ފުރަތަމަ ބުރުގެ ފަހު މެޗުންވެސް އޮޑި ސްޕޯޓްސް މޮޅުވެއްޖެ

ދިރާގު ދިވެހި ޕްރިމިއަރ ލީގުގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، އޮޑި ސްޕޯޓްސް ކުލަބުން ތާވަލުގެ ދެވަނަ މަގާމުގައި ހަމަޖެހިލައިފިއެވެ. ގައުމީ ފުޓްބޯޅަ ދަނޑުގައި ކުޅުނު މި މެޗުން އޮޑި ސްޕޯޓްސް މޮޅުވީ 3-0 ގެ ނަތީޖާއަކުންނެވެ.

ޓީސީން ވަނީ މި މެޗުގެ ކުރިން އެ ޓީމުގެ ހެޑް ކޯޗަކަށް މުޙައްމަދު އާތިފް (އާތީ) ހަމަޖައްސާފައެވެ. އަދި މިދިޔަ މެޗުތަކުގައި އެ ޓީމަށް އިރުޝާދުދިން އަހުސަން ރަޝީދު ވަނީ ސަސްޕެންޝަނަށްފަހު އަލުން ޓީސީގެ ބެންޗަށް އައިސްފައެވެ. އޭނާ ދެ މެޗަށް ސަސްޕެންޑްކުރީ މި މަހުގެ ދެވަނަ ދުވަހު ލީގުގައި ކުލަބު އީގަލްސްއާ ދެކޮޅަށް ކުޅުނު މެޗުގައި ހިނގައިދިޔަ ކުޅިވަރުގެ ރޫހާ ޚިލާފު އަމަލުތަކާ ގުޅިގެންނެވެ.

ވިއްސާރައިގެ ސަބަބުން ދެ ޓީމަށްވެސް އުނދަގޫތަކެއް މި މެޗުގައި ކުރިމަތިވިއިރު، އޮޑި ސްޕޯޓްސްއިން ލީޑު ނަގާފައިވަނީ މެޗު ފަށައިގެން 12 ވަނަ މިނެޓުގައެވެ. ފުލްބެކް އަޙްމަދު އައިހަމް ދިން ބޯޅައަކުން މި ލަނޑު ކާމިޔާބުކޮށްދިނީ ލިތުއޭނިއާގެ ފޯވާޑް ކަރޮލިސް ލައުކްޒެމިސްއެވެ. އަދި މެޗުގެ 37 ވަނަ މިނެޓުގައި އޮޑި ސްޕޯޓްސްއިން ލީޑު ފުޅާކުރިއިރު، އިބްރާހީމް ވަހީދު ހަސަން ދިން ބޯޅައަކުން މި ލަނޑު ޖަހައިދިނީ މުޒްދާން ހަސަނެވެ.

މި މެޗުގައި އޮޑި ސްޕޯޓްސްއިން ކާމިޔާބުކުރި ތިންވަނަ ލަނޑު މެޗުގެ 62 ވަނަ މިނެޓުގައި ޖަހައިދިނީ އަހުޒަމް ރަޝީދެވެ. އޭނާ މި ލަނޑު ކާމިޔާބުކޮށްފައިވަނީ މުޒްދާން ތަނަވަސްކޮށްދިން ފުރުސަތަކުންނެވެ.

އޭގެ ފަހުން، އޮޑި ސްޕޯޓްސްގެ ކެޕްޓަން މުޙައްމަދު ރަޝީދު (ހޮކޭ) އަށް ސީރިއަސް އަނިޔާއެއްވުމާ ގުޅިގެން، ގިނަ ވަގުތުތަކަކަށް މެޗުގެ ކުޅުން މެދުކަނޑާލީ ދަނޑުމަތީގައި ބާއްވައިގެން އޭނާއަށް ފަރުވާ ދޭން ޖެހުމާ ގުޅިގެންނެވެ. އަދި އަށިގަނޑުގައި ދަނޑުން ބޭލުމަށްފަހު، ހޮކޭ ވަނީ ވަގުތުން އިތުރު ފަރުވާއަށް ހޮސްޕިޓަލަށް ގެންގޮސްފައެވެ.

މި މެޗުން މޮޅުވުމާއެކު ތާވަލުގެ ދެވަނައިގައި އޮޑި ސްޕޯޓްސް އޮތީ ކުޅުނު ނުވަ މެޗުން ލިބުނު 22 ޕޮއިންޓާއެކުއެވެ. ލީގުގެ ފުރަތަމަ ބުރުގައި ކުޅުނު ނުވަ މެޗުގެ ތެރެއިން އެންމެ މެޗަކުން އޮޑި ސްޕޯޓްސް ބަލިވިއިރު، އެ ޓީމު ވަނީ ހަތް މެޗުން މޮޅުވެފައެވެ. ތާވަލުގެ އެއްވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނުން ވަނީ ކުޅުނު ނުވަ މެޗުންވެސް މޮޅުވެ 27 ޕޮއިންޓް ހޯދާފައެވެ.

މީގެ އިތުރުން ތާވަލުގެ ނުވަވަނައަށް ޓީސީ ވެއްޓުނުއިރު، އެ ޓީމަށް ނުވަ މެޗުން ލިބިފައިވަނީ ފަސް ޕޮއިންޓެވެ. ލަނޑުގެ ތަފާތުން އަށްވަނައިގައި އޮތް ކުލަބު ގްރީން ސްޓްރީޓްސްއަށް އަށް މެޗުން ވަނީ ފަސް ޕޮއިންޓް ލިބިފައެވެ.