މޯލްޑިވިއަނުން ޖެނުއަރީގައި ޗައިނާގެ ދެ މަންޒިލަކަށް ނެރޯ ބޮޑީގެ ދަތުރުތައް ފަށަނީ

އަންނަ ޖެނުއަރީ މަހު ޗައިނާގެ ދެ މަންޒިލަކަށް ނެރޯ ބޮޑީގެ ދަތުރުތައް ފެށުމަށް ތައްޔާރުވަމުންދާ ކަމަށް ޤައުމީ އެއަރލައިން މޯލްޑިވިއަނުން ވިދާޅުވެއްޖެއެވެ.

މޯލްޑިވިއަންއިން ވަނީ، ޤައުމީ އެއަރލައިނުން ބޭރުގެ މަންޒިލްތަކަށް ކުރާ ދަތުރުތަށް އިތުރު ކުރުމަށް މަސައްކަތް ކުރަމުންދާ ކަމަށް ވިދާޅުވެފައެވެ.

ޤައުމީ އެއަރލައިނުން ބޭރުގެ މަންޒިލްތަކަށް ކުރާ ދަތުރުތައް އެއްކޮށް ހުއްޓިގެން ދިޔައީ، ކޯވިޑުގެ ޢަލަމީ ވަބާއާއެކުއެވެ. އޭގެފަހުން އަލުން ދަތުރުތައް ފެށުމަށް ކުރާ މަސައްކަތްތަކާއެކު ދުރު މަންޒިލްތަކަށް ދަތުރުތައް ފުޅާކުރުމަށް، ކުރަމުންދާ މަސައްކަތްތަކުގެ ތެރެއިން ވައިޑްބޮޑީ މަތިންދާ ބޯޓެއް ވަނީ ރާއްޖެ ގެނެސްފައެވެ. އަދި މި ބޯޓު މެދުވެރިކޮށް ޗައިނާގެ 3 މަންޒިލަކަށް ވަނީ، ދަތުރުތައް ފަށާފައެވެ. ޤައުމީ އެއަރލައިން ހިންގާ އައިލޭންޑް އެވިއޭޝަނުން މިހާރު ދަނީ، އިތުރު ބޯޓެއް ހޯދުމުގެ މަސައްކަތްވެސް ކުރަމުންނެވެ.

މޯޑލްޑިވިއަންގެ ދަތުރުތައް ބޭރުގެ މަންޒިލްތަކަށް ފުޅާކުރުމުގެ މަސައްކަތުގެ ތަފްސީލް ދެއްވާ، ޕީއެސްއެމް ނިއުސްގެ ހަފުތާ 104 ޕްރޮގްރާމުގައި ވާހަކަ ދައްކަވަމުން އައިލޭންޑް އެވިއޭޝަންގެ މެނޭޖިންގ ޑިރެކްޓަރ އިބްރާހިމް އިޔާސް ވިދާޅުވީ، ވައިޑް ބޮޑީ ދަތުރުތަކުގެ އިތުރަށް ނެރޯ ބޮޑީގެ ދަތުރުތައްވެސް ޗައިނާއަށް ފެށުމަށް މަސައްކަތް ކުރަމުންދާ ކަމަށެވެ. އޭނާ ވަނީ، މީގެ ކުރިންވެސް މޯލްޑިވިއަނުން ޗައިނާގެ ސިޓީތަކަށް ނެރޯ ބޯޑީގައި ދަތުރުކޮށްފައިވާކަން ފާހަގަކޮށްފައެވެ.

"ޗައިނާގެ ކުރިން ހުއްޓާލާފައިވާ، މިސާލަކަށް ޖިއާން ސިޓީ އެއީ އަޅުގަނޑުމެން އޮޕަރޭޓް ކުރަނީ، ނެރޯ ބޮޑީވީމަ ތައިލޭންޑުގެ ބެންކޮކަށް ޖައްސާފައި ދަތުރުކުރަނީ. އެ މިހާރު ސީޒަނަލީ މިއަންނަ ޖެނުއަރީން ފެށިގެން، އަޅުގަނޑުމެންގެ ސީޒަނަލް ފްލައިޓުތައް ފެށިގެންދާނެ. ޗައިނާގެ ޖިއާން އަދި ޗައިނާގެ ޝެންޒެންއަށް އަޅުގަނޑުމެންގެ ނެރޯ ބޮޑީ ދަތުރުތައް. އެ ދަތުރުތައްވެސް ވަރަށް ބޮޑަށް ފުޅާވެގެންދާނެ ކުރިއަށް އޮތްތަނުގައި" އައިއޭއެސްގެ މެނޭޖިންގ ޑިރެކްޓަރ އިޔާސް ވިދާޅުވިއެވެ.

މޯލްޑިވިއަންގެ ދަތުރުތައް ޗައިނާއަށް އިތުރަށް ފުޅާކުރުމުގެ މަސައްކަތް ކުރަމުންދާއިރު، ވައިޑް ބޮޑީގައި ޗައިނާއަށް ކުރާ ދަތުރުތައް ވަރަށް ބޮޑަށް ކާމިޔާބުކަން އައިލޭންޑް އެވިއޭޝަނުން ވަނީ ފާހަގަކުރައްވާފައެވެ. އެގޮތުން މިހާތަނަށް ޗައިނާއިން އެކަނި ވައިޑް ބޮޑީގައި 20،000 އަށްވުރެ ގިނަ މީހުން އުފުލާފައިވާ ކަމަށް ވިދާޅުވިއެވެ. މީގެ އިތުރުން މިދަތުރުތަކުގައި 1100 ޓަނުގެ މުދާ އުފުލާފައިވާ ކަމަށްވެސް މޯލްޑިވިއަންއިން ވަނީ ހާމަކޮށްފައެވެ.

ޗައިނާގެ އިތުރުން އިންޑިއާގެ ކޮޗިން އަދި ޓްރެވިންޑްރަމަށް މިހާރު ނެރޯ ބޮޑީގައި ހަފްތާއަކު 4 ދަތުރު ކުރަމުންދާކަން އިޔާސް ފާހަގަކުރެއްވިއެވެ. މިދަތުރުތައްވެސް އަންނަ މަހު ހަފްތާއަކު 5 ދަތުރަށް އިތުރުކުރާނެ ކަމަށް އިޔާސް ވިދާޅުވިއެވެ. އަދި ބަންގްލަދޭޝްގެ ޑާކާއަށް މިވަގުތު ދަތުރުތައް ހުއްޓިފައިވީނަމަވެސް އަންނަ އަހަރު އެދަތުރުތައްވެސް އަލުން ފެށުމަށް މަސައްކަތް ކުރަމުންދާ ކަމަށް އެމްޑީ އިޔާސް ވިދާޅުވިއެވެ.

މޯލްޑިވިއަންގެ ދަތުރުތައް ބޭރުގެ މަންޒިލްތަކަށް ފުޅާކުރުމަށް ކުރަމުންދާ މަސައްކަތުގެ ތެރެއިން ވައިޑް ބޮޑީގެ ދަތުރުތައް އިތުރު މަންޒިލްތަކަށް ފުޅާކުރުމަށް އެކުންފުނިން ދަނީ މަސައްކަތް ކުރަމުންނެވެ.