ސަރުކާރާއި ސަރުކާރު ޙިއްޞާވާ ކުންފުނިތަކުގައި މަސައްކަތްކުރާ މުވައްޒަފުންނަށް ޚާއްޞަ ހައުސިންގ ސްކީމެއް ހިންގަވަން ނިންމާފައިވާކަމަށް އެޗްޑީސީއިން ހާމަކޮށްފިއެވެ.
އެޗްޑީސީގެ ޑިރެކްޓަރ ފައިނޭންސް ޢަލީ ޝަރީފް ވިދާޅުވީ ރާއްޖޭގެ ވަޒީފާގެ ބާޒާރުގެ ބޮޑުބައެއް ޙިއްޞާކުރަމުންދަނީ ސަރުކާރާއި ސަރުކާރު ޙިއްޞާވާ ކުންފުނިތަކުގައި މަސައްކަތްކުރާ މުވައްޒަފުންކަމަށް ވުމުން، އެމީހުންނަށް ޚާއްޞަ ހައުސިންގ ސްކީމެއް ކުރިއަށް ގެންދަން ނިންމާފައިވާކަމަށެވެ. ޢަލީ ޝަރީފް ވިދާޅުވީ މިހައުސިންގ ސްކީމް ވެގެންދާނީވެސް އެފަރާތްތަކަށް ލިބޭ ޢާމްދަނީގެ ނިޞްބަތުން އަގުއަދާކުރެވޭފަދަ ހައުސިންގ ސްކީމަކަށްކަމަށެވެ.
އޭނާ ވިދާޅުވީ ހުޅުމާލޭގައި ހަދާ 400 އެއްހާ ފްލެޓްތައް ޢިމާރާތްކުރުމަށް މިޕްރޮޖެކްޓްގެ މަސައްކަތަށް މިހާރު ކޮންޓްރެކްޓަރެއް ހޯދުމަށް ހުޅުވާލާފައިވާކަމަށެވެ. އަދި، މިމަހުގެ ތެރޭގައި ބިޑް އިވެލުއޭޓްކޮށް ނިންމައި ބަޔަކާ ޙަވާލުކުރުމަށްފަހު މިސްކީމްގެ ތަފްސީލް މަޢުލޫމާތު މިމަހުގެތެރޭގައި އިޢުލާންކުރާނެކަމަށެވެ.
ސަރުކާރުން ވަނީ ފުލުހުންނާއި ސިފައިންނަށްވެސް ޚާއްޞަ ހައުސިންގ ސްކީމެއް އިޢުލާންކުރުރައްވާފައެވެ.