އޭޝިއާގެ އެންމެ ބޮޑު ކުޅިވަރު މުބާރާތް ކަމަށްވާ އޭޝިއަން ގޭމްސްގައި ސްރީލަންކާ ވެސް މެޑަލް ހާސިލް ކޮށްފިއެވެ.
އަވަށްޓެރި ލަންކާއިން މިހާތަނަށް ހޯދާފައިވަނީ އެއް ރިހިމެޑަލްއެވެ. ނަމަވެސް ނޭޕާލް ވަނީ ދެ ލޯމެޑަލް ހާސިލް ކޮށްފައެވެ. ދެކުނު އޭޝިޔާގެ ގައުމުތަކަށް ބަލާއިރު އިންޑިއާއިން ވަނީ 37 މެޑަލް ހާސިލް ކޮށްފައެވެ. އެއީ ހަތަރު ރަންމެޑެއްޔާއި 16 ރިހިމެޑަލް އަދި 17 ލޯ މެޑަލްއެވެ.
ޕާކިސްތާން ވަނީ ހަތަރު ލޯ މެޑަލް މިހާތަނަށް ހާސިލް ކޮށްފައެވެ. ބަނގްލަދޭޝް ވެސް ހާސިލް ކޮށްފައިވަނީ ލޯ މެޑެއްޔެކެވެ.
މި މަހުގެ 19އިން އަންނަ އޮކްޓޫބަރު މަހުގެ ހަތަރަކަށް ޖަޕާނުގެ ނަގޯޔާގައި ކުރިއަށްދާ ގޭމްސްގައި މިހާތަނަށް އެންމެ ގިނަ މެޑަލް ހާސިލް ކޮށްފައިވަނީ ޗައިނާއެވެ. އެއީ ޖުމުލަ 205 މެޑަލްއެވެ. މީގެ ތެރޭގައި ހިމެނެނީ 119 ރަން މެޑެއްޔާއި 48 ރިހި މެޑަލް އާއި 38 ލޯ މެޑަލްއެވެ. މެޑަލް ޓޭބަލުގެ ދެ ވަނާގައިވަނީ 157 މެޑަލްއާއެކު ޖަޕާނެވެ. ތިން ވަނައިގައިވަނީ 83 މެޑަލްއާއެކު ދެކުނު ކޮރެޔާ އެވެ.
މި ފަހަރުގެ ގޭމްސް ޖަޕާނުގައި ކުރިއަށްދާއިރު އެ ގައުމުގެ ތައްޔާރީތަކަށް ގޭމްސްގައި ވާދަކުރާ ގައުމުތަކުން ވަނީ ފާޑު ކިޔާފައެވެ. އެއީ ކޮންޓޭނަރު ސްޓައިލަށް ހަދާފައިވާ ކުދި ކޮޓަރިތަކުގެ އެނދުތައް ކުޑަވުމާއި މޫނު ދޮންނަ ތަށިތަކުން ލީކުވުމާއި ކޮޓަރިތަކުގައި ގިނަ އެތުލީޓުންތަކެއް ތިބެން ޖެހުން ފަދަ ކަންކަމާ ހެދިއެވެ.
ޖަޕާނުން މިފަހަރު ނިންމާފައިވަނީ ޚަރަދު ކުޑަކުރުމުގެ ގޮތުން ގޭމްސްގެ އެތުލީޓް ވިލެޖް ނުހެދުމަށެވެ. އޭގެ ބަދަލުގައި އެކޮމޮޑޭޝަން ހަމަޖައްސާނީ ކޮންޓޭނަރު ކޮޓަރިތަކާއި ކްރޫޒް ލައިނާތަކުގައި ކަމަށެވެ. ނަމަވެސް ފާޑުކިއުން ބޮޑުވުމުން އެ ގައުމުން ވަނީ ބޭނުންވާ ބަޔަކު ހޮޓާތަކުގައި ތިބުމަށް ވެސް ހުއްދަ ދީފައެވެ. މީގެ އެންމެ ބޮޑު ސަބަބަކީ ކްރިކެޓް ޓީމުތަކުން ގޭމްސްގައި ބައިވެރި ނުވާނެ ކަމުގެ ބިރު ހީވުމެވެ.
ނަމަވެސް ޖަޕާނުގެ އެކޮމޮޑޭޝަން ބެލުމަށްފަހު އިންޓަރނޭޝަނަލް އޮލިމްޕިކް ކޮމިޓީން ވަނީ ގޭމްސްގެ އިންތިޒާމްތަކަށް އަމާޒުވި ފާޑުކިއުންތަކަކީ ހަގީގަތެއް ނޫން ކަމަށް ބުނެފައެވެ. އެ ޖަމާއަތުން ބުނީ ޖަޕާނުގެ އިންތިޒާމްތައް ކުރީ ހުރިހާ ގޮތަކުން ބެލި ނަމަވެސް ވަރަށް ފުރިހަމައަށް ކަމަށާއި ޚާއްސަކޮށް ކުޅުންތެރިން ތިބެން ތައްޔާރު ކުރި ވަގުތީ ތަންތަނުގެ ފެންވަރު ރަނގަޅު ކަމަށެވެ.