އުރުދުންގެ މިނިވަން ދުވަހުގެ ތަހުނިޔާ ރައީސް ފޮނުއްވައިފި

އުރުދުންގެ މިނިވަން ދުވަހުގެ ތަހުނިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.

އުރުދުންގެ މިނިވަން ދުވަހާއި ގުޅިގެން ރައީސުލްޖުމްހޫރިއްޔާ މީސްމިޑިއާގައި ކުރެއްވި ޕޯސްޓުގައިވަނީ، އެޤައުމުގެ ރަސްގެފާނު ޢަބްދުﷲއަށާއި، ބޮޑުވަޒީރު ޖައުފަރު ޙައްސާނަށާއި، ސަރުކާރަށާއި، އުރުދުންގެ ލޮބުވެތި ރައްޔިތުންނަށް އިޚްލާޞްތެރިކަމާއެކު ތަހުނިޔާއާއި ހެޔޮއެދުންތައް ފޮނުއްވާފައެވެ. މި އުފާވެރި މުނާސަބަތަކީ، އުރުދުންގެ ރައްޔިތުންގެ މެދުގައި އޮތް އެއްބައިވަންތަކަން އިތުރަށް ވަރުގަދަވެ، އެޤައުމަށް ދެމެހެއްޓެނިވި ބަދަހިކަމާއި ކާމިޔާބީ ލިބިގެންދާނެ ދުވަހެއްގެ ގޮތުގައިވުމަށް ރައީސް ވަނީ އެދިވަޑައިގެންފައެވެ.

It gives me great pleasure to convey my sincere felicitations to His Majesty @KingAbdullahII, His Excellency Prime Minister @JafarHassan, the Government and the brotherly people of Jordan on their Independence Day. May this joyous occasion strengthen the unity among the people… pic.twitter.com/9aQVkhB3Og

— Dr Mohamed Muizzu (@MMuizzu) May 25, 2026

ރައީސުލްޖުމްހޫރިއްޔާ ވިދާޅުވީ، ދިވެހިރާއްޖެއާއި އުރުދުންއާ ދެމެދު އޮތް ގުޅުން ބިނާވެފައިވަނީ ދެ ޤައުމުގެ މެދުގައިވާ އިސްލާމީ އެއްބައިވަންތަކަމާއި ދެޤައުމުން ޤަބޫލުކުރާ އެއްގޮތް އުޞޫލުތަކުގެ މައްޗަށް ކަމަށެވެ. އަދި ދެ ޤައުމު ދެމެދުގައި އޮތް ގާތް ރަޙްމަތްތެރިކަމާއި، އެކަކު އަނެކަކަށް ދޭ އެއްބާރުލުމާއި، މަޝްވަރާތަކުގެ ސަބަބުން، ދެޤައުމަށްވެސް މަންފާކުރަނިވި ގޮތެއްގައި މި ގުޅުން ކުރިއަށްދާނެކަމަށް އުންމީދު ކުރައްވާކަމަށް ވިދާޅުވިއެވެ.

އުރުދުންގެ މިނިވަން ދުވަސް ފާހަގަކުރަނީ، ދެވަނަ ބޮޑު ހަނގުރާމައަށްފަހު އިނގިރޭސީންގެ ހިމާޔަތުގެ ދަށުގައި އޮތުން ނިމުމަކަށް ގެނެސް، 1946 ވަނަ އަހަރު ލަންޑަން ޓްރީޓީގެ ދަށުން މިނިވަން ޤައުމެއްގެ ގޮތުގައި އެޤައުމުން ކަނޑައެޅުމާއި ގުޅިގެންނެވެ. އޭގެފަހުން ކޮންމެ އަހަރަކުވެސް މެއި މަހުގެ 25 ވަނަ ދުވަސް ފާހަގަކުރަނީ، އުރުދުންގެ މިނިވަން ދުވަހުގެ ގޮތުގައެވެ.