ޖުޑިޝަރީ ކޮމެޓީގެ މުގައްރިރަކަށް ސައްތާރު

ރައްޔިތުންގެ މަޖިލީހުގެ ޖުޑިޝަރީ ކޮމެޓީގެ މުގައްރިރުކަމަށް ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު މިއަދު އިންތިޚާބުކޮށްފިއެވެ.

ޖުޑިޝަރީ ކޮމެޓީގެ މުގައްރިރުކަމަށް ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު އިންތިޚާބުކޮށްފައިވަނީ މަނަދޫ ދާއިރާގެ ޕީއެންސީ މެންބަރު ހުސްނީ މުބާރިކް މިއަދު އެ ކޮމެޓީން އިސްތިއުފާ ދެއްވުމުންނެވެ. ހުސްނީ މުބާރިކް އެ ކޮމިޓީން އިސްތިއުފާ ދެއްވީ އެ ކޮމިޝަނަށް މަޖިލީހުން ކަނޑައަޅާ މެމްބަރުކަމަށް އިންތިޚާބުވުމުންނެވެ.

ހުސްނީ މުބާރިކް އިސްތިއުފާ ދެއްވުމުން ޖުޑިޝަރީ ކޮމެޓީގެ މުގައްރިރަކަށް ހޮޅުދޫ ދާއިރާގެ މެމްބަރު ސައްތާރު އިންތިޚާބުކުރީ މިއަދު ބޭއްވި ކޮމެޓީ ބައްދަލުވުމުގައެވެ. މެމްބަރު ސައްތާރު ހޮވިވަޑައިގެންފައިވަނީ ކޮމިޓީގެ އަޣުލަބިއްޔަތުންނެވެ. ކުރިން އޭނާ ހުންނެވީ އެ ކޮމެޓީގެ ނައިބު މުގައްރިރުގެ މަގާމުގައެވެ.

މިއަދުގެ ބައްދަލުވުމުގައިވަނީ ކޮމެޓީގެ ނައިބު މުގައްރިރަކަށް ފުނަދޫ ދާއިރާގެ މެމްބަރު މުހައްމަދު މަމްދޫހު އިންތިޚާބުކޮށްފައެވެ.

މަޖިލީހުގެ ޖުޑީޝަރީ ކޮމެޓީއަކީ ޖުޑީޝަލް ސަރވިސް ކޮމިޝަން ހިމެނޭ ގޮތުން ޝަރުއީ ދާއިރާގެ މަސައްކަތްތައް ބަލައި ޖަވާބުދާރީ ކުރުވުމުގެ މެންޑޭޓް އޮންނަ ކޮމެޓީއެކެވެ.