އީރާނުގެ އިސްލާމިކް ރިވަލޫޝަނަރީ ގާޑް ކޯޕްސް (އައި.އާރު.ޖީ.ސީ) އިން އޮމާން ކަނޑުގައި ހިންގި ޚާއްޞަ އޮޕަރޭޝަނެއްގައި 'އޯޝަން ކޯއީ' ނަމަކަށް ކިޔާ ތެޔޮ ޓޭންކަރެއް ހިފަހައްޓާފައިވާކަން އެ ޤައުމުގެ ދައުލަތުގެ މީޑިއާއިން ހާމަކޮށްފިއެވެ. އައި.އާރު.ޖީ.ސީއާ ޙަވާލާދީ ޚަބަރު ފަތުރާ ވަސީލަތްތަކުން ރިޕޯޓްކޮށްފައިވާ ގޮތުގައި، މި އުޅަނދަކީ އީރާނުގެ ތެޔޮ އެކްސްޕޯޓަށާއި އެ ޤައުމުގެ މަޞްލަޙަތުތަކަށް ހުރަސްއެޅުމަށް މަސައްކަތް ކުރަމުންދިޔަ އުޅަނދެކެވެ.
ފާރްސް ނިއުސް އެޖެންސީން އިޢުލާނުކުރި ބަޔާނެއްގައި، އީރާނުގެ އަސްކަރީ ތަރުޖަމާނަކު ވިދާޅުވީ އީރާނު ނޭވީގެ ރޭންޖަރުންނާއި މެރިންސް ގުޅިގެން، ޤަވާޢިދާ ޚިލާފުވި އެ ޓޭންކަރު އެ ޤައުމުގެ ދެކުނު އައްސޭރިފަށުގެ ބަނދަރަކަށް ގެންގޮސްފައިވާ ކަމަށެވެ. މީގެ އިތުރުން، އިރްނާ ނިއުސް އެޖެންސީން ބުނި ގޮތުގައި، އީރާނުގެ ސަރަޙައްދީ ކަނޑުގެ ތެރޭގައި އެ ޤައުމުގެ މުދަލާއި މަޞްލަޙަތުތައް ދިފާޢުކުރުމުގައި އަސްކަރިއްޔާ ދެމިއޮންނާނެ ކަމަށާއި، އެއްވެސް އުދުވާނީ ޢަމަލަކަށް ނުވަތަ ޤާނޫނާ ޚިލާފު ޢަމަލުތަކަށް ދޫނުދޭނެ ކަމަށް އަސްކަރިއްޔާގެ ބަޔާނުގައި ބަޔާންކޮށްފައިވެއެވެ.
ދައުލަތުގެ ޓީވީން ވަނީ އީރާނުގެ ސިފައިން އެ އުޅަނދަށް އަރައި، އެ އުޅަނދު އެ ސިފައިންގެ ބާރުގެ ދަށަށް ގެންދާ މަންޒަރު ފެންނަ ވީޑިއޯއެއްވެސް ޢާންމުކޮށްފައެވެ. 'މެރިން ޓްރެކާ' އިން މަޢުލޫމާތު ދޭ ގޮތުގައި، މި އުޅަނދަކީ ބާބަޑޯސްގައި ރަޖިސްޓްރީކޮށްފައިވާ އުޅަނދެކެވެ.
ތެހެރާނުން މި ޚަބަރު ރިޕޯޓްކުރަމުން އަލްޖަޒީރާގެ ރަސޫލް ސަރްދާރު ފާހަގަކުރި ގޮތުގައި، މިއީ އައި.އާރު.ޖީ.ސީން މިފަދަ އުޅަނދެއް ހިފެހެއްޓި ފުރަތަމަ ފަހަރެއް ނޫނެވެ. މީގެ ކުރިންވެސް ހުރްމުޒް ކަނޑުއޮޅިން ތިން އުޅަނދެއް ހިފަހައްޓާފައިވާކަން އޭނާ ފާހަގަކުރިއެވެ. ނަމަވެސް، މި ފަހަރުގެ މި ޙަރަކާތަކީ އީރާނުގެ ސިޔާސަތަށް އައި ބޮޑު ބަދަލެއްގެ ފެށުން ކަމަށްވެސް އޭނާ ސިފަކުރިއެވެ.
ހަނގުރާމައިގެ ސަބަބުން ސަރަހައްދުގެ މަސްލަހަތަށް ބޮޑެތި ބަދަލުތަކެއް އައިސްފައިވާ ކަމަށާއި، މިހާރުގެ ހާލަތަކީ އީރާނުގެ ގައުމީ ސަލާމަތަށް ހުރި ނުރައްކަލެއް ކަމަށް އެ ޤައުމުން ގަބޫލުކުރެއެވެ. މިކަމާ ގުޅިގެން، ކަނޑުދަތުރުފަތުރުގެ އައު އުސޫލުތަކެއް ހިމެނޭ "މެރިޓައިމް ރެޖީމް" އެއް ތައާރަފުކުރުމަށް އީރާނުން ދަނީ ތައްޔާރުވަމުންނެވެ.
މި އައު ނިޒާމުގެ ދަށުން ކަނޑައެޅިފައިވާ މުހިންމު ކަންތައްތަކަކީ:
- ޕަރޝިއަން ގަލްފް ސްޓްރެއިޓް އޮތޯރިޓީ އުފެއްދުން: ހުރްމުޒް ކަނޑުއޮޅިން ދަތުރުކުރާ އެންމެހައި އުޅަނދުތައް މޮނިޓަރކޮށް ބެލެހެއްޓުމުގެ ޒިންމާ މަތިކުރެވިފައިވަނީ އަލަށް އުފައްދާ މި އިދަރާއަށް.
- މައުލޫމާތު ހިއްސާކުރުން: އެ ސަރަހައްދުން ދަތުރުކުރާ އުޅަނދުތަކުން، އެ އުޅަނދެއްގެ މިލްކުވެރި ޤައުމާއި، އުފުލާ މުދަލުގެ ތަފްސީލުގެ އިތުރުން ދަތުރުކުރާ މަންޒިލާ ގުޅޭ ފުރިހަމަ މައުލޫމާތު އީމެއިލް މެދުވެރިކޮށް އީރާނުގެ ކަމާބެހޭ އިދާރާތަކަށް ހުށަހަޅަންޖެހުން.
- ދަތުރުފަތުރުގެ ފީ: ހުށަހަޅާ މައުލޫމާތުތައް ދިރާސާކުރުމަށްފަހު، އެ ސަރަހައްދު ބޭނުންކުރާ އުޅަނދުތަކުން ވަކި މިންވަރެއްގެ ފީއެއް ނެގުމަށް ވަނީ ނިންމުން.
ދުނިޔޭގެ ތެލުގެ ބާޒާރުގެ ފަސްބައިކުޅަ އެއްބައި ހުރްމުޒް ކަނޑުއޮޅި މެދުވެރިކޮށް ދަތުރުކުރާތީ، މި ބަދަލުތަކުގެ ސަބަބުން ބައިނަލްއަޤްވާމީ ވިޔަފާރިއަށާއި އިޤްތިސާދަށް ބޮޑެތި އަސަރުތަކެއް ކުރާނެ ކަމަށް ބެލެވެއެވެ.