އޭނާއާ އިދިކޮޅު ފަރާތްތަކުން ހުށަހަޅާފައިވާ ގޮތަށް ފީފާގެ ރިޒާވްގައި ހުރި ފައިސާ ބަހަން އެ ޖަމާއަތުގެ ކައުންސިލަށް ހުށަހަޅަން ފީފާގެ ރައީސް ޖިއާނީ އިންފަންޓީނޯ ނިންމައިފި އެވެ.
އަންނަ މާޗު މަހު ބާއްވާ ދުނިޔޭގެ ފުޓްބޯޅަ ޖަމާއަތުގެ އިންތިހާބުގައި އިންފަންޓީނޯގެ ބަދަލުގައި ފީފާ އަށް އެހެން ރައީސަކު ހޮވަން ބާރު އަޅަމުންދަނީ ޔޫރަޕާއި ކޮންކާކަޕް އަދި އޭޝިޔާގެ ބައެއް ގައުމުތަކެވެ. މި ތިން ފެޑަރޭޝަނުން މިހާރު އެދިފައިވަނީ ފީފާގެ ރިޒާވްގައިވާ ހަ ބިލިއަން ޑޮލަރުގެ ތެރެއިން މެމްބަރު ގައުމުތަކަށް ފައިސާ ދިނުމަށެވެ.
ޔޫރަޕާއި ކޮންކާކަފުން ބޭނުންވަނީ މަދުވެގެން ކޮންމެ ގައުމަކަށް 10 މިލިއަން ޑޮލަރު ދޭށެވެ. މި ދެ ޖަމާއަތުން ގުޅިފައިވާ ސިޓީ އެއް ފޮނުވާފައިވާއިރު އޭއެފްސީން ވެސް މިކަމަށް ރާއީދުކޮށް ވަކިން ވަނީ ސިޓީ ފޮނުވައިފަ އެވެ. ނަމަވެސް ކޮންމެ ގައުމަކަށް ދޭނެ ވަކި އަދަދެއް އިންފަންޓީނޯ ވިދާޅެއްނުވެ އެވެ. އޭނާ ވިދާޅުވީ ގޮތް ނިންމާނީ ކޮންމެ ފެޑަރޭޝަނެއްގެ ރައީސް ވެސް ހިމެނިވަޑައިގަންނަވާ ފީފާ ކައުންސިލުން ކަމަށެވެ.
"މެމްބަރު ގައުމުތަކުން އެދިފައިވާ ގޮތަށް މިކަމާމެދު ފީފާގެ ކައުންސިލްގައި ބަހުސް ކުރެވޭނެ. ކައުންސިލުން ނިންމާ ގޮތަކަށް ފައިސާ ބެހުމުގެ ކަންކަން ކުރި އަށްދާނެ،" އިންފަންޓީނޯ ވިދާޅުވި އެވެ.
ދުނިޔޭގެ ހަ ބައްރުގެ ތެރެއިން ތިން ބައްރަކުން ފީފާގެ ރިޒާވްގައި ހުރި ފައިސާއިން ގައުމުތަކަށް އެހީވާން ފައިސާދޭން ގޮވާލީ އިންފަންޓީނޯއާ ދެކޮޅަށް ކުރާ މަސައްކަތުގެ ތެރެއިން އޭނާ އަށް ތުރާތައް ކުރިމަތި ކުރުވުމަށެވެ. ސަބަބަކީ އެންމެ ފަހުގެ ވޯލްޑް ކަޕަށް ފަހު ވޯލްޑް ކަޕާއި ފީފާގެ މުބާރާތްތައް ހިންގަން ވަކިން ކުންފުންޏެއް ހަދައި އެ ކުންފުނީގެ ހިއްސާ އެމެރިކާގެ ވިޔަފާރި ވެރިންނަށް ދޭން އިންފަންޓީނޯ ސިއްރިޔާތުގައި ގައުމުތަކަށް ސިޓީ ފޮނުވައި މި ޕްރޮޕޯސަލަށް ތާއީދު ކުރާ ކޮންމެ ގައުމަކަށް 10 މިލިއަން ޑޮލަރު ދޭން ހުށަހަޅާފައިވާތީ އެވެ.
މިކަމާ ދެކޮޅަށް އެންމެ ފުރަތަމަ ވެސް ނުކުތީ ޔޫރަޕެވެ. އެ މީހުން ތުހުމަތު ކުރަނީ އިންފަންޓީނޯ ދޭން އޭރު ހުށަހެޅި ފައިސާ އަކީ ވެސް ފީފާގެ ރިޒާވްގައި ހުރި ފައިސާ އެވެ. 10 މިލިއަން ޑޮލަރު ކޮންމެ ގައުމަކަށް ދޭން ޔޫރަޕާއި އޭޝިޔާ އާއި ކޮންކާފުން އެދުނީ އިންފަންޓީނޯއާ ޖަދަލު ކޮށްލުމުގެ ގޮތުންނެވެ. ނަމަވެސް ނުރަސްމީކޮށް އިންފަންޓީނޯ މިހާރު ވިދާޅުވަމުންދަނ ފީފާގެ ރިޒާވްގައިވާ ފައިސާ ބަހާލުމަކީ ކުރިމަގަށް އެންމެ ރަނގަޚު ގޮތަށް ނުވެދާނެ ކަމަށެވެ.