ޔަހޫދީ ދައުލަތުގެ ދެން އަންނަ ސަރުކާރެއްގައި ދިފާޢީ ވަޒީރުކަން ލިބިއްޖެނަމަ، ޔަހޫދީ ޖަލުތަކުގައި ބަންދުކޮށްފައިވާ ފަލަސްޠީނުގެ ޤައިދީންނަށް މަރުގެ އަދަބު ދިނުމަށާއި ޣައްޒާއާއި ހުޅަނގު އައްސޭރިން ފަލަސްޠީނު ރައްޔިތުން ނެރެ ބޭރުކުރުމުގެ މަސައްކަތް އަވަސްކުރާނެ ކަމަށް، ޔަހޫދީންގެ ހައްދުފަހަނައަޅާފައިވާ ސަލާމަތާބެހޭ ވަޒީރު އިތާމާރު ބެން-ގްވީރު ބުނެފިއެވެ.
ބެން-ގްވީރު މިކަން ހާމަކޮށްފައިވަނީ މީސްމީޑިއާގައި ޢާންމުކުރި ވީޑިއޯއެއްގައެވެ. އެ ވީޑިއޯއިން ފެންނަނީ ޔަހޫދީ ޖަލު ގޮޅިއެއްގައި ހުރި ފަލަސްޠީނުގެ ރައްޔިތެއް ކަމަށްވާ ޙަސަން ސަލާމާގެ ކުރިމައްޗަށް އޭނާ ގޮސް، "އަހަރެން ބޭނުންވަނީ ކަލެއަށް މަރުގެ އަދަބު ދޭން،" ކަމަށް ބުނެ ސީދާ އިންޒާރުދޭ މަންޒަރެވެ.
ޙަސަން ސަލާމާ އަކީ 1990 ގެ އަހަރުތަކުގައި ދިން ބޮމުގެ ޙަމަލާތަކަކާ ގުޅިގެން ގިނަ ޢަދަދެއްގެ ޔަހޫދީން މަރުވި ޙާދިސާތަކުގެ ތުހުމަތުގައި، 1996 ވަނަ އަހަރުން ފެށިގެން ހައްޔަރުކޮށް، ޢުމުރު ދުވަހުގެ ޖަލު ޙުކުމްތަކެއް ތަންފީޛު ކުރަމުންދާ މީހެކެވެ.
ވީޑިއޯއާއެކު ޢާންމުކުރި ބަޔާނުގައި ބެން-ގްވީރު ބުނީ، ދިފާޢީ ވުޒާރާއާ އޭނާ ޙަވާލުވެއްޖެނަމަ ސަލާމާ ފަދަ ޖަލުގައި ތިބި ފަލަސްޠީނުގެ ޤައިދީން މަރުގެ އަދަބު ދިނުން ކަށަވަރުކުރާނެ ކަމަށެވެ. އަދި ޣައްޒާއާއި ހުޅަނގު އައްސޭރިން ފަލަސްޠީނު މީހުން ބޭރުކުރުން އިތުރަށް ހަލުއިކުރާނެ ކަމަށްވެސް އޭނާ ބުންޏެވެ.
މިއީ ފަލަސްޠީނުގެ ރައްޔިތުން އެމީހުންގެ ވަޒަނުން މަޖުބޫރުން ނެރެލުމަށާއި، ހިންގަމުންދާ ނަސްލުހޭދަކުރުމުގެ ޖަރީމާތަކެއްގެ ގޮތުގައި ފަލަސްޠީނާއި ޢަރަބި ޤައުމުތަކުން އަބަދުވެސް ކުށްވެރިކުރާ ރޭވުމެކެވެ.
ބެން-ގްވީރުގެ ޕާޓީން ދެން އުފެދޭ އިއްތިހާދު ސަރުކާރަކާ ގުޅޭނީ ދިފާޢީ އަދި ޢަދުލުއިންޞާފާ ބެހޭ ވުޒާރާތަކުގެ މަޤާމުތައް އެ ޕާޓީއަށް ލިބޭނެކަން ކަށަވަރުކުރުމަށް ޝަރުޠުކޮށްފައި ކަމަށްވެސް އޭނާ ވަނީ ފާހަގަކޮށްފައެވެ.
ފަލަސްޠީނުގެ ޤައިދީންނަށް މަރުގެ އަދަބު ދިނުމުގެ ހުއްދަދޭ ޤާނޫނެއް މިއަހަރުގެ މާރިޗު މަހު ޔަހޫދީންގެ ޤާނޫނުހަދާ މަޖިލީހުން ވަނީ ފާސްކޮށްފައެވެ. މިއީ ބެން-ގްވީރުގެ ފެކްޝަނުން އިސްނަގައިގެން ފާސްކުރި ޤާނޫނެކެވެ. ނަމަވެސް، ޖަލުގައި ތިބި ފަލަސްޠީނު ރައްޔިތުންގެ އިންސާނީ ޙައްޤުތަކަށް އޮތް ނުރައްކަލެއް ކަމަށް ބުނެ، މި ބިލާ ދެކޮޅަށް ޢަރަބި ޤައުމުތަކުންނާއި ބައިނަލްއަޤްވާމީ މުޖުތަމަޢުން ދަނީ ބޮޑެތި ފާޑުކިޔުންތައް އަމާޒުކުރަމުންނެވެ. މި ވާހަކަތައް ތިލަވެފައި މިވަނީ އޮކްޓޫބަރު 27 ގައި ޔަހޫދީންގެ ޢާންމު އިންތިޚާބު ބޭއްވުމަށް ތައްޔާރުވަމުންދާ ދަނޑިވަޅެއްގައެވެ.
ޔަހޫދީންގެ ދައުލަތުން ޣައްޒާގައި ހިންގަމުންދާ ޤަތުލުއާންމަށް ގާތްގަނޑަކަށް ތިން އަހަރު ފުރެން ކައިރިވެފައިވާއިރު، ޣައްޒާގެ ޞިއްޙަތާ ބެހޭ ވުޒާރާއިން ބުނާ ގޮތުގައި، ސެޕްޓެމްބަރު 26 އާ ހަމައަށް 74,016 ފަލަސްޠީނު ރައްޔިތުން ވަނީ ޝަހީދުވެފައެވެ. އަދި ޒަޚަމްވި މީހުންގެ ޢަދަދު 175,068 އަށް އަރައެވެ.
10 އޮކްޓޫބަރު 2025 ގައި އެމެރިކާ މެދުވެރިވެގެން ޙަމަލާތައް ހުއްޓައިލުމުގެ އެއްބަސްވުމެއް ޤާއިމުކުރި ނަމަވެސް، ޔަހޫދީންގެ ނިރުބަވެރި ދައުލަތުން ދަނީ އެއްބަސްވުމާ ޚިލާފަށް ޙަމަލާތައް ދެމުންނެވެ. މި އެއްބަސްވުމަށް ޢަމަލުކުރަން ފެށި ފަހުންވެސް ޔަހޫދީންގެ ޙަމަލާތަކުގައި 1,145 ފަލަސްޠީނުގެ މީހުން ވަނީ ޝަހީދުވެފައެވެ. އަދި ޙަމަލާތައް ހުއްޓައިލުމުގެ ދެވަނަ މަރުޙަލާގެ މަޝްވަރާތައް މިހާރު ވަނީ ހުއްޓުމަކަށް އައިސްފައެވެ.
މިހާރު ޔަހޫދީންގެ ނިރުބަވެރި އަސްކަރިއްޔާއިން ޣައްޒާގެ ދެބައިކުޅައެއްބަޔަށްވުރެ ބޮޑު ސަރަޙައްދެއް ޙިޞާރުކޮށްފައިވާއިރު، ބޮޑުވަޒީރު ބެންޖަމިން ނަތަންޔާހޫ ބުނެފައިވަނީ ޣައްޒާގައި ވެރިކަންކުރާ ޙަމާސް ޖަމާޢަތުން ހަތިޔާރު ނުބަހައްޓަނީސް ޔަހޫދީ ސިފައިން ފަހަތަށް ނުޖެހޭނެ ކަމަށެވެ.