ކޮންމެ ކުޅިވަރަކީވެސް އެކުޅިވަރުގެ އަޚްލާގު ހިފެހެއްޓިއްޖެނަމަ މުޖުތަމައަށް ފައިދާ ކުރާނެ ޒުވާނުންތަކެއް ބިނާކުރެވޭނެ ކުޅިވަރެއްކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
މޫދުގައި ކުޅޭ ކުޅިވަރުތަކަށް އިޝާރާތްކުރައްވާ ޕީއެސްއެމް ނިއުސްއަށް ދެއްވި އިންޓަވިއުއެއްގައި ވަޒީރު ވިދާޅުވީ ކޮންމެ ކުޅިވަރެއްގައިވެސް ރަނގަޅު ފުރުސަތު ފަހިކޮށްދީގެން އެތުލީޓުން ބިނާކުރާނަމަ މޫދު ކުޅިވަރަކީ އެއްވެސް ކުއްޖެ މަގު އޮޅޭނެ ކުޅިވަރެއް ނޫންކަން އެ ކުޅިވަރުގައި ހަރަކާތްތެރިވާ ޒުވާނުން ސާބިތުކޮށްދީފައިވާކަމަށެވެ.
"މިއަަހަރުގެ ކުރީކޮޅުގައި އެނގިގެން ދިޔަ އޯލެވެލްގައި ގަދަ 10 ގައިވެސް މީގެ ތެރެއިން ކުއްޖަކު ހިމެނޭކަން. މީކީ ކޮންމެހެން ހިތްގާވާ ކަމެއް ނޫންކަން އެ ކުދިން ޕްރޫވްކޮށްދޭ. މޫދު ކުޅިވަރަކީ އަޅުގަނޑުމެންގެ މެދުގައި ސުލްހަވެރިކަން ކުރިއަރުވާ އެއްބައިވަންތަކަމާއި އެއް އާއިލާއެއްކަން ރަމްޒުކޮށްދޭ ކުޅިވަރެއް" ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ މިކަން ރަނގަޅު ގޮތުގައި ޕްރޮމޯޓު ކޮށްގެން ރަނގަޅު ފުރުސަތުތައް އެތުލީޓުންނަށް ހޯދައިދީގެން ކުރިޔަށް ގެންދެވޭކަމަށްވާނަމަ އަޅުގަނޑުމެންގެ ތެރޭގައި އޮންނާނީ ވަރަށް ހަމަޖެހޭ ވަރަށް ހިތްހެޔޮ ވަރަށް އުފާވެރި މާހައުލެއް ކަމަށެވެ.
މޫދު ކުޅިވަރަކީވެސް އެހެން ކުޅިވަރުތަކެކޭ އެއްގޮތަށް ކުޅިވަރުގެ އަޚުލާގު ރަނގަަޅަށް ހިފަހައްޓައިގެން ކުރިޔަށްދެވޭނެ ކުޅިވަރެއް ކަމަށާއި، އެމަގުން ކުރިޔަށްދާންވީ ސަބަބުތައް ހުރިކަން ވަޒީރު ފާހަގަކުރެއްވިއެވެ. އެގޮތުން ޤައުމީ ޓީމުތަކުގެ އެތުލީޓުންނަށް ސަރުކާރުން ހަމަޖައްސައިދޭން ނިންމާފައިވާ ހެލްތް އިންޝުއަރެންސާއި، ރަނގަޅު މުސާރައަކާއި، އަރުތަ ޕްރޮގްރާމުގެ ދަށުން ކުރިޔަށް އޮތްތަނުގައި ސްކޮލަރޝިޕް ލިބުމުގެ ފުރުސަތު އޮތްކަން ފާހަގަކުރެއްވިއެވެ.
"މިކަންކުރަންޖެހޭ ސަބަބުތައް އަޅުގަނޑުމެންނަށް މިހާރު މިއޮތީ ފެންނަން. އެކަށީގެންވާ އުޖޫރައެއް، އިންޝިއުރެންސް އަދި މީގެ އިތުރުން އަރުތަ ޕްރޮގްރާމުގެ ދަށުން އެކުދިންނަށް ސްކޮލަރޝިޕްވެސް އިރާދުކުރެއްވިއްޔާ ލިބޭނެ" ކަމަށް ވަޒީރު ވިދާޅުވިއެވެ.
މޫދު ކުޅިވަރުތަކުގެތެރެއިން ރާޅާ އެޅުމާއި ބޮޑީ ބޯޑިންއަކީވެސް ސަރުކާރުން އެހެން ކުޅިވަރުތަކަށްދޭ ވަރަށް، އިސްކަން ދެއްވާ ކުޅިވަރުތަކެކެވެ.
އެގޮތުން ރާއްޖޭގެ ރާޅާ އަޅާ ކޮމިއުނިޓީން އެންމެ ބޭނުންވާ ފެންވަރުގައި މުބާރާތްތައް ބޭއްވޭނެ މަގުފަހިކުރުމަށް ގާއިމުކުރާ ސަރފިން ސްޓޭޑިއަމްގެ މަސައްކަތް ފެށުމަށް، މިހާރު ވަނީ ރާޅުގަނޑު ސަރަހައްދުގައި ކުރިން ހުރި ބްރިޖު ވިއުއިން ޕްލެޓްފޯމު ރޫޅާފާ އެ ބިން ސާފުކޮށްފައެވެ.
އެ މަސައްކަތް ހަވާލުކޮށްފައިވަނީ ޗައިނާ ކުންފުންޏަކާއެވެ. ބައިނަލްއަގުވާމީ ފެންވަރުގެ މި ސްޓޭޑިއަމް ތަރައްގީކުރަމުންދަނީ ކުޅިބަލަން އަންނަ މީހުންނަށް ތިބޭ ސަރަހައްދަކާއި، ރޮސްޓްރަމް، މީޑިއާ ސަރަޙައްދު، ކޮމެންޓަރީ ބޮކްސް، ކެމެރާ ޑެކް، އޮބްޒަވޭޝަން ކޯނަރ، ޖިމް، ޓެރަސް، މަލްޓިޕާޕަސް ހޯލް އަދި ކޮންފަރަންސް ރޫމާއި ޓެރަސް އަދި އެނޫންވެސް ޒަމާނީ ވަސީލަތްތައް ހިމެނޭގޮތަށެވެ.
މާލޭ ރާޅުގަނޑު ސަރަޙައްދުގައި ބައިނަލްއަގުވާމީ ފެންވަރުގެ ސާފިން ސްޓޭޑިއަމެއް ގާއިމުކުރެއްވުމަކީ ރައީސުލްޖުމްހޫރިއްޔާގެ ވައުދުފުޅެކެވެ.