ސީއޭ މޯލްޑިވްސްގެ އައިއެފްއާރްއެސް ފޯރަމް ބާއްވައިފި

އިންސްޓިޓިއުޓް އޮފް ޗާޓަރޑް އެކައުންޓެންޓްސް، ސީއޭ މޯލްޑިވްސްއިން އިންތިޒާމް ކޮށްގެން ބާއްވާ އިންޓަނޭޝަނަލް ފައިނޭންޝިއަލް ރިޕޯޓިންގ ސްޓޭންޑާޑްސް ފޯރަމް ބާއްވައިފިއެވެ.

ސީއޭ މޯލްޑިވްސްއިން އިންތިޒާމް ކޮށްގެން ކުރިއަށް ގެންދާ އިންޓަނޭޝަނަލް ފައިނޭންޝިއަލް ރިޕޯޓިންގ ސްޓޭންޑާޑްސް (އައިއެފްއާރްއެސް) ފޯރަމް ބޭއްވީ، ވިލާ ނޯޓިކާ ރިސޯޓުގައެވެ.

އެއްދުވަހުގެ މުއްދަތަށް ބޭއްވި މި ފޯރަމަކީ، އެކައުންޓެންޓުންނާއި ފައިނޭންސް ދާއިރާގައި މަސައްކަތްކުރާ ފަރާތްތަކަށް އައިއެފްއާރްއެސްއާ ބެހޭ މުހިންމު މަޢުލޫމާތުތައް ފޯރުކޮށްދިނުމެވެ. މި ފޯރަމް ކުރިއަށް ގެންދިޔައީ، އޭޝިއަން އޯޝޭނިއަން ސްޓޭންޑާޑް-ސެޓާސް ގުރޫޕުގެ އަހަރީ ބައްދަލުވުމާއި ދިމާކޮށް، އެ ބައްދަލުވުން ނިންމަވާލުމަށް ފަހުއެވެ.

ރާއްޖޭގެ މާލީ ދާއިރާގެ 200 އަށްވުރެ ގިނަ ފަރާތުން ބައިވެރިވި މި ފޯރަމް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ، ކެޕިޓަލް މާކެޓް ޑިވެލޮޕްމެންޓް އޮތޯރިޓީގެ ސީއީއޯ މުޙައްމަދު ޙުސެއިން މަނިކެވެ. މި ފޯރަމުގައި ޚާއްސަ މެހެމާނެއްގެ ގޮތުން އިންޓަރނޭޝަނަލް އެކައުންޓިންގ ސްޓޭންޑަރޑްސް ބޯޑު، އައިއޭއެސްބީގެ ޗެއަރ، ޑރ. އަންޑްރެއާސް ބާރކޯ ވަނީ ބައިވެރިވެ ވަޑައިގެންފައެވެ. މީގެއިތުރުން މިފޯރަމުގައި އެކައުންޓިންގ ސްޓޭންޑަރޑްތައް ކަނޑައަޅާ ބައިނަލްއަޤްވާމީ އިދާރާތަކާއި، އިސް ފަރާތްތަކުގެ ތެރެއިން 25 އަށްވުރެ ގިނަ މީހުން ބައިވެރިވެފައިވާ ކަމަށް ސީއޭ މޯލްޑިވްސްއިން ވިދާޅުވިއެވެ. އަދި މި ފޯރަމުގައި އައިއޭއެސްބީގެ ފަންނީ ތަޖުރިބާކާރުން އެބޭފުޅުންގެ ތަޖުރިބާ ޙިއްސާ ކޮށްދެއްވިއެވެ.

މި ފޯރަމް ފެށުމުގެ ރަސްމިއްޔާތުގައި ވާހަކަ ދައްކަވަމުން ސީއޭ މޯލްޑިވްސްގެ ރައީސް މުޙައްމަދު ޙަލީމް އަބްދުﷲ ވަނީ، ބައިނަލްއަޤްވާމީ ގޮތުން ބަލައިގަންނަ މާލީ ރިޕޯޓުތަކެއް ތައްޔާރު ކުރުމުގެ މައްޗަށް އަލިއަޅުވާލައްވާފައެވެ. އޭނާ ވިދާޅުވީ، އާންމުކޮށް އައިއެފްއާރްއެސް އޭ ބުނުމުން މިއީ ބޮޑެތި ކުންފުނިތަކާއި، ބޮޑެތި ވިޔަފާރިތައް ކަމަށް ބައެއް ފަރާތްތަކަށް ސިފަވި ނަމަވެސް ރާއްޖެ ފަދަ ކުޑަ ޤައުމަކަށްވެސް މިއީ މުހިންމު ކަމެއް ކަމަށެވެ.

އަދި ފަތުރުވެރިކަމުގެ ދާއިރާގެ އެކިއެކި ގުޅުންތައް އޮންނަ ޤައުމެއްގައި މިއީ ޚާއްސަ އިސްކަމެއް ދީގެން ކުރަންޖެހޭ ކަމެއް ކަމަށްވެސް ވިދާޅުވިއެވެ. މީގެ އިތުރުން ސަރުކާރު ޙިއްސާވާ ކުންފުނިތަކުންވެސް ރަނގަޅު ނިޒާމެއް ގެންގުޅެންޖެހޭ ކަން ފާހަގަކުރައްވާ ޙަލީމް ވަނީ، ބައިނަލްއަޤްވާމީ ފަރާތްތަކުން ވިޔަފާރިތަކަށް އިތުބާރު ކުރަނީ އެ ކުންފުނިން ހާމަކުރާ މާލީ ރިޕޯޓުތަކަށް ބަލާފައި ކަމަށް ވިދާޅުވެފައެވެ.

މިއަހަރު އައިއެފްއާރްއެސް ފޯރަމުގެ ޝިޢާރަކީ، ކްލެރިޓީ، ކޮންސިސްޓެންސީ އެންޑް ސަސްޓެއިނަބިލިޓީއެވެ. މި ޝިޢާރުގެ ދަށުން ނަގައިދޭ ތަމްރީނާއި ނޮލެޖް ޝެއަރިންގ ސެޝަންތަކަކީ، މާލީ ދާއިރާގައި ހަރަކާތްތެރިވާ ފަރާތްތަކުން ޒަމާނީ މައްސަލަތަކަށް ތައްޔާރުވެ، މާލީ ރިޕޯޓުތައް ތައްޔާރު ކުރުމުގައި މިހާރު ހުރި މައްސަލަތައް ޙައްލު ކުރުމަށް ލިބިގެންދާ ފުރުސަތެއް ކަމަށް ސީއޭ މޯލްޑިވްސްއިން ވިދާޅުވެއެވެ. މި ސެޝަންތަކުގައި ވާހަކަ ދައްކަވާ، މަޝްވަރާތައް ކުރިއަށް ގެންގޮސްފައިވަނީ، ދިވެހިރާއްޖެ އަދި ބައިނަލްއަޤްވާމީ ފަންނީ ބޭފުޅުން މެދުވެރިކޮށް ކަމަށް ސީއޭ މޯލްޑިވްސްއިން ވިދާޅުވިއެވެ. ސީއޭ މޯލްޑިވްސްއިން ވަނީ، މި ފޯރަމަކީ މި ދާއިރާގައި ހަރަކާތްތެރިވާ ފަރާތްތަކުގެ ގުޅުން ބަދަހި ކުރުމަށް ލިބޭ ފުރުޞަތެއް ކަމަށް ވިދާޅުވެފައެވެ.

ސީއޭ މޯލްޑިވްސްއިން އިންތިޒާމު ކޮށްގެން ބާއްވާ އައިއެފްއާރްއެސް ފޯރަމަކީ، ސީއޭ މޯލްޑީވްސްއިން ކޮންމެ އަހަރަކުވެސް ބާއްވަމުންދާ ފޯރަމެކެވެ.