ފަތުރުވެރިކަމަށް ޚާއްޞަ ކެމްޕޭނެއް ހިންގަން މަޓާޓޯއިން ނިންމައިފި

ދެމެހެއްޓެނިވި ގޮތެއްގައި ރާއްޖޭގެ ފަތުރުވެރިކަން ކުރިއެރުވުމަށްޓަކައި އަންނަ އަހަރުތެރޭގައި ޚާއްޞަ ކެމްޕޭނެއް ހިންގުމަށް މަޓާޓޯއިން ނިންމައިފިއެވެ.

މަޓާޓޯއިން މިކަން އިޢުލާންކޮށްފައިވަނީ ރޭ ބޭއްވި އެ އެސޯސިއޭޝަންގެ އަހަރީ ޢާއްމު ޖަލްސާގައެވެ. ޗަންޕާ ސެންޓްރަލްގައި ބޭއްވި އެ އެސޯސިއޭޝަންގެ އަހަރީ ޢާއްމު ޖަލްސާގައި ފުރަތަމަ ފަހަރަށް މަޓާޓޯގެ ގަވަރނިންގ ބޯޑަށް އަންހެން ބޭފުޅަކު ޢައްޔަންކޮށްފައިވެއެވެ. އަދި މަޓާޓޯގެ ރައީސްއަކަށް ހޮވާފައިވަނީ ކުރިންވެސް އެމަޤާމުގައި ހުންނެވި ޢަބްދުﷲ ޤިޔާސްއެވެ. img:http://s2.psmnews.mv/images/660x400/14748830828255.jpg|މަޓާޓޯގެ އަހަރީ ޢާއްމު ޖަލްސާގެ ތެރެއިން - ފޮޓޯ: ޕީއެސްއެމް ނިއުސް

މަޓާޓޯއިން ކުރިއަށްގެންދިޔުމަށް ހަމަޖެހިފައިވާ ކެމްޕޭނާއި ގުޅޭގޮތުން ވާހަކަދައްކަވަމުން ޤިޔާސް ވިދާޅުވީ، މި ކެމްޕެއިން މެދުވެރިކޮށް، ފަތުރުވެރިކަމުގެ ސިނާޢަތުގައި ޙަރަކާތްތެރިވާ ދިވެހިންގެ އަދަދު އިތުރުކުރުމަށް ޙަރަކާތްތަކެއް ހިންގަން ރާވާފައިވާ ކަމަށާއި، ފަތުރުވެރިކަމުގެ ދާއިރާއިން މަސައްކަތުގެ ތަޖުރިބާ 1،000 މީހަކަށް ޙިއްޞާކުރުމަށްވެސް އެ އެސޯސިއޭޝަނުން ވަނީ ނިންމާފައެވެ.

އަދި ރާއްޖޭގެ ފަތުރުވެރިކަމުގެ ސިނާޢަތް ބާރު ދުވެއްޔެއްގައި ކުރިއަރަމުން އަންނައިރު ޓުއަރ އޮޕަރޭޓަރުން ރާއްޖެ މަރކެޓް ކުރުމުގައި މުހިއްމު ދައުރެއް އަދާކުރާކަން ޤިޔާސް ފާހަގަކުރެއްވިއެވެ. img:http://s1.psmnews.mv/images/660x400/14748831161642.jpg|މަޓާޓޯގެ އަހަރީ ޢާއްމު ޖަލްސާގެ ތެރެއިން - ފޮޓޯ: ޕީއެސްއެމް ނިއުސް

މީގެ އިތުރުން މަޓާޓޯއިން އަންނަ އަހަރުގެ ތެރޭގައި ކުރިއަށްގެންދިޔުމަށް ހަމެޖެހިފައިވާ ޙަރަކާތްތަކުގެ ތެރޭގައި ރާއްޖޭގައި އިންޓަނޭޝަނަލް ލިޓެރަރީ ފެސްޓިވަލެއް ބޭއްވުމާއި ޗައިނާ އާއި އިންޑީއާގައި ރޯޑް ޝޯ ބޭއްވުމުގެ އިތުރުން ޓްރެވަލް އޭޖެންޓުންނަށް ޚާއްޞަ އިންޝުއަރެންސް ސްކީމެއް ތަޢާރަފްކުރުން ހިމެނެއެވެ.