އެންމެ ގިނަ ދުވަހު އިންޑިއާގެ ބޮޑުވަޒީރުކަމުގެ މަގާމުގެ ޝަރަފް މޯދީއަށް، ރައީސްގެ މަރުޙަބާ

އެންމެ ގިނަ ދުވަހު އިންޑިއާގެ ބޮޑުވަޒީރުކަމުގެ މަޤާމު ފުރުއްވި ބޭފުޅާގެ ޝަރަފު ލިބިވަޑައިގަތުމާއި ގުޅިގެން ނަރެންދުރަ މޯދީއަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މަރުޙަބާ ވިދާޅުވެއްޖެއެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، މެދުކެނޑުމެއް ނެތި އެންމެ ގިނަ ދުވަހު އިންޑިއާގެ ބޮޑުވަޒީރުކަމުގެ މަޤާމު ފުރުއްވި ބޭފުޅާގެ ޝަރަފު ހޯއްދެވި ކަމަށްޓަކައި، ބޮޑުވަޒީރު ނަރެންދުރަ މޯދީއަށް އިޚްލާޞްތެރި މަރުޙަބާއެއް ދަންނަވާކަމަށެވެ.

Warm congratulations to His Excellency Prime Minister @narendramodi on becoming India’s longest-serving elected Prime Minister by consecutive days in office.

The Maldives looks forward to further strengthening cooperation with India, guided by mutual respect, sovereign equality,…

— Dr Mohamed Muizzu (@MMuizzu) June 10, 2026

ދިވެހިރާއްޖެއާއި އިންޑިއާއާއި ދެ ޤައުމުގެ ދެމެދުގައި އޮންނަ އިޙްތިރާމާއި، އިސްތިޤްލާލީ ހަމަހަމަކަމާއި، އަދި ދެފަރާތުގެ މަޞްލަޙަތު ހިމެނޭ ކަންކަމުގެ މައްޗަށް ބިނާކޮށް، އިންޑިއާއާއެކު އޮތް ގުޅުން އިތުރަށް ބަދަހިކުރުމަށް ދިވެހިރާއްޖެއިން އުންމީދުކުރައްވާކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަމަށް ހަވާލުވެވަޑައިގެންނެވުމަށްފަހުވަނީ އިންޑިއާއަށް ރަސްމީ ދަތުރުފުޅެއްކުރައްވާފައެވެ. އަދި އިންޑިއާގެ ބޮޑުވަޒީރު ނަރެންދުރަ މޯދީވެސް ވަނީ ރައީސްގެ ދަޢުވަތަކަށް ރާއްޖެ ވަޑައިގެންފައެވެ. މިދަތުރުފުޅުގެ ތެރެއިން އިންޑިއާއާއި ރާއްޖެއާ ދެމެދު މިނިވަން ވިޔަފާރީގެ އެއްބަސްވުމެއް ޤާއިމްކުރުމުގެ މަޝްވަރާތައް ފެށުމުގެ އެއްބަސްވުމެއްގައިވަނީ ސޮއިކުރައްވާފައެވެ. އަދި މީގެ ޓާމްސް އޮފް ރިފަރެންސް ނުވަތަ ޓީއޯއާރްގައި ދެޤައުމުން މިހާރުވަނީ ސޮއިވެސް ކޮށްފައެވެ.

އިންޑިއާގެ ބޮޑުވަޒީރުކަމުގެ މަގާމަށް ނަރެންދުރަ މޯދީ އައްޔަންކޮށްފައިވަނީ 26 މެއި 2014 ވަނަ އަހަރުއެވެ. މޯދީ ވަނީ 3 ވަނަ ދައުރަކަށް އިންޑިއާގެ ބޮޑުވަޒީރުކަމަށް އައްޔަންވެފައެވެ.

ރާއްޖެއާއި އިންޑިއާއާ ދެމެދު ސިޔާސީ ގުޅުން ޤާއިމްކުރިތާ 60 އަހަރު ވަނީ ވެފައެވެ. މި ގުޅުން މިއަދާއި ހަމައަށްވެސް ދެގޮތެއް ނުވެ ދަނީ ކުރިއަށްދަމުންނެވެ.