ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ކަނޑުދަތުރު ފަތުރުކުރުން މަޑުޖައްސާލާފައިވާކަމަށް ބައެއް ފަރާތްތަކުން ބުނެފިއެވެ.
މިގޮތުން ހއ، ނ އަތޮޅުން ބުނީ ވިއްސާރައިގެ ސަބަބުން ދަތުރުފަތުރުކުރެވޭ ވަރަށްވުރެ މޫސުން ގޯސްވުމުގެ ސަބަބުން އަތޮޅު ފެރީތައް މެދުކަނޑާލެވިފައިވާކަމަށެވެ. ބ. އަތޮޅުން ބުނީ ވިއްސާރައާ ގުޅިގެން އެ އަތޮޅުގައި ކަނޑުދަތުރުކުނުކުރެވޭ ވަގުތުތައް އަންނަކަމަށެވެ. މި ވިއްސާރައާ ގުޅިގެން ބައެއް ސަރަޙައްދުތަކަށް ބޯކޮށް ވާރޭ ވެހުނުކަމުގައި ވީނަމަވެސް ފެން ބޮޑުވިކަމުގެ މަޢުލޫމާތު ލިބިފައިވަނީ ގދ. އަތޮޅާއި އައްޑުއަތޮޅުންކަމަށެވެ. ގދ. ތިނަދޫގައި އެއްފޫޓަށް ފެންގަނޑު އޮތްކަމަށް އެރަށު ކައުންސިލުން ބުނެއެވެ. އަދި އައްޑޫ ސިޓީގެ ހިތަދޫގެ މަގުތަކުގައި ފެންބޮޑުވެފައިވެއެވެ. އަދި ބައެއް ގޭގެއަށް ފެންވަނުން ކޮންޓްރޯލްކުރަން ޖެހުނެވެ. ހިތަދޫގެ މަގުތަކުން ފެން ހިއްކުމާއި ގޭގެއަށް ފެންވަނުން ކޮންޓްރޯލްކުރުމަށް ވެލިބަސްތާޖެހުމުގެ މަސައްކަތުގައި ދިވެހި ސިފައިން ވަނީ ޙަރަކާތްތެރިވެފައެވެ.
img:http://s1.psmnews.mv/images/660x400/14723825273272.jpg|ވިއްސާރައިގެ ސަަބަބުން ތިނަދޫގައި ފެން ބޮޑުވެފައި / ފޮޓޯ: އެމްއެންޑީއެފް
މާލެއާއި އަތޮޅުތަކާ ދެމެދު މުދާއުފުލާ ބައެއް ބޯޓުފަހަރުން ބުނީ މޫސުން ގޯސްވުމާ ގުޅިގެން އެއް ހަފްތާ ވަންދެން ދަތުރު ނުކުރާކަމަށެވެ. އެކަމަކު މިރޭ ބައެއް ބޯޓުތައް ފުރަން ވަނީ ތައްޔާރުވެފައެވެ. އެހެންނަމަވެސް ދަތުރުކުރާނީ މޫސުމަށް ބެލުމަށްފަހުގައިކަން އެފަރާތްތަކުން ފާހަގަކުރެއެވެ.
މޫސުމާބެހޭ ޤައުމީ އިދާރާއިން ވަނީ ރާއްޖެއިން އެންމެ ބޮޑަށް ވިއްސާރަކުރާނީ މެދުރާއްޖެތެރެއާއި ދެކުނުގެ އަތޮޅުތަކަށްކަމަށް ވިދާޅުވެފައެވެ. ރާއްޖެއަށް މިދުވަސްކޮޅު ވައިބާރުވެ، ވިއްސާރަކުރަމުން މިދަނީ ރާއްޖެ ހިމެނޭ ސަރަޙައްދުގައި އުފެދިފައިވާ ލޯޕްރެޝަރ ޓްރަފެއް ރާއްޖެ ސަރަޙައްދަށް އެރުމުންކަމަށް ރާއްޖޭގެ މޫސުމާބެހޭ އިދާރާއިން ވިދާޅުވެއެވެ.