މުހިންމު މަޝްވަރާތަކަށްފަހު އޭޝިއާ ޕެސިފިކް މީޑިއާ ފޯރަމް ނިންމާލައިފި

މުހިންމު މަޝްވަރާތަކަށްފަހު އޭޝިއާ ޕެސިފިކް މީޑިއާ ފޯރަމް ނިންމާލައިފިއެވެ. މި ފޯރަމް އިންތިޒާމްކުރަނީ ޗައިނާގެ ސީޕީސީ ކެންޓްރްލް ކޮމިޓީއާއި، ޝިންހުއާ ނިއުސް އެޖެންސީ އަދި ގުއަންޑޮންގް ޕްރޮވިންޝަލް ގަވަރމަންޓް ގުޅިގެންނެވެ.

އޭޝިއާ ޕެސިފިކް މީޑިއާ ފޯރަމް ހުޅުވުމުގެ ރަސްމިއްޔާތުގައި މި ސަރަޙައްދުގެ އެކި ޤައުމުތަކުގެ މީޑިއާ ކުންފުނިތަކާއި މީޑިއާ ދާއިރާއަށް ޚާއްސަ ޔުނިވަރސިޓީތަކާއި، ސަރުކާރުތަކުގެ މުވައްސަސާތަކާއި، އދ. ގެ އެޖެންސީތައް އަދި ބައިނަލްއަގުވާމީ ޖަމްޢިއްޔާތައް ތަމްސީލުކުރާ ފަރާތްތައް ވަނީ ވާހަކަދައްކަވާފައެވެ.

މި ފޯރަމްގެ ތެރެއިން 2 ޕެނަލް ޑިސްކަޝަނެއް ވަނީ ކުރިއަށްގެންގޮސްފައެވެ. ފުރަތަމަ ޕެނަލް ޑިސްކަޝަންގެ މަޢުޟޫއަކީ "އެކި މުޖްތަމަޢުތަކުގެ ވާހަކަތަކުން އުނގެނުން" މިއެވެ. 2 ވަނަ ޕެނަލް ޑިސްކަޝަންގައި ވާހަކަދައްކާފައިވަނީ ޤައުމުތަކުގެ ސިނާއީ ބަދަހިކަމާ ގުޅޭ ތަޖުރިބާތަކާއި ގުޅޭގޮތުންނެވެ.

މި ޕެނަލް ޑިސްކަޝަންގެ ފުރަތަމަ ޕެނަލްގައި ޕަބްލިކް ސަރވިސް މީޑިއާ، ޕީއެސްއެމްގެ ޗެއަރޕާޝަން އައިމިނަތު ނަމްޒާ ވަނީ ވާހަކަދައްކަވާފައެވެ. ނަމްޒާ ދެއްކެވި ވާހަކައިގައި ތަރައްޤީވެފައިވާ ބޮޑެތި ޤައުމުތަކުގެ ޚަބަރުތައް ގެނެސްދޭގޮތަށް ކުދި ޤައުމުތަކާއި ތަރައްޤީވަމުން އަންނަ ޤައުމުތަކުން ހޯދާ ކާމިޔާބީތަކާއި އެ ޤައުމުތަކުން ރަނގަޅަށް ކުރާ ކަންތައްތަކުގެ ޚަބަރުތައް ގެނެސްދިނުމުގެ މުހިންމުކަން ފާހަގަކުރެއްވިއެވެ.

މި ސަމިޓުގައި އޭޝިއާ އަދި ޕެސިފިކް ސަރަޙައްދުގެ 42 ޤައުމެއްގެ 220 މީޑިއާއަކުން ބައިވެރިވެފައިވެއެވެ. މި ފޯރަމުގެ ބައިވެރިންވެސް ފާހަގަކުރިގޮތުގައި މިއީ މިޑިއާގެ ދާއިރާގެ ކުރިއެރުމަށް ވަރަށް މުހިންމު ފޯރަމެކެވެ. އަދި މި ފޯރަމުގައި ކުރިއަށްގެންދިޔަ މަޝްވަރާތަކަކީ ކުރިމަގުގައި ބާއްވާ ފޯރަމްތަކަށްވެސް މުހިންމު އަދި އެކަމުގެ މައްޗަށް ބިނާވާނެ ފޯރަމުތަކެއްގައި ބައިވެރިންވަނީ ފާހަގަކޮށްފައެވެ.


އޭޝިއާ ޕެސިފިކް މީޑިއާ ފޯރަމް ހުޅުވުމުގެ ރަސްމިއްޔާތު ބާއްވާފައިވަނީ ޗައިނާގެ ޝެންޖެންގައެވެ. ފޯރަމްގެ ހަވާސާގެ ތެރެއިން ކުރިއަށްދިޔަ ހަރަކާތްތައް ޗައިނާގެ 3 ސިޓީއެއްގައި މިމަހުގެ 3 އިން 4 އަކަށް ވަނީ ކުރިއަށްގެންގޮސްފައެވެ. ބައިނަލްއަޤްވާމީ މީޑިއާ ކުންފުނިތަކާއި މީޑިއާ ދާއިރާއަށް ޚާއްސަ ޔުނިވަރސިޓީތަކާއި، މުއައްސަސާތަކާއި ބައިނަލްއަގުވާމީ ޖަމްޢިއްޔާތައް ހިމެނޭހެން 400 އަށްވުރެ ގިނަ މަންދޫބުން މިއަހަރުގެ ސަމިޓްގައި ވަނީ ބައިވެރިވެފައެވެ.