މޫސުން ގޯސްވެ ފެންބޮޑުވެފައިވާ ތައިލެންޑުގެ ބެންކޮކުގެ މަގުތަކުގައި ޖެޓް ސްކީއެއް ދުއްވައި ގަސްތުގައި ފެންގަނޑުގައި ރާޅު އުފެއްދި މީހަކު ހައްޔަރުކޮށްފިއެވެ.
އުމުރުން 27 އަހަރުގެ ސޯން ކީޑްސިރީ ހައްޔަރުކޮށްފައި ވަނީ އާއްމު އުނދަގުލެއް ކުރުމުގެ ކުށުގައެވެ. އަދި ޓްރެފިކަށް ދަތިކުރުމުގެ ކުށުގައެވެ. ބެންކޮޮކް ނޯތު މުނިސިޕަލް ކޯޓުން ވަނީ އޭނާ 5،000 ބާތުން ޖޫރިމަނާކޮށް، އެއް އަހަރު ފަހުން 15 ދުވަހުގެ މުއްދަތަށް އޭނާ ޖަލަށް ލުމަށް ހުކުމްކޮށްފައެވެ.
ސޯން ކީޑްސިރީ ޖެޓް ސްކީ ދުއްވާ މަންޒަރު ފެންނަ ވީޑިއޯއެއް މީސްމީޑިޔާގައި ހަލުވިކަމާއެކު ދައުރުވަމުންދާ އިރު، އެ ވީޑިޔޯއިން އޭނާ ކުއްލިކުއްލިއަށް ޖެޓްސްކީގެ ދުވެލި ބާރުކޮށްލައި ގޮތްގޮތަށް އަނބުރާ މަންޒަރު ފެނެއެވެ. އޭގެ ސަބަބުން ފެން ގަނޑުގައި ރާޅު އުފެދި ގޭގެއާ ދިމާލަށް ރާޅުތައް ދާ މަންޒަރު ވީޑިއޯއިން ފެނެއެވެ. އޭނާގެ ޢަމަލުތަކުގެ ސަބަބުން ބައެއް މީހުން ޝަކުވާކޮށްފައިވާ ކަމަށް ތައިލެންޑުގެ ބައެއް ނޫސްތަކުގައި ބުނެފައިވެއެވެ. އޭނާ ޖެޓް ސްކީ ދުއްވަމުން ދިޔަ ވަގުތު ގިނަ ޢަދަދެއްގެ އެހެން އުޅަނދުތަކުން ވެސް ދިޔައީ ހަމަ އެ މަގު ބޭނުން ކުރަމުންނެވެ.
ޖެޓް ސްކީ ދުއްވާ ވީޑިއޯ މީސްމީޑިޔާގައި ފުރަތަމަ ޙިއްޞާކޮށްފައި ވަނީ ސޯން ކީޑްސިރީއެވެ. އޭނާ އެ ޕޯސްޓުކޮށްފައި ވަނީ އޭނާގެ އަމިއްލަ ފޭސްބުކް އެކައުންޓުންނެވެ. ނަމަވެސް އެ ޕްރޮފައިލް ވެސް ވިޑިއޯ ވެސް މިހާރު ފެންނާކަށް ނެތެވެެ.
ސޯން ކީޑްސިރީ ޖެޓް ސްކީ ދުއްވި މަންޒަރު ވީޑިއޯކުރި މީހާއާ ދެކޮޅަށް ވެސް ފުލުހުން ވަނީ ކުށެއް ކުރުމުގައި މީހަކަށް އެހީތެރިވި ކަމުގެ ދައުވާ އުފުލައިފައެވެ.