ދުވަސްނުފުރާ ވިހާ ކުދިންނަށް ރެޓީނާ ލޭޒަރ ޓްރީޓްމަންޓްގެ ޚިދުމަތް އައިޖީއެމްއެޗްގައި ފަށައިފި
-
މިއީ ފެނުމުގެ ބާރު ރައްކާތެރިކުރުމަށް ދެވޭ ޚާއްޞަ ފަރުވާއެއް
ދުވަސް ނުފުރާ ވިހާ ކުދިންނަށްދޭ "ރެޓީނާ ލޭޒަރ ޓްރީޓްމަންޓް"ގެ ޚިދުމަތް އައިޖީއެމްއެޗްގައި ފަށައިފިއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި، މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިިބްރާހީމް އަބްދުއްރައްޒާޤް ހަލީމް ވިދާޅުވީ، މިއަދުން ފެށިގެން އައިޖީއެމް ހޮސްޕިޓަލުގައި ދުވަސް ނުފުރާ ވިހާ ކުދިންނަށް ރެޓީނާ ލޭޒަރ ޓްރީޓްމަންޓްގެ ޚިދުމަތްދޭން ފަށާފައިވާކަމަށެވެ.
ރެޓިނާ ލޭޒަރ ޓްރީޓަމަންޓްއަކީ، ދުވަސްނުފުރާ ވިހާ ކުދިންގެ ފެނުމުގެ ބާރު ރައްކާތެރިކުރުމަށްޓަކައި ދެވޭ ޚާއްޞަ ފަރުވާއެކެވެ.
ސޯޝަލް މީޑިއާގައި ކުރެއްވި ޕޯސްޓުގައި އަބްދުއްރައްޒާޤް ހަލީމް ވިދާޅުވީ، އައިޖީއެމް ހޮސްޕިޓަލުގައި "ރެޓިނާ ލޭޒަރ ޓްރީޓްމަންޓް"ގެ ޚިދުމަތް ފެށިގެން ދިއުމަކީ، ދުވަސް ނުފުރާ ވިހާ ކުދިންނަށް ފަރުވާ ލަސްނުވެ ދިނުމަށް ލިބުނު ފަހި ފުރުޞަތެއްކަމަށެވެ.
އައި.ޖީ.އެމް.އެޗްގައި މިއަދުން ފެށިގެން ދުވަސް ނުފުރާ ވިހާ ކުދިންނަށް ރެޓީނާ ލޭޒަރ ޓްރީޓްމަންޓް ގެ ޚިދުމަތްދޭން ފެށިގެން ދިޔުމަކީ ނުހަނު އުފާވެރި ކަމެކެވެ. މިއީ އަޅުގަނޑުމެންގެ އެންމެ ނާޒުކު ތުއްތު ކުދިން ކަމުގައިވާ ދުވަސްނުފުރާ ވިހާ ކުދިންގެ ފެނުމުގެ ބާރު… pic.twitter.com/dwxxtKdXHm
— Haleem (@22halex) October 8, 2025
އަލަށް އުފަންވާ ކުދިންގެ ސިއްޙަތާ ދުޅަހެޔޮކަން ކަށަވަރުކުރުމަށްޓަކައި ސަރުކާރުން އަންނަނީ ގިނަ މަސައްކަތްތަކެއް ކުރަމުންވެ.
މީގެއިތުރުން، ރާއްޖޭގެ ސިއްޙީ ނިޒާމު އިތުރަށް ހަރުދަނާ ކުރުމަށްޓަކައި ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ކުރިން ރާއްޖޭގައި އާންމުކޮށް ނުދެވޭ ފަރުވާތައް އެކި ސަރަޙައްދުތަކުގެ ސިއްޙީ ޚިދުމަތްދޭ ތަންތަނުގައި ޤާއިމްކުއުމާއި، އައު ޚިދުމަތްތަކަށް ސިއްޙީ އާލާތްތައް ހޮސްޕިޓަލުތަކަށް ގެނެސް ޚިދުމަތް ފުޅާކުރުން ހިމެނެއެވެ.
ސިއްޙި ނިޒާމު ޑިޖިޓަލައިޒްކުރުމަށް ދުނިޔޭގެ ސިއްޙަތު ޖަމްޢިއްޔާއާއި ގުޅިގެން ގިނަ މަސައްކަތްތަކެއް ކުރަމުން އަންނައިރު، ސަރުކާރުގެ ޑިޖިޓަލައިޒޭޝަންގެ މާސްޓަރ ޕްލޭންގެ ދަށުން އެންމެ އިސްކަމެއްދޭ އެއް ދާއިރާއަކީ ސިއްޙީ ދާއިރާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ ވިދާޅުވެފައެވެ.