގުގެ ޓޮޓްނަމް ހޮޓްސްޕަރއަށް ބަދަލުވެއްޖެއެވެ.
ނެދަލެންޑްސްއަށް އުފަން އުމުރުން 22 އަހަރުގެ ސިމޯންސް ހޯދުމަށް ޔޫރަޕްގެ ބޮޑެތި ކްލަބްތަކަކުން މަސައްކަތް ކުރަމުންދަނިކޮށް ޓޮޓްނަމްއިން އޭނާގެ ސޮއި ހޯދާފައިވާއިރު, ސިމޯންސް ބުނެފައިވަނީ މިއީ ގިނަ ދުވަސްތަކެއް ވަންދެން ދެކެމުން އައި ހުވަފެނެއް ހަގީގަތަކަށްވި ވަގުތެއް ކަމަށެވެ.
"މިއީ އަހަރެން ދެކެމުން އައި ހުވަފެނެއް ހަގީގަތަކަށްވި ދުވަހެއް. މިހާރު މިހިރީ ކުޅެން ކެތްމަދުވެފައި." ސިމޯންސް ބުންޏެވެ.
ބާސެލޯނާގެ ލަމާސިއާ އެކަޑަމީން ފުޓްބޯޅަ ހަޔާތް ފަށާފައިވާ ސިމޯންސް ވަނީ ލަމާސިއާ ދޫކޮށް 2019 ވަނަ އަހަރު ފްރާންސްގެ ޕީއެސްޖީއާ ގުޅިފަ އެވެ. އަދި އޭގެ ފަހުން ލޯނު އެއްބަސްވުމެއްގެ ދަށުން ނެދަލެންޑްސްގެ ޕީއެސްވީގައި ދެއްކި މޮޅު ކުޅުމާއިއެކު އޭނާގެ ވިދުން ވަނީ ފާހަގަވެ ލައިޕްޒީގަށް ލޯނު އެއްބަސްވުމެއްގެ ދަށުން ގެންގޮސްފައެވެ.
އަދި 2023 ވަނަ އަހަރު ލައިޕްޒީގާއެކު ދާއިމީ އެއްބަސްވުމެއްގައި ސޮއިކުރި ސިމޯންސް ވަނީ އެ ކްލަބަށް ކުޅެދިން 78 މެޗުގައި 22 ލަނޑު ޖަހާ އިތުރު 24 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ލައިޕްޒީގުން ސިމޯންސް ވިއްކާލާފައިވާއިރު މިއީ މިހާރު ކުރިއަށްދާ ޓްރާންސްފަރ ބާޒާރުގައި އެ ކްލަބުން ޕްރިމިއަރ ލިގުގެ ކްލަބަކަށް ވިއްކާލި ދެވަނަ ކުޅުންތެރިޔާ އެވެ. މީގެ ކުރިން ލައިޕްޒީގުން ވަނީ 73.7 މިލިއަން ޕައުންޑަށް ބެންޖަމިން ސެސްކޯ މެންޗެސްޓަރ ޔުނައިޓެޑަށް ވިއްކާލާފަ އެވެ.
ގަތަރުގައި 2022 ވަނަ އަހަރު ބޭއްވި ފީފާ ވޯލްޑް ކަޕްގައި ނެދަލެންޑްސްގެ ގައުމީ ޓީމަށް ކުޅެން ފަށާފައިވާ ސިމޯންސް ވަނީ އެ މުބާރާތުގެ ދެވަނަ ބުރުގައި އެމެރިކާ އާއި ދެކޮޅަށް ނެދަލެންޑްސް ކުޅުނު މެޗުގައި ކުޅެ ވޯލްޑް ކަޕްގެ ނޮކްއައުޓް މެޗެއްގައި ނެދަލެންޑްސްއަށް ކުޅުނު އެންމެ ޒުވާން ކުޅުންތެރިޔާގެ ޝަރަފު ހޯދާފަ އެވެ.