ޔޫއެފާ ނޭޝަންސް ލީގުގެ ގްރޫޕް އެކެއްގައި ރޭ ބެލްޖިއަމް އާއި ދެކޮޅަށް ފްރާންސް ކުޅުނު މެޗު 1-0 ގެ ނަތީޖާއަކުން ފްރާންސް މޮޅުވެ ގްރޫޕްގެ އެއްވަނަ މަގާމް ހޯދައިފިއެވެ.
މި ގްރޫޕްގައި ފްރާންސްވަނީ މިހާތަނަށް ކުޅުނު 2 މެޗުންވެސް މޮޅުވެ ޖުމްލަ 6 ޕޮއިންޓް ހޯދާފައެވެ. ބެލްޖިއަމްއަށް ލިބިފައިވާ 3 ޕޮއިންޓާއެކު އެ ޓީމު އޮތީ ގްރޫޕްގެ ދެވަނައިގައެވެ.
ބެލްޖިއަމްގެ ވެރިރަށް ބްރަސަލްސްގައި 40 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ގިނައިރު ބޯޅަ ހިފަހައްޓައިގެން ކުޅެ ގިނަ ފުރުސަތުތައް ތަނަވަސްކޮށްފައިވަނީވެސް ފްރާންސް އިންނެވެ.
މި މެޗަށް ފްރާންސް ނިކުތްއިރު އެ ޓީމުގެ ކޯޗު ޒިދާން ވަނީ ނޭޝަންސް ލީގުގެ ފުރަތަމަ މެޗުގައި ތުރުކީ އާއި ދެކޮޅަށް ކުޅުނު މެޗަށް ނިކުތް ޓީމަށް 9 ބަދަލެއް ގެނެސްފައެވެ. އެގޮތުން އަނިޔާގެ ސަބަބުން ފްރާންސްގެ ކެޕްޓަން އަދި އެ ޓީމަށް އެންމެ ގިނަ ލަނޑު ޖަހައިދީފައިވާ ކިލިއަން އެމްބާޕޭ ވަނީ ޓީމާއި ވަކިވެފައެވެ.
ފްރާންސް އިން މި މެޗުގައި ޖެހި ހަމައެކަނި ލަނޑަކީ މެޗުގެ ފުރިހަމަ ވަގުތު ހަމަވާން 2 މިނިޓަށް ވެފައިވަނިކޮށް އަމިއްލަ ހާފުގެ ތެރެއިން މައިކަލް އޮލިސޭއަށް ލިބުނު ބޯޅައެއް ހިފައިގެން ގޮސް އޭނާ ޖަހާފައިވާ ހިތްގައިމު ލަނޑެކެވެ.
މި މެޗުގައި ފްރާންސްއަށް ލަނޑު ޖަހަން ރަގަޅު ފުރުސަތުތަކެއް ލިބިގެންގޮސްފައިވާއިރު އެ ޓީމުގެ ޑިޒޭ ޑުއޭއަށް ވަނީ ރަގަޅު ފަސް ފުރުސަތެއް ލިބި ބޭކާރުވެފައެވެ.
ނޭޝަންސް ލީގުގައި ދެން ފްރާންސް ނިކުންނާނީ އަންނަ ހުކުރު ދުވަހު އިޓަލީ އާއި ދެކޮޅަށެވެ.