ދިވެހި 2 އާއިލާއަކަށް އެހީތެރިކަން، ކޮލަމްބޯގައި ޓްރާންސިޓް ނުކުރުމަށް އިލްތިމާސެއް!
-
ކުރިއަށް އޮތް 5 ދުވަހު ޓްރާންސިޓް ނުވުމަށް އިލްތިމާސްކުރެއްވި
-
24 ގަޑިއިރު އެހީތެރިކަން ފޯރުކޮށްދޭނެ ކަމަށް ވިދާޅުވި
ސްރީލަންކާއަށް ކުރަމުންދާ ވިއްސާރައިގައި ހާލުގައި ޖެހުނު ދިވެހި 2 އާއިލާއަކަށް އެހީތެރިކަން ފޯރުކޯށްދީފައިވާ ކަމަށް ސްރީލަންކާއަށް ދިވެހިރާއްޖޭން ކަނޑައަޅުއްވާފައި ހުންނަވާ ސަފީރު މަސްޢޫދު ޢިމާދު ވިދާޅުވެއްޖެއެވެ.
ސަފީރު މިހެން ވިދާޅުވީ ލަންކާއަށް އެހީތެރިކަން ފޯރުކޮށްދިނުމަށް މިހާރު ކުރިއަށްގެންދާ "ސިލޯނާއެކު ދިވެހީން" ޓެލެތޯނުގައި މައުލޫމާތު ދެއްވަމުންނެވެ. ސަފީރު ވަނީ ލަންކާގެ އެންމެ ފަހުގެ އަދާހަމަ މި ޓެލެތޯނުގައި ހިއްސާކުރައްވާފައެވެ.
ލަންކާއަށް ރާއްޖޭން ކަނޑައަޅުއްވާފައި ހުންނަވާ ސަފީރު މަސްޢޫދު ޢިމާދު ވިދާޅުވީ ލަންކާއަށް ކުރަމުންދާ ވިއްސާރަ މިހާރު ހަމައަކަށް އެޅުނު ނަމަވެސް ބައެއް ހިސާބުތަކުގައި ކޯރުތައް ބަންޑުވެ، ބިންގަނޑު ކަނޑައިގެންދިއުން ފަދަ ހާދިސާތައް ދިމާވާނެ ކަމަށް ލަފާކޮށް އެކި އިދާރާތަކުން އިންޒާރު ދީފައިވާ ކަމަށެވެ. އެފަދަ ސަރަހައްދެއްގައި ދިރިއުޅެމުންދިޔަ ދިވެހި 2 އާއިލާއަކަށް ބޭނުންވާ އެހީތެރިކަން ފޯރުކޮށްދީ، ހޮޓަލަކަށް ބަދަލުކޮށްފައިވާ ކަމަށް ސަފީރު ވިދާޅުވިއެވެ.
ސަފީރު ވިދާޅުވީ ދެ އާއިލާގެ ހާލަތުވެސް ލަންކާގައި ހުންނަ ރާއްޖޭގެ އެމްބަސީން ވަރަށް ގާތުން ބަލަމުންދާ ކަމަށެވެ. އަދި ލަންކާގައި ދިރިއުޅޭ ދިވެހިންގެ ހާލު ބަލައި ބޭނުންވާ އެހީތެރިކަން ފޯރުކޮށްދިނުމަށް ހޮޓްލައިން ގާއިމުކޮށް، 24 ގަޑިއިރު ޚިދުމަތް ފޯރުކޮށްދެމުންދާ ކަމަށްވެސް ވިދާޅުވިއެވެ.
"އަޅުގަނޑުމެންގެ ސްޓޭންޑްބައި ޓީމަކުން މިހާރުވެސް މަސައްކަތް ކުރަމުންދަނީ ކޮންސިއުލަރގައި. ރީޗްއައުޓް ކުރަމުންމިދަނީ ދިވެހިންނަށް އެއްވެސް ކަމެއް ބޭނުންވެއްޖެއްޔާ އަޅުގަނޑުމެން ވަގުތުން ޓްރާންސްޕޯޓް ފޮނުވައިގެން އެމީހުންނަށް ހެލްޕުކޮށްދޭނެ. ފެންބޮޑުވެފައި ހުރި އެއްތަނަކުން ދެ ފެމިލީ ރެސްކިއު ކުރެވިއްޖެ. އެ ބޭފުޅުން ހޮޓަލަށް ލައިދީ، ސޭފްތޯ އެބަ ބަލަން." ލަންކާއަށް ރާއްޖޭން ކަނޑައަޅުއްވާފައި ހުންނަވާ ސަފީރު ވިދާޅުވިއެވެ.
ލަންކާއަށް ކުރަމުންދާ ވިއްސާރައިގައި އެހީތެރިކަން ފޯރުކޮށްދީފައިވަނީ އެ ޤައުމުގެ މަލާބޭ ސަރަހައްދުގައި ދިރިއުޅޭ ދެ އާއިލާއަކަށް ކަމަށް ސަފީރު ވިދާޅުވިއެވެ.
ވިއްސާރައާ ގުޅިގެން ކޮލަމްބޯ އެއަރޕޯޓުގައި ދިމާވާ ދަތިތަކަށް ރިއާޔަތް ކުރައްވައި ސަފީރު ވަނީ ކުރިއަށް އޮތް 5 ދުވަހު ދަތުރު ކުރާ ފަރާތްތަކުން އެ އެއަރޕޯޓުގައި ޓްރާންސިޓް ނުވާގޮތަށް ދަތުރުކުރުމަށް އިލްތިމާސްކުރައްވާފައެވެ. އަދި އެއްވެސް އެހީތެރިކަމެއް ބޭނުންވާނަމަ އެމްބަސީގެ ހޮޓްލައިނަށް ގުޅުމަށް އިލްތިމާސްކުރެއްވިއެވެ.